30 రోజుల్లో ఏపీకి రండి.
* పారిశ్రామికవేత్తలకు సీఎం చంద్రబాబు ఆహ్వానం!
* ‘స్పీడ్ ఆఫ్ డూయింగ్ బిజినెస్’ కు ప్రాధాన్యం.
* త్వరలోనే రాయలసీమలో సెమీకండక్టర్ల పరిశ్రమ.
* సింగపూర్ ‘సెమీకాన్’ సదస్సులో ముఖ్యమంత్రి కీలక ప్రకటన.
అమరావతి, మహా.
సెమీకండక్టర్ల తయారీకి ఆంధ్రప్రదేశ్ అత్యుత్తమ గమ్యస్థానమని రాష్ట్ర ముఖ్యమంత్రి నారా చంద్రబాబు నాయుడు స్పష్టం చేశారు. రాష్ట్రంలో పెట్టుబడులకు ఉన్న విస్తృత అవకాశాలను, ప్రభుత్వ అనుకూల విధానాలను స్వయంగా పరిశీలించేందుకు రాబోయే 30 రోజుల్లోగా ఏపీకి రావాలంటూ సింగపూర్ పారిశ్రామికవేత్తలకు ఆయన పిలుపునిచ్చారు. సింగపూర్లో మంగళవారం జరిగిన ప్రతిష్ఠాత్మక ‘సెమీకాన్ ఎకోసిస్టమ్’ రౌండ్ టేబుల్ సదస్సులో ముఖ్యమంత్రి చంద్రబాబు పాల్గొన్నారు. ఈ సందర్భంగా రాష్ట్రంలో పెట్టుబడులకు ఉన్న అనుకూల వాతావరణాన్ని ఆయన ప్రపంచ పారిశ్రామిక దిగ్గజాలకు వివరించారు.
**పెట్టుబడులకు ఇదే అనుకూల సమయం**
ప్రస్తుత తరుణంలో ప్రపంచవ్యాప్తంగా పెట్టుబడులు పెట్టేందుకు భారత్ అత్యంత సురక్షితమైన దేశమని, అందులోనూ ఆంధ్రప్రదేశ్ అత్యంత అనుకూలమైన రాష్ట్రమని చంద్రబాబు పేర్కొన్నారు. పారిశ్రామికవేత్తలు పెట్టుబడులు పెట్టేందుకు ఇదే సరైన సమయమని ఆయన వ్యాఖ్యానించారు. తమ ప్రభుత్వం ‘ఈజ్ ఆఫ్ డూయింగ్ బిజినెస్’ దాటి **’స్పీడ్ ఆఫ్ డూయింగ్ బిజినెస్’** అనే నూతన విధానాన్ని అనుసరిస్తోందని, పరిశ్రమల ఏర్పాటుకు అత్యంత వేగంగా అనుమతులు మంజూరు చేస్తామని హామీ ఇచ్చారు.
**రాయలసీమ పారిశ్రామిక హబ్గా మార్పు**
ఈ సదస్సు వేదికగా రాయలసీమ ప్రాంత పారిశ్రామిక అభివృద్ధిపై ముఖ్యమంత్రి ఒక కీలక ప్రకటన చేశారు. త్వరలోనే రాయలసీమ ప్రాంతంలో ఒక భారీ సెమీకండక్టర్ల తయారీ పరిశ్రమ ఏర్పాటు కాబోతోందని వెల్లడించారు. కేవలం సెమీకండక్టర్లకే పరిమితం కాకుండా.. డిఫెన్స్ (రక్షణ రంగం), ఏరోస్పేస్, ఎలక్ట్రానిక్స్, ఫైటర్ జెట్ల తయారీ, ఆటోమొబైల్ వంటి అత్యాధునిక రంగాలకు రాయలసీమను ప్రధాన కేంద్రంగా తీర్చిదిద్దడమే తమ ప్రభుత్వ లక్ష్యమని చంద్రబాబు స్పష్టం చేశారు. ఈ ప్రాంతాన్ని ఒక సమగ్ర పారిశ్రామిక హబ్గా మారుస్తామని భరోసా ఇచ్చారు.
**ఆసక్తి చూపిన అంతర్జాతీయ సంస్థలు**
ముఖ్యమంత్రి చంద్రబాబు నాయుడు నేతృత్వంలో జరిగిన ఈ రౌండ్ టేబుల్ సమావేశంలో గ్లోబల్ ఫౌండ్రీస్, ఎన్ఎక్స్పీ, ఏఎస్ఎంపీటీ, ఒన్ సిస్టమ్ టెక్నాలజీస్, టెక్సెండ్ ఫోటోమాస్క్, ఆక్వాటెక్ వంటి పలు అంతర్జాతీయ సెమీకండక్టర్ తయారీ సంస్థల ప్రతినిధులు, ఉన్నతాధికారులు పాల్గొన్నారు. నవ్యాంధ్రలో పెట్టుబడులకు ఆంధ్రప్రదేశ్ ప్రభుత్వం అందిస్తున్న ప్రోత్సాహకాలు, పారిశ్రామిక విధానాలపై అంతర్జాతీయ ప్రతినిధులు తీవ్ర ఆసక్తి కనబరిచినట్లు సమాచారం.
