కేతన్ అగర్వాల్ హత్య కేసులో వెలుగులోకి సంచలన నిజాలు.

హైదరాబాద్, మహా
దేశవ్యాప్తంగా తీవ్ర సంచలనం సృష్టించిన యువ రియల్టర్ కేతన్ అగర్వాల్ (26) దారుణ హత్య కేసు దర్యాప్తులో రోజుకో కీలక విషయం వెలుగుచూస్తోంది. పుణె సమీపంలోని లోహగఢ్ కోట వద్ద ఉన్న లోయలోకి తోసేసి కేతన్‌ను కిరాతకంగా అంతమొందించిన ఘటనలో విస్తుపోయే నిజాలు బయటపడుతున్నాయి. తన ప్రియుడు చేతన్ ప్రేరేపణతోనే సియా ఈ ఘాతుకానికి పాల్పడినట్లు పోలీసుల విచారణలో ఇప్పటికే స్పష్టమైంది. తాజాగా ఈ హత్యలోని క్రూరత్వాన్ని కళ్లకుకట్టేలా రెస్క్యూ టీమ్ సభ్యుడు సునీల్ గైక్వాడ్ పలు సంచలన విషయాలను వెల్లడించారు.
లోయలో లభ్యమైన కేతన్ మృతదేహంపై ఉన్న గాయాలు ఈ హత్య ఎంత అమానుషంగా జరిగిందో స్పష్టం చేస్తున్నాయి. మృతుడి తలపై బలమైన గాయాలు ఉన్నాయని, పుర్రె భాగం పూర్తిగా ఛిద్రమైపోయిందని సునీల్ గైక్వాడ్ మీడియాకు వివరించారు. చేతులు, కాళ్లపై కూడా అనేక గాయాలను గుర్తించినట్లు తెలిపారు. ఉదయం 10:30 గంటలకు సమాచారం అందుకున్న రెస్క్యూ సిబ్బంది, దట్టమైన అటవీ ప్రాంతం, నిటారుగా ఉన్న కొండల గుండా సుమారు రెండు గంటల పాటు తీవ్రంగా శ్రమించి మృతదేహాన్ని బయటకు తీసుకువచ్చారు. మధ్యాహ్నం 1:30 గంటలకు మృతదేహాన్ని అంబులెన్స్‌లోకి చేర్చడంతో ఈ ఆపరేషన్ ముగిసింది.
ఒకవైపు ఛిద్రమైన స్థితిలో ఉన్న కేతన్ మృతదేహాన్ని చూసి స్థానికులు, అక్కడున్న వారంతా తీవ్ర దిగ్భ్రాంతికి, ఆందోళనకు గురవుతుంటే.. ప్రధాన నిందితురాలు సియా మాత్రం ముఖంలో ఎలాంటి భావోద్వేగాలు లేకుండా చాలా ప్రశాంతంగా ఉండటం అందరినీ విస్మయానికి గురిచేసిందని రెస్క్యూ టీమ్ సభ్యులు తెలిపారు. ఈ దారుణ ఘటనపై పోలీసులు అన్ని కోణాల్లో దర్యాప్తును వేగవంతం చేశారు.
మరోవైపు, ఈ కేసు తీవ్రతను పరిగణనలోకి తీసుకున్న మహారాష్ట్ర ప్రభుత్వం కీలక నిర్ణయం తీసుకుంది. కేసు విచారణ కోసం ప్రముఖ న్యాయవాది ఉజ్వల్ నికమ్‌ను ప్రత్యేక పబ్లిక్ ప్రాసిక్యూటర్‌గా నియమించింది. ఈ మేరకు మహారాష్ట్ర ముఖ్యమంత్రి కార్యాలయం (సీఎంవో) ‘ఎక్స్’ (ట్విట్టర్) వేదికగా అధికారికంగా ఈ విషయాన్ని వెల్లడించింది.