పశ్చిమాసియాలో యుద్ధ విరామ సంకేతాలు.
* దాడులు నిలిపేసిన అమెరికా, ఇరాన్.
* గల్ఫ్లో ఉద్రిక్తతకు తాత్కాలిక బ్రేక్.
వాషింగ్టన్: మహా.
గత కొన్ని నెలలుగా పశ్చిమాసియాను అగ్నిగుండంలా మార్చిన అమెరికా–ఇరాన్ ఘర్షణల్లో అనూహ్య పరిణామం చోటుచేసుకుంది. వరుస సైనిక దాడులతో పరస్పరం ఎదురుదాడులకు దిగిన రెండు దేశాలు తాజాగా తాత్కాలికంగా వెనక్కి తగ్గడంతో ప్రాంతంలో యుద్ధ విరామ సంకేతాలు కనిపిస్తున్నాయి. అమెరికా తన వైమానిక దాడులను నిలిపివేయగా, గల్ఫ్ దేశాల్లోని అమెరికా సైనిక స్థావరాలపై ప్రతీకార దాడులను తాత్కాలికంగా నిలిపివేస్తున్నట్లు ఇరాన్ అధికారికంగా ప్రకటించింది. దీంతో నెలల తరబడి కొనసాగిన ఉద్రిక్త పరిస్థితులకు తాత్కాలికంగా ఉపశమనం లభించినట్లు కనిపిస్తోంది.
అమెరికా వరుస దాడులకు ప్రతిస్పందనగానే తాము చర్యలు చేపట్టామని, గత రెండు రోజులుగా అమెరికా ఎలాంటి దాడులకు పాల్పడకపోవడంతో ప్రతీకార చర్యలను కూడా నిలిపివేసినట్లు ఇరాన్ మీడియా వెల్లడించింది. తమ వ్యూహం పూర్తిగా ప్రతిస్పందనాత్మకమేనని పేర్కొన్న టెహ్రాన్, అమెరికా మళ్లీ దాడులకు దిగితే తాము కూడా తిరిగి ఎదురుదాడులు ప్రారంభిస్తామని స్పష్టం చేసింది.
అమెరికా అకస్మాత్తుగా సైనిక చర్యలను నిలిపివేయడం వెనుక వ్యూహాత్మక కారణాలు ఉన్నాయని రక్షణ నిపుణులు విశ్లేషిస్తున్నారు. వరుసగా రెండు వారాల పాటు నిర్వహించిన వైమానిక దాడుల కారణంగా పేట్రియాట్ వంటి వైమానిక రక్షణ క్షిపణుల నిల్వలు తగ్గినట్లు సమాచారం. మరోవైపు ఇజ్రాయెల్ ప్రధాని బెంజమిన్ నెతన్యాహు వాషింగ్టన్ పర్యటన నేపథ్యంలో దౌత్య చర్చలకు అవకాశం కల్పించేందుకే అమెరికా అధ్యక్షుడు డొనాల్డ్ ట్రంప్ ఈ తాత్కాలిక విరామానికి మొగ్గుచూపినట్లు అంతర్జాతీయ వర్గాలు అంచనా వేస్తున్నాయి.
అయితే పశ్చిమాసియాలో పరిస్థితులు పూర్తిగా సాధారణ స్థితికి చేరుకున్నాయనడానికి ఇంకా అవకాశం కనిపించడం లేదు. యెమెన్లో ఇరాన్ మద్దతు ఉన్న హౌతీ తిరుగుబాటు దళాలు తమ దాడులను కొనసాగిస్తున్నాయి. సౌదీ అరేబియా సరిహద్దు ప్రాంతాల్లోని ఆరామ్కో చమురు స్థావరాలను లక్ష్యంగా చేసుకుని హౌతీలు వరుస క్షిపణి దాడులకు పాల్పడినట్లు సమాచారం. ఈ దాడులను అడ్డుకునేందుకు సౌదీలో మొహరించిన గ్రీకు రక్షణ దళాలు రెండు బాలిస్టిక్ క్షిపణులతో పాటు ఒక డ్రోన్ను విజయవంతంగా కూల్చివేసినట్లు గ్రీస్ వాయుసేన వర్గాలు వెల్లడించాయి.
అమెరికా–ఇరాన్ మధ్య తాత్కాలికంగా ఉద్రిక్తత తగ్గినప్పటికీ, ప్రాంతీయ మిలీషియా దళాల కార్యకలాపాలు కొనసాగుతుండటంతో పశ్చిమాసియాలో పరిస్థితులు ఇంకా పూర్తిగా ప్రశాంతంగా మారలేదని రక్షణ విశ్లేషకులు అభిప్రాయపడుతున్నారు. దౌత్య చర్చలు ఫలిస్తేనే దీర్ఘకాలిక శాంతికి మార్గం సుగమమవుతుందని, లేదంటే ఎప్పుడైనా మరోసారి ఘర్షణలు చెలరేగే అవకాశం ఉందని హెచ్చరిస్తున్నారు.
