ఉద్రిక్తతలకు తాత్కాలిక బ్రేక్….

ఉద్రిక్తతలకు తాత్కాలిక బ్రేక్..
* దోహా వేదికగా మళ్లీ శాంతి చర్చలు!
ఢిల్లీ, మహా.
అమెరికా, ఇరాన్ దేశాల మధ్య రగులుతున్న యుద్ధ వాతావరణానికి తాత్కాలికంగా తెరపడింది. హార్మూజ్ జలసంధిపై ఆధిపత్యం కోసం ఇరు దేశాలు భీకర దాడులకు దిగినప్పటికీ, పరిస్థితి తీవ్రతను దృష్టిలో ఉంచుకుని కాల్పుల విరమణకు అంగీకరించాయి. ఈ వివాదాలకు ముగింపు పలికేందుకు ఖతార్ రాజధాని దోహాలో మంగళవారం ఇరు దేశాల ప్రతినిధులు అత్యవసరంగా సమావేశం కానున్నారు.
**దాడులు.. ప్రతిదాడులు**
జీ7 సమ్మిట్‌ ముగిసిన తర్వాత అమెరికా, ఇరాన్ శాంతి ఒప్పందంపై అగ్రరాజ్య అధినేత డొనాల్డ్ ట్రంప్ సంతకాలు చేయడం, ఆ వెంటనే స్విట్జర్లాండ్‌లో ప్రాథమిక చర్చలు జరగడంతో మధ్యప్రాచ్యంలో శాంతి నెలకొంటుందని అంతా భావించారు. కానీ, ఇంతలోనే హార్మూజ్ జలసంధిలో వాణిజ్య నౌకలపై దాడులు జరగడం పరిస్థితిని మళ్లీ మొదటికి తెచ్చింది. వాణిజ్య నౌకలపై దాడులకు ఇరానే కారణమని ఆరోపిస్తూ ఆ దేశంలోని కీలక డ్రోన్, రాడార్, సైనిక స్థావరాలపై అమెరికా వైమానిక దాడులకు దిగింది. దీనికి దీటుగా బదులిచ్చిన ఇరాన్.. కువైట్, బహ్రాయిన్‌లోని అమెరికా సైనిక స్థావరాలపై క్షిపణుల వర్షం కురిపించింది. ఈ భీకర దాడుల కారణంగా ఇరు పక్షాలు నష్టాలను చవిచూశాయి.
**ఒప్పందాల ఉల్లంఘనపై పరస్పర ఆరోపణలు**
తాజా ఘర్షణల నేపథ్యంలో ఇరు దేశాల నేతలు ఒకరిపై ఒకరు తీవ్ర ఆరోపణలు చేసుకున్నారు. అమెరికా ఉద్దేశపూర్వకంగానే దాడులకు తెగబడి, పరస్పర అవగాహన ఒప్పందాన్ని ఉల్లంఘించిందని ఇరాన్ విదేశాంగ మంత్రి అబ్బాస్ అరాఘ్చీ మండిపడ్డారు. మరోవైపు అమెరికా అధ్యక్షుడు డొనాల్డ్ ట్రంప్ మాత్రం తమ చర్యలను పూర్తిగా సమర్థించుకున్నారు. ఇరాన్ ముందుగా యుద్ధ విరమణ ఒప్పందాన్ని ఉల్లంఘించినందుకే తాము ఆ దేశ రాడార్, క్షిపణి కేంద్రాలపై దాడులు చేయాల్సి వచ్చిందని ఆయన స్పష్టం చేశారు. అయితే, వాణిజ్య నౌకలపై జరిగిన తొలి దాడితో తమకు ఎలాంటి సంబంధం లేదని ఇరాన్ తేల్చిచెప్పింది.
**స్విట్జర్లాండ్ నుంచి ఖతార్‌కు వేదిక మార్పు**
మధ్యప్రాచ్యంలో మళ్లీ యుద్ధ మేఘాలు కమ్ముకోవడంతో ఇరు దేశాలు అప్రమత్తమయ్యాయి. పరిస్థితి మరింత చేజారకముందే సైనిక దాడులను పూర్తిగా నిలిపివేయాలని నిర్ణయించుకున్నాయి. ఈ మేరకు అమెరికాకు చెందిన సీనియర్ అధికారులు సైతం సైనిక చర్యల నిలిపివేతను ధ్రువీకరించారు. హార్మూజ్ జలసంధిలో ఇకపై వాణిజ్య నౌకలు ఎలాంటి ఆటంకాలు లేకుండా స్వేచ్ఛగా ప్రయాణించవచ్చని స్పష్టం చేశారు. వాస్తవానికి ఇరాన్ అణు కార్యక్రమంపై చర్చించేందుకు స్విట్జర్లాండ్‌లో తదుపరి భేటీ జరగాల్సి ఉంది. కానీ, హార్మూజ్ జలసంధి ఉద్రిక్తతల నేపథ్యంలో వేదికను ఖతార్‌కు మార్చారు. మంగళవారం దోహాలో జరగనున్న ఈ సమావేశంలో ప్రధానంగా జలసంధి వివాదం, వాణిజ్య నౌకల భద్రత పైనే ఇరు దేశాలు సుదీర్ఘంగా చర్చలు జరపనున్నాయి.