హబ్ అండ్ స్పోక్’తో ప్రపంచానికి భారత్ మరింత చేరువ.
*దేశ విమానయాన రంగంలో సరికొత్త శకానికి నాంది.
* వారణాసి వేదికగా తొలి సేవలకు శ్రీకారం చుట్టిన మంత్రి రామ్మోహన్ నాయుడు.
* ఎయిర్ ఇండియా ఆధ్వర్యంలో ‘ఈజీ కనెక్ట్’.. ఒకేసారి ఇమ్మిగ్రేషన్, లగేజీ చెకిన్.
* ఆరు వారాల్లో హైదరాబాద్ సహా మరో ఆరు నగరాలకు సేవల విస్తరణ.
* విమానాశ్రయాలపై తగ్గనున్న రద్దీ.. వాణిజ్యం, పర్యాటకానికి పెద్దపీట.
వారణాసి, మహా.
సరికొత్తగా ప్రవేశపెట్టిన ‘హబ్ అండ్ స్పోక్’ మోడల్ వల్ల ప్రపంచ దేశాలతో భారత్కు అనుసంధానం మరింత సులభతరం కానుందని ప్రధానమంత్రి నరేంద్ర మోదీ హర్షం వ్యక్తం చేశారు. దేశాన్ని అంతర్జాతీయ విమానయాన కేంద్రంగా (గ్లోబల్ ఏవియేషన్ హబ్గా) తీర్చిదిద్దే బృహత్తర లక్ష్యంతో కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు గురువారం ఉత్తరప్రదేశ్లోని వారణాసి నుంచి ఈ నూతన విమాన సేవలకు లాంఛనంగా శ్రీకారం చుట్టారు. రాబోయే ఆరు వారాల వ్యవధిలో ఈ సేవలను హైదరాబాద్ సహా మరో ఆరు నగరాలకు విస్తరించనున్నట్లు ప్రభుత్వం ప్రకటించింది. ఈ విధానం వల్ల చిన్న నగరాలకు సైతం ప్రపంచస్థాయి కనెక్టివిటీ లభించడంతో పాటు ప్రయాణికులకు ప్రయాణ సమయం ఎంతగానో ఆదా అవుతుందని ప్రధాని మోదీ పేర్కొన్నారు.
ఈ నూతన మోడల్ అందుబాటులోకి రావడం వల్ల ఇప్పటికే ఉన్న విమానాశ్రయాల మౌలిక సదుపాయాలను మరింత సమర్థంగా వినియోగించుకునే అవకాశం ఏర్పడుతుందని ప్రధాని మోదీ స్పష్టం చేశారు. ప్రధాన విమానాశ్రయాలపై అనవసర రద్దీ, ఒత్తిడి తగ్గడంతో పాటు విమానాల వినియోగ సామర్థ్యం గరిష్ఠ స్థాయికి చేరుకుంటుందని వెల్లడించారు. దేశంలోని మారుమూల ప్రాంతాలను సైతం ప్రపంచ అవకాశాలకు ఈ మోడల్ చేరువ చేస్తుందని ప్రధాని తన సందేశంలో ఆకాంక్షించారు. ప్రపంచంలోనే అత్యంత పురాతన జీవన నగరాల్లో ఒకటైన వారణాసి భారతీయ నాగరికతకు ప్రతీక అని, అభివృద్ధి, వారసత్వ సంపదను సమన్వయం చేస్తూ ముందుకు సాగాలన్న దృక్పథానికి వారణాసి దర్పణం పడుతుందని మోదీ ఉద్ఘాటించారు. మెరుగైన విమాన కనెక్టివిటీ ద్వారా వారణాసి తన విశిష్టతను కాపాడుకుంటూనే ప్రపంచంతో బలమైన సంబంధాలను ఏర్పరుచుకుంటుందని ఆశాభావం వ్యక్తం చేశారు.
ఎయిర్ ఇండియా సంస్థ ‘ఈజీ కనెక్ట్’ (Easy Connect) పేరుతో ఈ వినూత్న సేవలను ప్రయాణికులకు అందుబాటులోకి తెచ్చింది. తొలి విమానం (ఏఐ 1111) వారణాసి నుంచి ఉదయం 9.30 గంటలకు బయలుదేరి దిల్లీకి చేరుకుంది. అక్కడి నుంచి ఆ ప్రయాణికులు దుబాయ్, కొలంబో, జెడ్డా, రియాద్, ఫుకెట్ సహా ఏకంగా తొమ్మిది అంతర్జాతీయ గమ్యస్థానాలకు నేరుగా వెళ్లే అవకాశం కల్పించారు. ఈ సరికొత్త విధానం ద్వారా ద్వితీయ, తృతీయ శ్రేణి నగరాల నుంచి వచ్చే ప్రయాణికులు తొలుత దిల్లీ వంటి ప్రధాన హబ్ విమానాశ్రయాలకు చేరుకుని, అక్కడి నుంచి ఎలాంటి ఇబ్బందులు లేకుండా విదేశాలకు పయనం కావచ్చు.
‘ఈజీ కనెక్ట్’ మోడల్లో అత్యంత కీలకమైన ఆకర్షణ ఏంటంటే.. ప్రయాణికులు తమ ప్రయాణం ప్రారంభమైన మొదటి నగరంలోనే లగేజీ (బ్యాగేజీ) చెక్-ఇన్, ఇమ్మిగ్రేషన్ ప్రక్రియలన్నింటినీ ఒకేసారి పూర్తి చేసుకోవచ్చు. మధ్యలో దిల్లీ లాంటి హబ్ విమానాశ్రయాల్లోకి మారాక మళ్లీ ఈ ఇమ్మిగ్రేషన్, లగేజ్ బదిలీ తనిఖీల కోసం క్యూ లైన్లలో వేచిచూడాల్సిన అవసరం అస్సలు ఉండదు. దీనివల్ల ప్రయాణికులకు మానసిక, శారీరక భారం తప్పడంతో పాటు విలువైన ప్రయాణ సమయం ఆదా అవుతుందని, అత్యంత సౌకర్యవంతమైన ప్రయాణ అనుభూతి లభిస్తుందని పౌర విమానయాన అధికారులు వివరిస్తున్నారు.
ఈ సేవలను వచ్చే ఆరు వారాల్లో అమృత్సర్, అహ్మదాబాద్, కొచ్చి, గోవా, హైదరాబాద్, చెన్నై నగరాలకు సైతం విస్తరించనున్నట్లు ఎయిర్ ఇండియా సీఈఓ, మేనేజింగ్ డైరెక్టర్ క్యాంప్బెల్ విల్సన్ అధికారికంగా ప్రకటించారు. ఈ మోడల్ రాకతో ప్రధాన నగరాల వెలుపల ఉన్న ప్రయాణికులకు అంతర్జాతీయ ప్రయాణాలు అత్యంత సులభతరం కానున్నాయి. ప్రపంచంలోనే అత్యంత వేగంగా అభివృద్ధి చెందుతున్న విమానయాన మార్కెట్లలో భారత్ ఒకటిగా నిలిచిన నేపథ్యంలో.. చిన్న నగరాలను నేరుగా అంతర్జాతీయ గమ్యస్థానాలతో అనుసంధానించాలని కేంద్రం కృతనిశ్చయంతో అడుగులు వేస్తోంది.
ఈ మోడల్ వల్ల రెండో, మూడో శ్రేణి నగరాలకు అపారమైన ప్రయోజనం చేకూరుతుందని పౌర విమానయాన శాఖ కార్యదర్శి సమీర్ కుమార్ సిన్హా స్పష్టం చేశారు. మెరుగైన అంతర్జాతీయ కనెక్టివిటీ ద్వారా నూతన పెట్టుబడులు ఆకర్షించబడతాయని, తద్వారా భారీగా ఉపాధి అవకాశాలు సృష్టించబడతాయని ఆయన ధీమా వ్యక్తం చేశారు. రాబోయే రోజుల్లో దేశ వాణిజ్యం, పర్యాటకం, విద్య, వైద్య రంగాలకు ఈ ‘హబ్ అండ్ స్పోక్’ మోడల్ గొప్ప ఉద్దీపనగా నిలవనుందని ఆయన అభిప్రాయపడ్డారు.
