- రూ.9 వేల కోట్ల సరకుకు సురక్షిత రక్షణ.
- కేంద్ర రక్షణ మంత్రి రాజ్నాథ్ సింగ్
విశాఖపట్నం, మహా.
పశ్చిమాసియాలో కొనసాగుతున్న ఉద్రిక్త పరిస్థితుల మధ్య భారత నౌకాదళం దేశ ఆర్థిక ప్రయోజనాలను సమర్థంగా కాపాడిందని కేంద్ర రక్షణ మంత్రి రాజ్నాథ్ సింగ్ వెల్లడించారు. ‘ఆపరేషన్ ఊర్జా సురక్ష’ కింద 18 వాణిజ్య నౌకలకు రక్షణ కల్పించి, సుమారు రూ.9 వేల కోట్ల విలువైన అత్యవసర సరుకును ఎలాంటి ఆటంకాలు లేకుండా సురక్షితంగా భారత్కు చేర్చిందని తెలిపారు. విశాఖపట్నం నావల్ డాక్యార్డ్లో అత్యాధునిక స్టీల్త్ యుద్ధనౌక ఐఎన్ఎస్ మహేంద్రగిరిని శనివారం భారత నౌకాదళంలో అధికారికంగా ప్రవేశపెట్టిన సందర్భంగా ఆయన ఈ విషయాలను వెల్లడించారు.
పశ్చిమాసియాలో యుద్ధ వాతావరణం నెలకొనడంతో సముద్ర వాణిజ్య మార్గాలపై తీవ్ర ప్రభావం పడిన సమయంలో భారత నౌకాదళం అత్యంత వ్యూహాత్మకంగా వ్యవహరించిందని రాజ్నాథ్ సింగ్ పేర్కొన్నారు. సముద్ర మార్గాల్లో ప్రయాణిస్తున్న భారత వాణిజ్య నౌకలకు నిరంతర భద్రత కల్పించడం ద్వారా దేశానికి అత్యవసరమైన ఇంధనం, ఇతర కీలక వస్తువుల సరఫరా నిరాటంకంగా కొనసాగిందన్నారు. యుద్ధ సమయంలో కూడా దేశ ఆర్థిక వ్యవస్థకు ఎలాంటి ఇబ్బందులు తలెత్తకుండా నౌకాదళం సమర్థవంతంగా వ్యవహరించిందని ప్రశంసించారు.
భారత నౌకాదళం కేవలం యుద్ధాల్లో పోరాడే బలగం మాత్రమే కాదని, దేశ ఆర్థిక భద్రతకు కూడా రక్షణ కవచంగా నిలుస్తోందని మంత్రి అన్నారు. ప్రపంచంలో ఎక్కడైనా సంక్షోభ పరిస్థితులు తలెత్తినా భారత ప్రయోజనాలను కాపాడే సామర్థ్యాన్ని నౌకాదళం ఇప్పటికే నిరూపించుకుందని పేర్కొన్నారు. అంతర్జాతీయ సముద్ర వాణిజ్య మార్గాల్లో భారత ఉనికిని మరింత బలోపేతం చేస్తూ ప్రపంచస్థాయి నౌకాదళంగా ఎదుగుతోందని చెప్పారు.
ఈ సందర్భంగా నౌకాదళంలో చేరిన ఐఎన్ఎస్ మహేంద్రగిరి యుద్ధనౌక ప్రాధాన్యాన్ని రాజ్నాథ్ సింగ్ వివరించారు. ప్రాజెక్ట్–17ఏ కింద నిర్మించిన చివరి స్టీల్త్ ఫ్రిగేట్గా ఇది భారత నౌకాదళానికి మరింత శక్తిని చేకూర్చనుందని తెలిపారు. అగాధ సముద్రాల్లో సుదీర్ఘకాలం పాటు కార్యకలాపాలు నిర్వహించే సామర్థ్యం కలిగిన ఈ యుద్ధనౌక భారత సముద్ర ప్రయోజనాలను సమర్థంగా పరిరక్షిస్తుందని చెప్పారు. తీర ప్రాంతాలకు మాత్రమే పరిమితం కాకుండా ప్రపంచ సముద్ర జలాల్లోనూ భారత ఉనికిని మరింత బలోపేతం చేసే శక్తి దీనికి ఉందని పేర్కొన్నారు.
ప్రధాని నరేంద్ర మోదీ ప్రతిపాదించిన ‘మహా సాగర్’ సముద్ర దార్శనికతతో భారత్ ఇండో-పసిఫిక్ ప్రాంతంలో విశ్వసనీయ భాగస్వామిగా ఎదుగుతోందని రాజ్నాథ్ సింగ్ తెలిపారు. సముద్రపు దొంగల నిర్మూలన, విపత్తు సహాయక చర్యలు, యుద్ధ ప్రాంతాల్లో చిక్కుకున్న భారతీయులు, విదేశీయులను సురక్షితంగా తరలించడం వంటి అనేక బాధ్యతలను భారత నౌకాదళం విజయవంతంగా నిర్వర్తిస్తోందని చెప్పారు. అత్యవసర పరిస్థితుల్లో తొలి స్పందనదారుగా భారత నౌకాదళం ప్రపంచవ్యాప్తంగా గుర్తింపు పొందిందని పేర్కొన్నారు.
భారత సాయుధ దళాలు ఆధునిక సాంకేతికతతో మరింత బలోపేతమవుతున్నాయని, దేశ భద్రత విషయంలో రాజీకి తావులేదని రక్షణ మంత్రి స్పష్టం చేశారు. సరిహద్దుల భద్రతతో పాటు సముద్ర భద్రతను కూడా అత్యున్నత ప్రాధాన్యంగా తీసుకుంటున్నామని పేర్కొన్నారు. ఆధునిక యుద్ధనౌకలు, అత్యాధునిక ఆయుధ వ్యవస్థలు, సాంకేతిక పరిజ్ఞానంతో భారత నౌకాదళం ప్రపంచంలోని అత్యంత సమర్థవంతమైన నౌకాదళాల్లో ఒకటిగా ఎదుగుతోందని రాజ్నాథ్ సింగ్ తెలిపారు.
