సమ్మక్క సాగర్ నీటిపై హరీశ్ రావు సంచలన ఆరోపణలు.
• 47 టీఎంసీల తెలంగాణ వాటాను ఏపీకి ఇస్తున్నారా?.
• సీఎం రేవంత్ సమాధానం చెప్పాలని డిమాండ్.
హైదరాబాద్, మహా:
సమ్మక్క-సారక్క (సమ్మక్క సాగర్) ప్రాజెక్టుకు సంబంధించిన తెలంగాణ నీటి వాటాపై బీఆర్ఎస్ సీనియర్ నేత, మాజీ మంత్రి హరీశ్ రావు కాంగ్రెస్ ప్రభుత్వంపై తీవ్ర ఆరోపణలు చేశారు. తెలంగాణకు కేటాయించిన 47 టీఎంసీల నీటిని ఆంధ్రప్రదేశ్కు అప్పగించేందుకు రేవంత్ రెడ్డి ప్రభుత్వం సిద్ధమవుతోందంటూ ఆందోళన వ్యక్తం చేశారు. ఈ అంశంపై ముఖ్యమంత్రి వెంటనే ప్రజలకు వివరణ ఇవ్వాలని డిమాండ్ చేశారు.
తెలంగాణ భవన్లో బుధవారం ఏర్పాటు చేసిన మీడియా సమావేశంలో మాట్లాడిన హరీశ్ రావు, ఇటీవల కర్ణాటకలో తెలంగాణ, ఆంధ్రప్రదేశ్, కర్ణాటక ముఖ్యమంత్రుల సమావేశం, తుంగభద్ర గేట్ల ప్రారంభోత్సవం అనంతరం సమ్మక్క సాగర్కు సంబంధించిన తెలంగాణ వాటాను వదులుకునే దిశగా ప్రభుత్వం అడుగులు వేస్తోందనే వార్తలు ప్రచారంలోకి వచ్చాయని అన్నారు. ఈ ప్రచారంపై ప్రభుత్వం ఇప్పటివరకు స్పందించకపోవడం అనుమానాలకు తావిస్తోందని విమర్శించారు.
గోదావరి నదీ యాజమాన్య బోర్డు అజెండాలో సమ్మక్క సాగర్కు 47 టీఎంసీల కేటాయింపు అంశమే లేదని ఆంధ్రప్రదేశ్ ప్రభుత్వం పేర్కొన్నప్పటికీ, తెలంగాణ ప్రభుత్వం మాత్రం మౌనం పాటిస్తోందని హరీశ్ రావు ఆరోపించారు. రాష్ట్ర ప్రయోజనాలకు సంబంధించిన కీలక అంశంలో ప్రభుత్వం స్పష్టత ఇవ్వాల్సిన బాధ్యత ఉందన్నారు.
బీఆర్ఎస్ ప్రభుత్వ హయాంలో సమ్మక్క సాగర్ ప్రాజెక్టుకు అవసరమైన కేంద్ర అనుమతులు, సాంకేతిక ఆమోదాలు సాధించామని ఆయన గుర్తు చేశారు. ఈ ప్రాజెక్టు ద్వారా ఉత్తమ్ కుమార్ రెడ్డి ప్రాతినిధ్యం వహిస్తున్న ప్రాంతాలకు కూడా ప్రయోజనం చేకూరుతుందని పేర్కొంటూ, అలాంటి ప్రాజెక్టు నీటి వాటాను కాంగ్రెస్ ప్రభుత్వం ఎలా వదులుకుంటుందని ప్రశ్నించారు.
ఆంధ్రప్రదేశ్ ముఖ్యమంత్రి చంద్రబాబు నాయుడు తెలంగాణ ప్రాజెక్టులకు ఆటంకాలు సృష్టించే ప్రయత్నాలు చేస్తున్నారని హరీశ్ రావు ఆరోపించారు. తెలంగాణ ప్రాజెక్టులకు వ్యతిరేకంగా కేంద్రానికి లేఖలు రాయడంతో పాటు నదీ యాజమాన్య బోర్డు సమావేశాల్లో గతంలో ఇచ్చిన అనుమతులను రద్దు చేయాలని ఒత్తిడి తీసుకొస్తున్నారని విమర్శించారు.
తెలంగాణ ప్రజలు దీర్ఘకాల పోరాటంతో సాధించుకున్న నీటి హక్కులకు భంగం కలిగించే ఎలాంటి చర్యలనైనా బీఆర్ఎస్ తీవ్రంగా వ్యతిరేకిస్తుందని హరీశ్ రావు స్పష్టం చేశారు. రాష్ట్రానికి చెందాల్సిన ప్రతి చుక్క నీటిని కాపాడేందుకు అవసరమైన అన్ని ప్రజాస్వామ్య పోరాటాలు చేస్తామని హెచ్చరించారు.
అయితే, హరీశ్ రావు చేసిన ఈ ఆరోపణలపై తెలంగాణ ప్రభుత్వం నుంచి అధికారిక స్పందన వెలువడాల్సి ఉంది.
