ఢిల్లీ మహా.
ప్రపంచ సెమీకండక్టర్ పరిశ్రమలో భారత్కు సరికొత్త గుర్తింపును తీసుకువచ్చే మరో కీలక ఘట్టానికి గుజరాత్ వేదికైంది. దేశాన్ని ప్రపంచ సెమీకండక్టర్ తయారీ కేంద్రంగా తీర్చిదిద్దే లక్ష్యంతో గుజరాత్లోని సనంద్లో ఏర్పాటు చేసిన సీజీ సెమీ అవుట్సోర్స్డ్ సెమీకండక్టర్ అసెంబ్లీ అండ్ టెస్ట్ ప్లాంట్ను ప్రధానమంత్రి నరేంద్ర మోదీ శనివారం ప్రారంభించారు. ‘మేక్ ఇన్ ఇండియా’ ఉద్యమంలో ఇది తదుపరి అధ్యాయమని పేర్కొన్న ప్రధాని, దేశీయ ఎలక్ట్రానిక్స్ రంగాన్ని సంపూర్ణ విలువ గొలుసుగా అభివృద్ధి చేయడమే ప్రభుత్వ సంకల్పమని స్పష్టం చేశారు. ప్రపంచ చిప్ సరఫరా వ్యవస్థలో భారత్ను విశ్వసనీయ భాగస్వామిగా నిలబెట్టే దిశగా ఈ ప్లాంట్ కీలక మైలురాయిగా నిలుస్తుందని పేర్కొన్నారు.
చిప్ బై చిప్గా ఎదుగుతున్న భారత్
సెమీకండక్టర్ రంగంలో దేశం వేగంగా ముందుకు సాగుతోందని ప్రధాని మోదీ పేర్కొన్నారు. “స్టెప్ బై స్టెప్… బ్రిక్ బై బ్రిక్… ఇప్పుడు చిప్ బై చిప్గా భారత్ పురోగమిస్తోంది” అని వ్యాఖ్యానించారు. సనంద్ ప్లాంట్ ద్వారా ప్రతి ఏడాది 20 కోట్ల చిప్ల ఉత్పత్తిని లక్ష్యంగా నిర్దేశించామని, ఈ లక్ష్యాన్ని సంస్థ త్వరలోనే చేరుకుంటుందనే పూర్తి విశ్వాసం వ్యక్తం చేశారు. దేశవ్యాప్తంగా వార్షికంగా 50 కోట్ల చిప్ల ఉత్పత్తి సామర్థ్యాన్ని సాధించే దిశగా భారత్ దూసుకెళ్తోందని చెప్పారు.
ఎలక్ట్రానిక్స్ రంగంలో విశేష పురోగతి
గత పదేళ్లలో దేశ ఎలక్ట్రానిక్స్ రంగం అపూర్వమైన వృద్ధిని నమోదు చేసిందని ప్రధాని గుర్తు చేశారు. ప్రస్తుతం ప్రపంచంలో రెండో అతిపెద్ద మొబైల్ తయారీ దేశంగా భారత్ నిలవడమే కాకుండా, మొబైల్ ఎగుమతుల్లో కూడా రెండో స్థానాన్ని సంపాదించిందన్నారు. 2014తో పోలిస్తే దేశీయ ఎలక్ట్రానిక్స్ ఉత్పత్తి ఏడు రెట్లు పెరగ్గా, ఎలక్ట్రానిక్స్ ఎగుమతులు పదకొండు రెట్లు పెరిగినట్లు వివరించారు.
సంస్కరణల ఫలితమే నేటి విజయం
ఎలక్ట్రానిక్స్ రంగంలో కనిపిస్తున్న ఈ విజయాలు ఒక్కరోజులో సాధించినవి కావని ప్రధాని పేర్కొన్నారు. దశాబ్దకాలంగా చేపట్టిన సంస్కరణలు, పారిశ్రామిక విధానాలు, పెట్టుబడుల ప్రోత్సాహం, సాంకేతిక మౌలిక సదుపాయాల విస్తరణ ఫలితంగానే ఈ స్థాయికి చేరుకున్నామని చెప్పారు. తొలుత పూర్తిస్థాయి ఉత్పత్తుల తయారీ, ఆ తర్వాత విడిభాగాల ఉత్పత్తి, ఇప్పుడు సెమీకండక్టర్ల తయారీ దశకు చేరుకోవడం వికసిత్ భారత్ నిర్మాణానికి బలమైన పునాదిగా అభివర్ణించారు.
సనంద్ ప్లాంట్ ప్రస్థానం
సనంద్లోని ఈ సెమీకండక్టర్ అసెంబ్లీ, పరీక్ష కేంద్రానికి 2024లో శంకుస్థాపన జరగ్గా, 2025లో పరీక్షల దశ ప్రారంభమైంది. ఇప్పుడు వాణిజ్యపరంగా పూర్తి స్థాయి కార్యకలాపాలు ప్రారంభమవడం దేశ పారిశ్రామిక చరిత్రలో మరో కీలక ఘట్టమని ప్రధాని పేర్కొన్నారు. ఈ విజయానికి కృషి చేసిన శాస్త్రవేత్తలు, ఇంజినీర్లు, సాంకేతిక నిపుణులు, సంస్థ యాజమాన్యాన్ని ప్రత్యేకంగా అభినందించారు.
అంతర్జాతీయ భాగస్వామ్యానికి నిదర్శనం
ఈ ప్రాజెక్టు భారత్, జపాన్, థాయిలాండ్ దేశాల మధ్య ఏర్పడిన సాంకేతిక సహకారం, పారిశ్రామిక భాగస్వామ్యం, పరస్పర విశ్వాసానికి ప్రతీకగా నిలుస్తుందని ప్రధాని చెప్పారు. అత్యాధునిక సాంకేతికతను దేశీయ పరిశ్రమలతో అనుసంధానం చేస్తూ ప్రపంచ స్థాయి తయారీ సామర్థ్యాన్ని భారత్ పెంచుకుంటోందన్నారు.
దిగుమతుల తగ్గింపు… ఉపాధికి ఊతం
దేశంలోనే అధునాతన చిప్ ప్యాకేజింగ్, పరీక్షా కేంద్రాలు ఏర్పడటం వల్ల విదేశీ సెమీకండక్టర్లపై ఆధారపడటం క్రమంగా తగ్గుతుందని పరిశ్రమ వర్గాలు భావిస్తున్నాయి. ఈ ప్లాంట్ ద్వారా ప్రత్యక్ష, పరోక్షంగా వేలాది ఉపాధి అవకాశాలు ఏర్పడటంతో పాటు అనుబంధ పరిశ్రమలకు కూడా భారీ ప్రోత్సాహం లభించనుంది. ఎలక్ట్రానిక్స్ తయారీ రంగంలో స్వావలంబన సాధించాలన్న కేంద్ర ప్రభుత్వ లక్ష్యానికి ఈ ప్రాజెక్టు మరింత బలం చేకూర్చనుంది.
ప్రపంచ సరఫరా వ్యవస్థలో భారత్కు కీలక స్థానం
ప్రపంచవ్యాప్తంగా సెమీకండక్టర్లకు పెరుగుతున్న డిమాండ్ను దృష్టిలో ఉంచుకుని భారత్ తన తయారీ సామర్థ్యాన్ని వేగంగా విస్తరిస్తోంది. సనంద్లో ప్రారంభమైన ఈ ప్లాంట్ దేశాన్ని కేవలం వినియోగదారుగా కాకుండా, ప్రపంచ చిప్ సరఫరా వ్యవస్థలో కీలక తయారీ కేంద్రంగా నిలబెట్టే దిశగా మరో చారిత్రాత్మక అడుగుగా పరిశ్రమ నిపుణులు అభివర్ణిస్తున్నారు.
