వన్డే ప్రపంచకప్ 2027లో రోహిత్, కోహ్లీ ఉంటారా?

వన్డే ప్రపంచకప్ 2027లో రోహిత్, కోహ్లీ ఉంటారా?
* బీసీసీఐ కార్యదర్శి కీలక వ్యాఖ్యలు.
* ఆటగాళ్ల ఎంపిక బోర్డు గదులకే పరిమితం.
* మీడియాకు చెప్పలేమన్న దేవజిత్ సైకియా.
* ఫిట్‌నెస్ ఆధారంగానే మెగా టోర్నీకి తుది నిర్ణయం.
* బంగ్లాదేశ్ పర్యటనపై కేంద్ర ప్రభుత్వ విధానాలకే కట్టుబడి ఉంటామని స్పష్టీకరణ.
ముంబై, మహా.
రాబోయే వన్డే ప్రపంచకప్ 2027లో భారత జట్టు కూర్పు, ముఖ్యంగా సీనియర్ దిగ్గజాలు రోహిత్ శర్మ, విరాట్ కోహ్లీల (రో-కో) భవితవ్యంపై కొంతకాలంగా క్రికెట్ వర్గాల్లో ఆసక్తికర చర్చ సాగుతోంది. ఇప్పటికే టెస్టు, టీ20 ఫార్మాట్లకు వీడ్కోలు పలికిన ఈ ఇద్దరు వెటరన్ ప్లేయర్లు ప్రస్తుతం కేవలం వన్డేల్లోనే కొనసాగుతున్నారు. యువ ఆటగాళ్లకు పెద్దపీట వేస్తున్న ప్రస్తుత తరుణంలో, వచ్చే ప్రపంచకప్‌నకు వీరిద్దరిని సెలక్టర్లు పరిగణనలోకి తీసుకుంటారా లేదా అనే సస్పెన్స్ నెలకొంది. ఈ క్రమంలో రో-కో భవితవ్యంపై భారత క్రికెట్ నియంత్రణ మండలి కార్యదర్శి దేవజిత్ సైకియా అత్యంత ఆసక్తికర వ్యాఖ్యలు చేశారు. జట్టు భవిష్యత్తు ప్రణాళికలు, ఆటగాళ్ల ఎంపికపై జరుగుతున్న చర్చలు పూర్తిగా బోర్డు అంతర్గత వ్యవహారాలని ఆయన స్పష్టం చేశారు.
ఈ మెగా టోర్నీకి జట్టు ఎంపికపై మాట్లాడిన సైకియా.. తమ వద్ద అత్యంత సమర్థవంతమైన నిపుణుల బృందం (సెలెక్షన్ కమిటీ) ఉందని, ప్రతి కీలక నిర్ణయంలోనూ సంబంధిత వర్గాల అభిప్రాయాలను తీసుకుంటామని చెప్పారు. జట్టు భవిష్యత్తుకు సంబంధించిన అంశాలపై నిరంతరం అంతర్గతంగా చర్చలు జరుగుతూనే ఉంటాయని, అందువల్ల ప్రత్యేకంగా సమావేశాలు ఏర్పాటు చేయాల్సిన అవసరం ఇప్పటి వరకు రాలేదన్నారు. రోహిత్, కోహ్లీ రాబోయే వన్డే ప్రపంచకప్‌లో ఆడతారా లేదా అనే ప్రశ్న చాలా మంది నుంచి ఎదురవుతోందని, అయితే ఇవన్నీ వ్యూహాత్మక చర్చలని పేర్కొన్నారు. బోర్డు రూముల్లో జరగాల్సిన ఇలాంటి అత్యంత కీలకమైన అంతర్గత విషయాలను మీడియా ముందు బహిర్గతం చేయడం సరైంది కాదని ఆయన అభిప్రాయపడ్డారు. వారి భవితవ్యం గురించి ఇప్పుడే ఒక నిర్ణయానికి రావడం సాధ్యం కాదని, ఆ సమయానికి వారి ఫామ్, ఫిట్‌నెస్‌తో పాటు మరికొన్ని సమీకరణాలను పరిగణనలోకి తీసుకుని తుది నిర్ణయం ప్రకటిస్తామని సైకియా వెల్లడించారు.
మరోవైపు, పొరుగు దేశం బంగ్లాదేశ్‌తో ద్వైపాక్షిక సిరీస్‌ల పునరుద్ధరణపై కూడా బీసీసీఐ కార్యదర్శి స్పందించారు. ఐపీఎల్ 2026 సీజన్‌కు ముందు భారత్-బంగ్లాదేశ్ మధ్య తీవ్ర రాజకీయ ఉద్రిక్తతలు ఏర్పడటం, ఆ కారణంగానే టీ20 ప్రపంచకప్ నుంచి బంగ్లాదేశ్ జట్టు తప్పుకోవడం తెలిసిందే. అప్పటి నుంచి ఇరు జట్ల మధ్య ద్వైపాక్షిక సిరీస్‌లు కూడా పూర్తిగా నిలిచిపోయాయి. బంగ్లాదేశ్‌లో మారిన రాజకీయ పరిస్థితుల నేపథ్యంలో వాయిదా పడిన భారత జట్టు వైట్ బాల్ పర్యటనపై చర్చలు జరుగుతున్న తరుణంలో.. సైకియా తమ వైఖరిని స్పష్టం చేశారు. అంతర్జాతీయ క్రికెట్ నిర్వహణలో బీసీసీఐ ఎల్లప్పుడూ కేంద్ర ప్రభుత్వ విధానాలకే కట్టుబడి ఉంటుందని తేల్చిచెప్పారు.
ఇతర దేశాల అంతర్గత రాజకీయ పరిస్థితులతో క్రికెట్ బోర్డుకు ఎలాంటి సంబంధం ఉండదని సైకియా పేర్కొన్నారు. ద్వైపాక్షిక సిరీస్‌లు లేదా అంతర్జాతీయ క్రీడా పోటీల విషయంలో భారత విదేశాంగ మంత్రిత్వ శాఖ, కేంద్ర ప్రభుత్వం రూపొందించే మార్గదర్శకాలను, విధానాలనే తాము తూచా తప్పకుండా అనుసరిస్తామన్నారు. ఏ దేశంలో ఎలాంటి ప్రభుత్వం ఉంది, అక్కడ ఎలాంటి పరిస్థితులు ఉన్నాయనేది తమ పరిధిలోని అంశం కాదని, క్రికెట్‌ను సజావుగా నిర్వహించడం మాత్రమే బోర్డు బాధ్యతని సైకియా స్పష్టం చేశారు. కేంద్రం నుంచి వచ్చే ఆదేశాల ఆధారంగానే బంగ్లా పర్యటనపై ముందడుగు పడనుందని ఆయన మాటలను బట్టి అర్థమవుతోంది.