హైదరాబాద్, మహా.
సమకాలీన రాజకీయ ముఖచిత్రంపై విమర్శలు, ప్రతివిమర్శలు త్వరగానే శృతిమించి వ్యక్తిగత శత్రుత్వాలుగా మారుతున్న విషాదకర పరిస్థితులను మనం నిత్యం చూస్తూనే ఉన్నాం. రాజకీయ ప్రత్యర్థులు బద్ధ శత్రువులుగా మారి, ఒకరిపై ఒకరు వ్యక్తిగత కక్ష సాధింపులకు పాల్పడుతున్న ఈ కలుషిత వాతావరణంలో ముఖ్యమంత్రి రేవంత్ రెడ్డి అనుసరిస్తున్న వ్యూహాత్మక శైలి రాజకీయ వర్గాల్లో సరికొత్త చర్చకు దారితీస్తోంది. విశాలమైన దృక్పథంతో, రాజకీయ వైరాన్ని, వ్యక్తిగత సంబంధాలను ఒకే గాటన కట్టకుండా.. రెండింటి మధ్య ఒక స్పష్టమైన, అభేద్యమైన విభజన రేఖను గీయడంలో ఆయన ప్రదర్శిస్తున్న వైఖరి రాజకీయ పండితులను సైతం ఆశ్చర్యపరుస్తోంది. ఇటీవల తన కుటుంబాన్ని లక్ష్యంగా చేసుకుని విమర్శలు చేసిన కొండా సురేఖ.. రాఖీ పండుగ నాడు వచ్చినప్పుడు రేవంత్ రెడ్డి అత్యంత ఆప్యాయంగా, ఒక సోదరుడిలా వ్యవహరించిన తీరు ఆయన రాజకీయ, వ్యక్తిగత పరిపక్వతకు నిలువెత్తు అద్దం పడుతోంది.
సాధారణంగా రాజకీయాల్లో ఒకరు మనపై లేదా మన కుటుంబంపై విమర్శలు చేస్తే, వారిని బద్ధ శత్రువులుగా పరిగణించడం, అవకాశం దొరికినప్పుడల్లా వారిని దెబ్బతీయాలని చూడటం ఆనవాయితీగా వస్తోంది. కానీ రేవంత్ రెడ్డి ఈ మూస ధోరణిని బద్దలు కొట్టారు. కేసీఆర్ లాంటి అత్యంత బలమైన, వ్యూహాత్మక నేతలతో సైద్ధాంతికంగా, రాజకీయంగా అలుపెరగని పోరాటం చేసిన రేవంత్.. ఆ పోరును ఎన్నడూ సంకుచితమైన వ్యక్తిగత ద్వేషంగా మలచుకోలేదు. ఒక నాయకుడిగా తనపై వచ్చే ప్రతి విమర్శకూ మైకు పట్టుకుని కౌంటర్ ఇవ్వాల్సిన అవసరం లేదని, కొన్నింటిని వ్యూహాత్మక మౌనంతో, మరికొన్నింటిని సంస్థాగత క్రమశిక్షణా చర్యలతో ఎదుర్కోవాలన్నదే ఆయన విధానంగా కనిపిస్తోంది. సొంత పార్టీలో అసమ్మతి స్వరం వినిపించినా, విపక్షాలు హద్దులు దాటి దూషణలకు దిగినా.. వాటిని వ్యక్తిగత కక్షగా తీసుకోకుండా పార్టీ అధిష్ఠానం పరిధిలోకి నెట్టేసి, తాను మాత్రం పాలనపై, రాజకీయ వ్యూహాలపైన మాత్రమే దృష్టి సారించడం ఆయన శైలిలోని అత్యంత సూక్ష్మమైన, బలమైన కోణం.
ఇక ప్రస్తుత రాజకీయాల్లో సానుభూతి కోసం పాకులాడే నేతలు కోకొల్లలు. చిన్నపాటి విమర్శ రాగానే తామెదో బాధితులమైపోయినట్లు ప్రజల ముందుకు వచ్చి కన్నీళ్లు పెట్టుకుని సానుభూతి ఓట్లు దండుకోవాలని చూసే నాయకుల మధ్య, రేవంత్ రెడ్డి పంథా పూర్తిగా భిన్నమైనది. ఆయన రాజకీయ శైలి ఎన్నడూ సానుభూతి నినాదాల చుట్టూ తిరగదు. ఆధిపత్యాన్ని చాటుకునే క్రమంలో తన స్థానాన్ని, అధికారాన్ని కేవలం వ్యూహాత్మక అడుగుల ద్వారానే పదిలపరుచుకునే ప్రయత్నం చేస్తారు. భావోద్వేగాలను పూర్తిస్థాయిలో అదుపులో ఉంచుకుని, ఏ వేదికపై ఎలా ప్రవర్తించాలో, ఎవరితో ఎలా మెలగాలో స్పష్టమైన అవగాహనతో ముందుకు సాగుతున్నారు. ప్రత్యర్థి నుంచి వచ్చే రాయిని తిరిగి వాళ్లపైకే విసరడం కంటే, ఆ రాయితోనే తన పునాదిని మరింత బలోపేతం చేసుకోవడం తెలిసిన రాజకీయ దురంధరుడిగా ఆయన ఎదుగుతున్నారు.
పద్మవ్యూహం లాంటి రాష్ట్ర రాజకీయాల్లో.. ఒకవైపు ప్రతిపక్షాల వ్యూహాలు, మరోవైపు అంతర్గత సవాళ్లను ఎదుర్కొంటూనే తన ఇమేజ్‌ను కాపాడుకోవడం, ప్రభుత్వంలో సుస్థిరతను తీసుకురావడం కత్తిమీద సామే. ఈ సవాళ్లను అధిగమిస్తూ, పొలిటికల్ మైండ్ గేమ్‌ను అత్యంత సమర్థవంతంగా నడిపిస్తున్నారు. దూకుడుకు మంచితనాన్ని జోడించి, కక్ష సాధింపులకు దూరంగా ఉండటమే ఆయన విజయ రహస్యం. కొండా సురేఖ రాఖీ కట్టే దృశ్యం కేవలం ఒక పండుగ వేడుక కాదు, అది రేవంత్ రెడ్డి రాజకీయ తత్వానికి ప్రతీక. ప్రత్యర్థులను రాజకీయ రణరంగంలో దీటుగా ఎదుర్కొంటూనే, వ్యక్తిగతంగా హుందాతనాన్ని, మానవీయతను ప్రదర్శించడం ద్వారా తెలంగాణ రాజకీయ చరిత్రలో రేవంత్ రెడ్డి ఒక సరికొత్త, ఆరోగ్యకరమైన అధ్యాయానికి శ్రీకారం చుట్టారని నిస్సందేహంగా చెప్పవచ్చు.
