తమిళనాడులో పెను విషాదం….

తమిళనాడులో పెను విషాదం.
* సీఫుడ్ ఫ్యాక్టరీలో గ్యాస్ లీక్.
* విషవాయువుల బారిన పడి ఏడుగురు కార్మికుల దుర్మరణం.
* 60 మందికి తీవ్ర అస్వస్థత.. ప్రాణాపాయ స్థితిలో పలువురు.
* దిగ్భ్రాంతి వ్యక్తం చేసిన సీఎం విజయ్.. త్రిసభ్య కమిటీతో విచారణకు ఆదేశం.
చెన్నై , మహా.
తమిళనాడు రాష్ట్రంలో ఆదివారం ఘోర విషాదం చోటుచేసుకుంది. ఓ సీఫుడ్ ప్రాసెసింగ్ (సముద్ర ఉత్పత్తుల శుద్ధి) కేంద్రంలో ప్రమాదవశాత్తు గ్యాస్ లీక్ కావడంతో ఏడుగురు అమాయక కార్మికులు ప్రాణాలు కోల్పోయారు. మరో 60 మందికి పైగా కార్మికులు తీవ్ర అస్వస్థతకు గురై ఆసుపత్రుల్లో ప్రాణాపాయ స్థితిలో కొట్టుమిట్టాడుతున్నారు. ఈ హృదయ విదారక ఘటన తిరువల్లూరు జిల్లా వ్యాప్తంగా తీవ్ర కలకలం రేపింది.
**ఊపిరాడక విలవిలలాడిన కార్మికులు**
తిరువల్లూరు జిల్లా పెరియపాలెం సమీపంలోని కన్నిగైపైర్ ప్రాంతంలో ‘సెయింట్ పీటర్స్ అండ్ పాల్ సీఫుడ్ ఎక్స్‌పోర్ట్స్’ పేరిట ఓ భారీ ఫుడ్ ప్రాసెసింగ్ యూనిట్ కార్యకలాపాలు నిర్వహిస్తోంది. దైనందిన విధుల్లో భాగంగా ఆదివారం కూడా కార్మికులు ఫ్యాక్టరీలో పనిచేస్తుండగా ఒక్కసారిగా ప్రమాదవశాత్తు భారీ ఎత్తున గ్యాస్ లీక్ అయింది. క్షణాల్లోనే ఆ ప్రాంగణమంతా విషవాయువులు వ్యాపించడంతో కార్మికులు ఊపిరాడక విలవిలలాడిపోయారు. గ్యాస్ తీవ్రతకు ఇద్దరు కార్మికులు అక్కడికక్కడే కుప్పకూలి ప్రాణాలు విడవగా.. ఆసుపత్రిలో చికిత్స పొందుతూ మిగతావారు మృతి చెందడంతో మొత్తం మృతుల సంఖ్య ఏడుకు చేరింది. ఈ ప్రమాదంలో ఏకంగా 60 మంది కార్మికులు తీవ్ర అస్వస్థతకు గురయ్యారు.
**హుటాహుటిన సహాయక చర్యలు.. వెంటిలేటర్‌పై బాధితులు**
ప్రమాదం గురించి సమాచారం అందుకున్న వెంటనే స్థానిక పోలీసులు, రెస్క్యూ విపత్తు నిర్వహణ సిబ్బంది హుటాహుటిన ఘటనా స్థలానికి చేరుకుని పటిష్టమైన సహాయక చర్యలు చేపట్టారు. గ్యాస్ ప్రభావంతో వాంతులు చేసుకుంటూ, ఊపిరి తీసుకోవడంలో తీవ్ర ఇబ్బందులు ఎదుర్కొంటూ, నీరసించిపోయి స్పృహ కోల్పోతున్న బాధితులను పోలీసులు వెంటనే అంబులెన్సుల ద్వారా సమీపంలోని ఆసుపత్రులకు తరలించారు. ప్రస్తుతం ఆసుపత్రిలో చికిత్స పొందుతున్న 60 మందిలో పలువురి పరిస్థితి అత్యంత విషమంగా ఉండటంతో వైద్యులు వారిని వెంటిలేటర్‌పై ఉంచి అత్యవసర చికిత్స అందిస్తున్నారు. ఈ ఫ్యాక్టరీలో పనిచేస్తున్న బాధితుల్లో అత్యధిక శాతం మంది ఉపాధి కోసం వలస వచ్చిన ఉత్తర భారతదేశానికి చెందిన వారని అధికారులు ప్రాథమికంగా గుర్తించారు.
**ప్రభుత్వ పెద్దల దిగ్భ్రాంతి.. దర్యాప్తునకు సీఎం ఆదేశం**
సీఫుడ్ ఫ్యాక్టరీలో జరిగిన ఈ దారుణ గ్యాస్ లీక్ ఘటనపై తమిళనాడు గవర్నర్ రాజేంద్ర అర్లేకర్ తీవ్ర విచారం వ్యక్తం చేశారు. మృతుల కుటుంబాలకు ఆయన ప్రగాఢ సానుభూతి తెలిపారు. అలాగే, రాష్ట్ర ముఖ్యమంత్రి విజయ్ ఈ దుర్ఘటనపై తీవ్ర దిగ్భ్రాంతి వ్యక్తం చేశారు. ప్రమాదం జరిగిన విషయం తెలుసుకున్న వెంటనే ఉన్నతాధికారులను అప్రమత్తం చేసిన ఆయన.. రాష్ట్ర మంత్రులను వెంటనే ఘటనా స్థలానికి వెళ్లి పరిస్థితిని సమీక్షించాలని ఆదేశించారు. బాధితులకు మెరుగైన వైద్యం అందేలా సహాయక చర్యలు మరింత వేగవంతం చేయాలని అధికారులకు సూచించారు. ఈ ఘోర ప్రమాదానికి దారితీసిన పరిస్థితులు, భద్రతా వైఫల్యాలను పూర్తి స్థాయిలో వెలికితీసేందుకు ముఖ్యమంత్రి విజయ్ వెంటనే ఒక ఉన్నతస్థాయి త్రిసభ్య కమిటీని ఏర్పాటు చేశారు. ఈ ఘటనపై క్షేత్రస్థాయిలో సమగ్ర విచారణ జరిపి కేవలం మూడు రోజుల్లోగా పూర్తిస్థాయి నివేదికను ప్రభుత్వానికి అందజేయాలని ఆయన ఆ కమిటీకి కఠిన ఆదేశాలు జారీ చేశారు.