మోపిదేవి ఆలయంలో మంత్రి నారా లోకేశ్ ప్రత్యేక పూజలు!
* స్వామివారి పుట్టలో పాలు పోసి మొక్కులు చెల్లించుకున్న ఐటీ శాఖ మంత్రి.
* బాగున్నారా’ అంటూ ప్రజలను ఆప్యాయంగా పలకరించిన లోకేశ్.
* ఘనస్వాగతం పలికిన అర్చకులు.. వెంట నడిచిన ఎంపీ, ఎమ్మెల్యేలు.
*అనంతరం టీడీపీ కార్యకర్తల సమన్వయ సమావేశంలో పాల్గొననున్న మంత్రి
అవనిగడ్డ,మహా.
కృష్ణా జిల్లా అవనిగడ్డ నియోజకవర్గంలో రాష్ట్ర ఐటీ, విద్యాశాఖ మంత్రి నారా లోకేశ్ పర్యటన అత్యంత వైభవంగా కొనసాగుతోంది. బుధవారం కొక్కిలిగడ్డ నుంచి నేరుగా ప్రముఖ పుణ్యక్షేత్రమైన మోపిదేవి శ్రీ సుబ్రహ్మణ్యేశ్వర స్వామి ఆలయానికి మంత్రి లోకేశ్ చేరుకున్నారు. ఆలయ ప్రాంగణానికి చేరుకునే ముందు క్షేత్రస్థాయిలో ఉన్న సామాన్య ప్రజలను, గ్రామస్తులను ఆయన ఎంతో ఆప్యాయంగా పలకరించారు. స్వయంగా ప్రజల వద్దకు వెళ్లి ‘బాగున్నారా’ అంటూ కరచాలనం చేస్తూ ముందుకు సాగారు. రాష్ట్ర మంత్రి ఒక్కసారిగా తమ వద్దకు వచ్చి అంతగా కలిసిపోవడంతో స్థానిక ప్రజలు, భక్తులు తీవ్ర ఆశ్చర్యానికి, ఆనందానికి గురయ్యారు. తమ ప్రియతమ నాయకుడిని చూడగానే ఎంతో ఉత్సాహంతో ‘లోకేశ్ అన్నా..’ అంటూ స్థానిక ప్రజానీకం ప్రేమతో పలకరిస్తూ ఘనస్వాగతం పలికింది.
**వేద ఆశీర్వచనాలు.. పుట్టలో పాలు పోసి మొక్కులు**
ఆలయ సింహద్వారం వద్దకు చేరుకున్న మంత్రి నారా లోకేశ్కు దేవాదాయ శాఖ ఉన్నతాధికారులు, ఆలయ అర్చక బృందం వేద మంత్రోచ్ఛారణలు, పూర్ణకుంభంతో సాదర స్వాగతం పలికారు. అనంతరం ఆలయంలో శ్రీ సుబ్రహ్మణ్యేశ్వర స్వామివారికి మంత్రి లోకేశ్ అత్యంత భక్తిశ్రద్ధలతో ప్రత్యేక పూజలు నిర్వహించారు. ఈ సందర్భంగా క్షేత్ర సంప్రదాయాన్ని అనుసరిస్తూ స్వామివారి పుట్టలో పాలు పోసి తన మొక్కులు చెల్లించుకున్నారు. పూజా కార్యక్రమాల అనంతరం దేవాదాయ శాఖ అధికారులు, అర్చకులు ఆలయ మర్యాదల ప్రకారం స్వామివారి శేషవస్త్రంతో లోకేశ్ను సత్కరించి, స్వామివారి పవిత్ర చిత్రపటాన్ని, లడ్డూ ప్రసాదాన్ని అందజేశారు.
**భారీగా తరలివచ్చిన నేతలు.. సమన్వయానికి సన్నద్ధం**
మంత్రి నారా లోకేశ్ వెంట స్వామివారిని దర్శించుకున్న వారిలో మచిలీపట్నం పార్లమెంట్ సభ్యులు వల్లభనేని బాలశౌరి, స్థానిక అవనిగడ్డ శాసనసభ్యులు మండలి బుద్ధప్రసాద్, పెనమలూరు ఎమ్మెల్యే బోడే ప్రసాద్, గుడివాడ ఎమ్మెల్యే వెనిగండ్ల రాము, పెడన ఎమ్మెల్యే కాగిత కృష్ణప్రసాద్లతో పాటు పలువురు ముఖ్య నాయకులు ఉన్నారు. స్వామివారి దర్శనానంతరం మోపిదేవి గ్రామంలోనే ఏర్పాటు చేసిన ప్రత్యేక శిబిరానికి మంత్రి లోకేశ్ బయలుదేరి వెళ్లారు. అక్కడ నియోజకవర్గానికి చెందిన తెలుగుదేశం పార్టీ (టీడీపీ) ముఖ్య నేతలు, క్రియాశీల కార్యకర్తలతో నిర్వహించనున్న ప్రత్యేక సమన్వయ సమావేశంలో మంత్రి పాల్గొని, పార్టీ బలోపేతానికి, స్థానిక అభివృద్ధి పనులపై దిశానిర్దేశం చేయనున్నారు.
