- మీరాలం చెరువులో వాటర్ స్పోర్ట్స్, ఐ ల్యాండ్
- సీఎం రేవంత్ రెడ్డి కీలక ఆదేశాలు
- మీరాలం చెరువు రూపురేఖలు మార్చేందుకు ప్రభుత్వం కసరత్తు
- సస్పెన్షన్‌ బ్రిడ్జితో పర్యాటక ఆకర్షణగా తీర్చిదిద్దే యోచన
హైదరాబాద్, మహా : హైదరాబాద్ అభివృద్ధిపై ప్రత్యేక దృష్టి సారించిన ముఖ్యమంత్రి రేవంత్‌రెడ్డి గురువారం ఉదయం మీరాలం చెరువును ఆకస్మికంగా పరిశీలించారు. మూసీ రివర్‌ ఫ్రంట్‌ డెవలప్‌మెంట్‌ కార్పొరేషన్‌ లిమిటెడ్‌ ఆధ్వర్యంలో చెరువు పరిసరాల్లో కొనసాగుతున్న అభివృద్ధి పనులను ఆయన స్వయంగా పరిశీలించి, పురోగతిపై అధికారులను అడిగి వివరాలు తెలుసుకున్నారు. భారీ క్రేన్‌పై నుంచి చెరువు పరిసరాలను పరిశీలించిన సీఎం మీరాలం చెరువుపై నిర్మిస్తున్న సస్పెన్షన్‌ బ్రిడ్జిపనులను పరిశీలించారు. వంతెన నిర్మాణంతోపాటు చుట్టుపక్కల చేపడుతున్న మౌలిక వసతుల అభివృద్ధి, భవిష్యత్‌లో అందుబాటులోకి రానున్న సౌకర్యాలపై అధికారులతో చర్చించారు. పనుల్లో నాణ్యతా ప్రమాణాలను తప్పనిసరిగా పాటించాలని, నిర్ణీత గడువులోగా నిర్మాణాలను పూర్తి చేయాలని అధికారులను ఆదేశించారు.
మీరాలం చెరువులోకి మురుగునీరు చేరకుండా పటిష్టమైన చర్యలు చేపట్టాలని ముఖ్యమంత్రి అధికారులకు సూచించారు. చెరువు నుంచి మూసీ నదిలోకివరద నీరు సాఫీగా వెళ్లేలా నాలాను విస్తరించాలని ఆదేశించారు. వర్షాకాలంలో భారీ వర్షాలు కురిసినప్పుడు చెరువులో నీటి నిల్వ, వరద ప్రవాహం కారణంగా ఇబ్బందులు తలెత్తకుండా డ్రైనేజీ వ్యవస్థను మెరుగుపరచాల్సిన అవసరాన్ని అధికారుల దృష్టికి తీసుకెళ్లారు. చెరువును కేవలం నీటి వనరుగా కాకుండా నగర ప్రజలకు ఆహ్లాదకరమైన పర్యాటక, వినోద ప్రాంతంగా అభివృద్ధి చేయాలనే లక్ష్యంతో సీఎం పలు సూచనలు చేశారు. వాటర్ స్పోర్ట్స్‌కు అనువుగా ప్రత్యేక డిజైన్‌ను రూపొందించాలని, మీరాలం చెరువులోని ఐలాండ్‌ను అభివృద్ధి చేయాలని సూచించారు.
సందర్శకులను ఆకర్షించేలా పరిసర ప్రాంతాలను తీర్చిదిద్దడంతోపాటు ప్రజలకు మెరుగైన పబ్లిక్‌ స్పేస్‌లు అందుబాటులోకి తీసుకురావాలని స్పష్టం చేశారు. మీరాలం చెరువుపై నిర్మిస్తున్న సస్పెన్షన్‌ బ్రిడ్జి పూర్తయితే ఈ ప్రాంతానికి ప్రత్యేక ఆకర్షణ ఏర్పడే అవకాశం ఉందని నిపుణులు చెబుతున్నారు. వంతెనతోపాటు చెరువు పరిసరాల అభివృద్ధి పూర్తయితే నగరంలోని మరో కీలక వినోద, పర్యాటక కేంద్రంగా మీరాలం రూపుదిద్దుకునే అవకాశముందని అంటున్నారు. సీఎం ఆకస్మిక తనిఖీతో అధికారులు అప్రమత్తమయ్యారు. నిర్మాణ పనుల పురోగతి, నాణ్యత, గడువులు, భవిష్యత్‌ అభివృద్ధి ప్రణాళికలపై మరింత దృష్టి సారించారు. కాగా, చెరువు అభివృద్ధితోపాటు వరద నీటి నిర్వహణ, పర్యావరణ పరిరక్షణకు ప్రాధాన్యం ఇవ్వాలని ప్రభుత్వం భావిస్తోంది.
