• జాతీయ సమైక్యతకు ప్రతీకగా నిలిచిన వేడుక.
బెంగళూరు, మహా.
ప్రధానమంత్రి శ్రీ నరేంద్ర మోదీ పిలుపుమేరకు దేశవ్యాప్తంగా జరుగుతున్న దేశభక్తి కార్యక్రమాల్లో భాగంగా, కర్ణాటకలోని బెంగళూరు మల్లేశ్వరం ప్రాంతంలో భారీ ‘తిరంగా ర్యాలీ’ని నిర్వహించారు. ఈ కార్యక్రమంలో కర్ణాటక, తమిళనాడు రాష్ట్రాల భాజపా జాతీయ సహ-ఇన్ఛార్జి, మాజీ ఎమ్మెల్సీ డాక్టర్ పొంగులేటి సుధాకర్ రెడ్డి పాల్గొన్నారు. వేలాది మంది పౌరులు జాతీయ జెండాలను చేతబూని ఈ ర్యాలీలో ఉత్సాహంగా పాల్గొనడంతో బెంగళూరు వీధులన్నీ త్రివర్ణ శోభితంగా మారాయి. జాతీయ సమైక్యత, దేశభక్తి, గర్వాన్ని చాటిచెప్పేలా ప్రజలు ఈ వేడుకలో భాగస్వాములయ్యారు.
దాదాపు 12 కిలోమీటర్ల మేర సాగిన ఈ భారీ ర్యాలీలో మాజీ సైనికులు, విద్యార్థులు, యువత, జేడీఎస్ సభ్యులు, భాజపా కార్యకర్తలు, వివిధ వర్గాల ప్రజలు పెద్దఎత్తున పాల్గొన్నారు. కర్ణాటక రాష్ట్ర భాజపా అధ్యక్షుడు బి.వై. విజయేంద్ర, శాసనసభ ప్రతిపక్ష నేత ఆర్. అశోక, శాసనమండలి ప్రతిపక్ష నేత చలవాది నారాయణస్వామి, మాజీ ఉప ముఖ్యమంత్రి డాక్టర్ సి.ఎన్. అశ్వత్థ నారాయణ, ఎమ్మెల్యే కె. గోపాలయ్య, జిల్లా అధ్యక్షుడు హరీష్ సహా పలువురు ఎన్డీఏ సీనియర్ నాయకులు ఈ కార్యక్రమంలో పాలుపంచుకున్నారు. ఈ సందర్భంగా బి.వై. విజయేంద్ర సభికులను ఉద్దేశించి మాట్లాడుతూ.. ముఖ్యంగా యువతలో దేశభక్తిని పెంపొందించాల్సిన ఆవశ్యకతను నొక్కిచెప్పారు. జాతీయ జెండా కేవలం మన జాతీయ గుర్తింపు మాత్రమే కాదని, ప్రతి భారతీయుడి త్యాగాలు, ఆకాంక్షలు, సామూహిక బాధ్యతకు అది ప్రతీక అని ఆయన ఉద్ఘాటించారు.
ఈ తిరంగా ర్యాలీలో ప్రజల అసాధారణ భాగస్వామ్యం ‘ఏక్ భారత్, శ్రేష్ఠ భారత్’ నిజమైన స్ఫూర్తిని ప్రతిబింబిస్తోందని డాక్టర్ పొంగులేటి సుధాకర్ రెడ్డి అన్నారు. ప్రాంతం, భాష, కులం, రాజకీయ పార్టీలకతీతంగా 140 కోట్ల మంది భారతీయులను త్రివర్ణ పతాకం ఒకే జాతీయ గుర్తింపు కింద ఏకం చేస్తుందని ఆయన పేర్కొన్నారు. జమ్ము కశ్మీర్లో వచ్చిన మార్పులను ప్రస్తావిస్తూ.. నేడు శ్రీనగర్లోని లాల్ చౌక్ భారతదేశ ఐక్యతకు, రాజ్యాంగ సమగ్రతకు ఒక శక్తివంతమైన ప్రతీకగా నిలుస్తోందని ఆయన స్పష్టం చేశారు. ఒకప్పుడు లాల్ చౌక్లో జాతీయ జెండాను ఎగురవేయడం ఒక సవాలుగా ఉండేదని, కానీ నేడు ప్రధాని నరేంద్ర మోదీ, కేంద్ర హోంమంత్రి అమిత్ షాల నిర్ణయాత్మక నాయకత్వంలో పరిస్థితి పూర్తిగా మారిపోయిందని ఆయన కొనియాడారు. ప్రతిపక్ష నేత రాహుల్ గాంధీ సైతం లాల్ చౌక్లో జాతీయ జెండాను ఎగురవేయడమే జమ్మూ కాశ్మీర్లో వాతావరణం ఎంతలా మారిపోయిందో నిరూపిస్తోందని సుధాకర్ రెడ్డి గుర్తుచేశారు. జాతీయ జెండా ప్రాతినిధ్యం వహించే ఐక్యత, త్యాగం, కర్తవ్యం, ‘నేషన్ ఫస్ట్’ అనే స్ఫూర్తిని భావితరాలకు అందించాల్సిన బాధ్యత మనందరిపై ఉందని ఆయన పిలుపునిచ్చారు.
