- 1.76 లక్షల మందికి నోటీసులు!
- 10.85 లక్షల మందితో ముసాయిదా జాబితా
విడుదల. - సెప్టెంబర్ 16 వరకు క్లెయిమ్లు, అభ్యంతరాలకు అవకాశం
ఖమ్మం, మహా.
ఖమ్మం జిల్లాలో ప్రత్యేక సమగ్ర ఓటర్ల జాబితా సవరణ ప్రక్రియ కీలక దశకు చేరుకుంది. భారత ఎన్నికల సంఘం షెడ్యూల్ ప్రకారం సోమవారం ముసాయిదా ఓటర్ల జాబితాను జిల్లా కలెక్టర్ దివాకర టి.ఎస్. విడుదల చేశారు. జిల్లాలో మొత్తం 10,85,927 మంది ఓటర్లతో ముసాయిదా జాబితా రూపొందించినట్లు కలెక్టర్ తెలిపారు. ఇందులో 5,24,894 మంది పురుషులు, 5,60,973 మంది మహిళలు, 60 మంది ఇతర లింగానికి చెందిన ఓటర్లు ఉన్నట్లు వెల్లడించారు.
ముసాయిదా జాబితాలో 1,33,004 మంది ఓటర్లను అనామలీస్గా, మరో 43,131 మంది ఓటర్లను మ్యాపింగ్ కాని ఓటర్లుగా గుర్తించినట్లు కలెక్టర్ తెలిపారు. మొత్తంగా 1,76,135 మంది ఓటర్లకు ఎన్నికల నమోదు అధికారులు నోటీసులు జారీ చేయనున్నట్లు వెల్లడించారు. ఈ నేపథ్యంలో జిల్లాలో ఓటర్ల జాబితాపై రాజకీయ పార్టీలతో పాటు ప్రజల్లోనూ ఆసక్తి నెలకొంది.
రాజకీయ పార్టీలతో కలెక్టర్ కీలక సమావేశం
ముసాయిదా ఓటర్ల జాబితా విడుదల సందర్భంగా జిల్లా కలెక్టర్ దివాకర టి.ఎస్., అదనపు కలెక్టర్ డాక్టర్ పి.శ్రీజతో కలిసి వివిధ రాజకీయ పార్టీల ప్రతినిధులతో సమావేశం నిర్వహించారు. ప్రత్యేక సమగ్ర సవరణ ప్రక్రియ, ముసాయిదా జాబితా, అనామలీస్, మ్యాపింగ్ లేని ఓటర్లు, క్లెయిమ్లు, అభ్యంతరాల స్వీకరణ, పరిష్కార ప్రక్రియపై వారికి వివరించారు.
ఎన్నికల జాబితా సవరణ ప్రక్రియను పారదర్శకంగా నిర్వహించేందుకు రాజకీయ పార్టీలు సహకరించాలని కలెక్టర్ కోరారు. అర్హత కలిగిన ప్రతి ఒక్కరి పేరు ఓటర్ల జాబితాలో ఉండేలా చూడటంతో పాటు, ఓటర్లు తమ వివరాలను స్వయంగా పరిశీలించుకోవాలని సూచించారు.
నోటీసు వస్తే ఆధారాలు సమర్పించాలి
ముసాయిదా జాబితాలోని అనామలీస్, మ్యాపింగ్ కాని ఓటర్లకు నోటీసులు అందనున్న నేపథ్యంలో సంబంధిత ఓటర్లు ఆందోళన చెందాల్సిన అవసరం లేదని అధికారులు సూచించారు. నోటీసులు అందుకున్న వారు భారత ఎన్నికల సంఘం సూచించిన పత్రాల్లో తమ పుట్టిన తేదీ, ఇతర వివరాలకు సంబంధించిన ఆధారాలను సమర్పించాల్సి ఉంటుంది.
ముసాయిదా జాబితాలో పేరు లేకపోయినా లేదా తమ వివరాల్లో ఏదైనా తప్పు ఉన్నా సంబంధిత బూత్ స్థాయి అధికారి, సహాయ ఎన్నికల నమోదు అధికారి లేదా ఎన్నికల నమోదు అధికారిని సంప్రదించాలని కలెక్టర్ సూచించారు.
మీ పేరు ఉందో లేదో ఇప్పుడే చూసుకోండి
ఆగస్టు 17న విడుదల చేసిన ముసాయిదా ఓటర్ల జాబితాలో ప్రతి ఓటరూ తమ పేరు, చిరునామా, ఇతర వివరాలను పరిశీలించుకోవాలని అధికారులు సూచించారు. ఇందుకోసం ఎన్నికల ప్రధాన అధికారి కార్యాలయ వెబ్సైట్ను వినియోగించుకోవచ్చు.
పేరు లేకపోయినా, వివరాల్లో తప్పులు ఉన్నా సెప్టెంబర్ 16, 2026లోగా క్లెయిమ్ లేదా అభ్యంతరం దాఖలు చేసుకునే అవకాశం ఉంది. అర్హత కలిగిన కొత్త ఓటర్లు కూడా ఇదే గడువులో ఫారం-6 ద్వారా నమోదు చేసుకోవచ్చు.
కొత్త ఓటర్లకు అవకాశం
2026 అక్టోబరు 1 నాటికి 18 సంవత్సరాలు నిండే వారు, ఏ శాసనసభ నియోజకవర్గంలోనూ ఓటరుగా నమోదు కాకపోతే ఫారం-6 ద్వారా దరఖాస్తు చేసుకోవచ్చని కలెక్టర్ తెలిపారు. తాజా ఫొటో, వయస్సు ధ్రువీకరణ పత్రం, డిక్లరేషన్ తదితర అవసరమైన పత్రాలను జత చేయాల్సి ఉంటుందని వివరించారు.
చనిపోయిన లేదా ఒకటి కంటే ఎక్కువ చోట్ల నమోదైన ఓటర్లపై అభ్యంతరాలు తెలియజేయడానికి ఫారం-7, మొబైల్ నంబర్ నవీకరణ, చిరునామా మార్పు, ఓటరు గుర్తింపు కార్డులో వివరాల సవరణకు ఫారం-8 వినియోగించుకోవచ్చని తెలిపారు.
అక్టోబర్ 19న తుది జాబితా
ముసాయిదా జాబితాపై ఆగస్టు 17 నుంచి సెప్టెంబర్ 16 వరకు క్లెయిమ్లు, అభ్యంతరాలను స్వీకరిస్తారు. వాటిపై నోటీసుల జారీ, విచారణ, పరిష్కార ప్రక్రియ అక్టోబర్ 15 వరకు కొనసాగుతుంది. అనంతరం అక్టోబర్ 19, 2026న తుది ఓటర్ల జాబితాను ప్రచురించనున్నట్లు కలెక్టర్ దివాకర టి.ఎస్. తెలిపారు.
రాజకీయ పార్టీల ప్రతినిధులు తమ పరిధిలోని ఓటర్లకు ప్రత్యేక సమగ్ర సవరణ ప్రక్రియపై అవగాహన కల్పించాలని, అర్హులైన ప్రతి ఒక్కరూ ఓటరుగా నమోదు కావడంతో పాటు తమ వివరాలు సక్రమంగా ఉన్నాయో లేదో పరిశీలించుకునేలా సహకరించాలని కలెక్టర్ కోరారు.
ఎస్ఐఆర్ ప్రక్రియకు సంబంధించిన సందేహాలు, ఫిర్యాదుల కోసం సంబంధిత ఎన్నికల అధికారులను సంప్రదించడంతో పాటు 1950 టోల్ఫ్రీ నంబర్కు ఫోన్ చేయవచ్చని తెలిపారు.
ఈ సమావేశంలో మునిసిపల్ కమిషనర్ అభిషేక్ అగస్త్య, కల్లూరు సబ్ కలెక్టర్ అజయ్ యాదవ్, ఎస్డీసీ సదానందం, ఆర్డీఓ శ్రీనివాస్, కలెక్టరేట్ ఎన్నికల విభాగం అధికారులు, వివిధ రాజకీయ పార్టీల ప్రతినిధులు పాల్గొన్నారు.
