- ఏడాదిలో 319 బిలియన్ డాలర్ల పెరుగుదల.
- రోజుకు సగటున రూ.7,500 కోట్లకుపైగా.
- స్పేస్ఎక్స్ దూకుడుతో కొత్త శిఖరాలు
న్యూయార్క్,మహా.
ప్రపంచ కుబేరుల్లో అగ్రస్థానంలో కొనసాగుతున్న ఎలాన్ మస్క్ సంపద గత ఏడాది కాలంలో అసాధారణ వేగంతో పెరిగింది. 2025 జూలై నుంచి 2026 జూలై మధ్య ఆయన సంపద ఏకంగా 319.5 బిలియన్ డాలర్లు పెరిగినట్లు తాజా నివేదిక వెల్లడించింది. అంటే ఏడాది వ్యవధిలో సగటున రోజుకు 875 మిలియన్ డాలర్ల మేర సంపద పెరిగినట్టన్నమాట. భారత కరెన్సీలో ఇది రోజుకు సుమారు రూ.7,500 కోట్లకుపైగా.
మస్క్ సంపద ప్రధానంగా టెస్లా, స్పేస్ఎక్స్, కృత్రిమ మేధ సంస్థలతో పాటు ఆయనకు ఉన్న ఇతర వ్యాపార వాటాల విలువపై ఆధారపడి ఉంటుంది. ముఖ్యంగా అంతరిక్ష సంస్థ స్పేస్ఎక్స్ మార్కెట్ విలువలో చోటుచేసుకున్న భారీ పెరుగుదల ఆయన సంపదను ఒక్కసారిగా కొత్త స్థాయికి తీసుకెళ్లింది. ఫోర్బ్స్ ప్రకారం జూలైలో మస్క్ ప్రపంచంలోనే అత్యంత సంపన్నుడిగా కొనసాగారు.
స్పేస్ఎక్స్ దూకుడుతో ట్రిలియన్ దాటిన సంపద
స్పేస్ఎక్స్ ప్రజా మార్కెట్లోకి అడుగుపెట్టడం మస్క్ సంపద పెరుగుదలకు ప్రధాన కారణంగా నిలిచింది. సంస్థ భారీ విలువతో మార్కెట్లోకి ప్రవేశించడంతో మస్క్కు ఉన్న వాటాల విలువ గణనీయంగా పెరిగింది. జూన్ 12న స్పేస్ఎక్స్ ప్రజా సంస్థగా మారిన తర్వాత మస్క్ ప్రపంచంలోనే తొలి ట్రిలియనీర్గా అవతరించినట్లు ఫోర్బ్స్ పేర్కొంది. అప్పట్లో స్పేస్ఎక్స్ ప్రారంభ మార్కెట్ విలువ దాదాపు రెండు ట్రిలియన్ డాలర్లకు చేరింది.
స్పేస్ఎక్స్ షేర్లకు భారీ డిమాండ్ రావడంతో మస్క్ సంపద కొద్ది రోజుల్లోనే అనూహ్యంగా పెరిగింది. ఒక దశలో ఆయన సంపద 1.3 ట్రిలియన్ డాలర్లకుపైగా నమోదైనట్లు బ్లూమ్బర్గ్ ఆధారిత నివేదికలు వెల్లడించాయి. ఒకే రోజులో ఆయన సంపద 164 బిలియన్ డాలర్లు పెరిగిన సందర్భం కూడా నమోదైంది.
అయితే బిలియనీర్ల సంపద అంటే చేతిలో ఉన్న నగదు కాదన్నది గమనించాల్సిన అంశం. కంపెనీల షేర్లు, వాటాల మార్కెట్ విలువ ఆధారంగా నికర సంపద లెక్కిస్తారు. అందువల్ల షేర్ల ధరల్లో హెచ్చుతగ్గులు చోటుచేసుకున్నప్పుడు మస్క్ సంపదలోనూ భారీ మార్పులు కనిపిస్తాయి. స్పేస్ఎక్స్ షేర్లపై అమ్మకాల ఒత్తిడి పెరిగిన తర్వాత ఆయన సంపద కూడా గణనీయంగా తగ్గింది. ఫోర్బ్స్ జూలై 28 నాటి లెక్కల ప్రకారం మస్క్ సంపద 715.6 బిలియన్ డాలర్లుగా నమోదైంది.
మస్క్ తర్వాత మైఖేల్ డెల్
గత ఏడాది కాలంలో సంపదను అత్యధికంగా పెంచుకున్న కుబేరుల జాబితాలో డెల్ టెక్నాలజీస్ వ్యవస్థాపకుడు, అధిపతి మైఖేల్ డెల్ కూడా ముందంజలో నిలిచారు. 2025 జూలై నుంచి 2026 జూలై మధ్య ఆయన సంపద 107.6 బిలియన్ డాలర్లు పెరిగినట్లు తాజా గణాంకాలు సూచిస్తున్నాయి. జూలైలో ప్రపంచ కుబేరుల జాబితాలో మైఖేల్ డెల్ ఐదో స్థానంలో ఉన్నారు.
మైఖేల్ డెల్ సంపదలో డెల్ టెక్నాలజీస్ వాటాలతోపాటు ఆయనకు చెందిన పెట్టుబడుల సంస్థలోని ఆస్తులు కూడా కీలక పాత్ర పోషిస్తున్నాయి. కంపెనీ షేర్ల పనితీరు, సాంకేతిక రంగంలో పెట్టుబడుల పెరుగుదల ఆయన సంపదను గణనీయంగా పెంచాయి.
కాగితాలపై పెరిగే సంపదే అయినా.. రికార్డే
మస్క్ సంపదలో ఏడాదిలో 319.5 బిలియన్ డాలర్ల పెరుగుదల ప్రపంచ కుబేరుల ఆస్తుల పెరుగుదలలోనే అరుదైన స్థాయిగా నిలిచింది. అయితే ఇది ఏడాది కాలంలో ఆయనకు అంత మొత్తంలో నగదు లాభంగా వచ్చిందని అర్థం కాదు. టెస్లా, స్పేస్ఎక్స్ వంటి సంస్థల విలువ పెరగడంతో ఆయన వాటాల విలువ పెరిగిన ఫలితమే ఈ నికర సంపద పెరుగుదల.
అంతరిక్ష రంగం, విద్యుత్ కార్లు, కృత్రిమ మేధ, సాంకేతిక రంగాల్లో మస్క్ వ్యాపార సామ్రాజ్యం విస్తరిస్తుండటంతో.. ఆయా సంస్థల విలువల్లో వచ్చే ప్రతి భారీ మార్పు నేరుగా ఆయన సంపదపై ప్రభావం చూపుతోంది. అందుకే ప్రపంచ కుబేరుల జాబితాలో మస్క్ స్థానం మాత్రమే కాదు.. ఆయన సంపదలోని హెచ్చుతగ్గులు కూడా ప్రపంచ ఆర్థిక వర్గాల్లో ఆసక్తిని రేకెత్తిస్తున్నాయి.
