• ‘మన్‌ కీ బాత్‌’లో మహిళా సాధికారతపై మోదీ ప్రశంసలు.
• పీఎం స్వనిధి లబ్ధిదారుల్లో 46 శాతం మంది మహిళలే.
ఢిల్లీ, మహా.
దేశ యువతుల కలలు భూమి హద్దులను దాటి అంతరిక్షం వైపు దూసుకెళ్తున్నాయని ప్రధాని నరేంద్ర మోదీ అన్నారు. మిషన్‌ శక్తిశాట్‌ ద్వారా ప్రపంచవ్యాప్తంగా వేలాది మంది బాలికలను అంతరిక్ష సాంకేతికతతో అనుసంధానిస్తున్నామని తెలిపారు. ఆదివారం ప్రసారమైన 137వ ‘మన్‌ కీ బాత్‌’ కార్యక్రమంలో మహిళా సాధికారత, అంతరిక్ష రంగంలో యువతుల భాగస్వామ్యం, దేశభక్తి, మాదకద్రవ్యాల నిర్మూలన, పరిశుభ్రత వంటి పలు అంశాలను ప్రస్తావించారు.
మిషన్‌ శక్తిశాట్‌ ద్వారా 108 దేశాలకు చెందిన సుమారు 12 వేల మంది విద్యార్థినులకు ఉపగ్రహ సాంకేతికత, అంతరిక్ష ఆవిష్కరణలపై అవగాహన, నైపుణ్యాలు పెంపొందించుకునే అవకాశం లభిస్తోందని మోదీ చెప్పారు. అంతరిక్ష రంగంలో మహిళలు, బాలికలు సాధిస్తున్న పురోగతి దేశానికి గర్వకారణమని పేర్కొన్నారు.
మహిళలకు స్వనిధితో ఆర్థిక బలం
దేశ ఆర్థిక వ్యవస్థలో మహిళల పాత్ర వేగంగా పెరుగుతోందని ప్రధాని తెలిపారు. వీధి వ్యాపారులు, చిన్న వ్యాపారాలు నిర్వహించే మహిళలకు పీఎం స్వనిధి పథకం ఆర్థికంగా అండగా నిలుస్తోందన్నారు. ఈ పథకం లబ్ధిదారుల్లో దాదాపు 46 శాతం మంది మహిళలేనని, దేశవ్యాప్తంగా సుమారు 35 లక్షల మంది మహిళలు దీని ద్వారా తమ వ్యాపారాలను అభివృద్ధి చేసుకుంటున్నారని చెప్పారు.
ఉత్తర్‌ప్రదేశ్‌లోని గాజియాబాద్‌కు చెందిన బబితా శర్మను ఇందుకు ఉదాహరణగా మోదీ ప్రస్తావించారు. పూజా సామగ్రి విక్రయించే చిన్న స్టాల్‌ నిర్వహించే ఆమెకు పీఎం స్వనిధి ద్వారా ఆర్థిక సహాయం అందడంతో వ్యాపారాన్ని ముందుకు తీసుకెళ్లగలిగారని తెలిపారు.
విదేశాల్లోనూ రెపరెపలాడిన త్రివర్ణం
దేశవ్యాప్తంగా పెరుగుతున్న దేశభక్తి స్ఫూర్తిని మోదీ ప్రస్తావించారు. హర్‌ ఘర్‌ తిరంగా కార్యక్రమం ఈ భావనను మరింత బలోపేతం చేసిందన్నారు. ఆగస్టు నెలలో జాతీయ చేనేత దినోత్సవం, క్విట్‌ ఇండియా ఉద్యమ వార్షికోత్సవం, స్వాతంత్య్ర దినోత్సవం, జాతీయ అంతరిక్ష దినోత్సవం వంటి సందర్భాలు దేశ ప్రజల్లో గర్వభావాన్ని పెంచాయని చెప్పారు.
విదేశాల్లోనూ భారత త్రివర్ణ పతాకం ఘనంగా ఎగిరిందని తెలిపారు. ఫిజీ రాజధాని సువాతో పాటు ఆసియా, ఆఫ్రికా, ఐరోపా దేశాల్లోని భారత రాయబార కార్యాలయాలు, అమెరికాలోనూ త్రివర్ణ పతాకం రెపరెపలాడిందని మోదీ పేర్కొన్నారు. వందేమాతరం 150వ వార్షికోత్సవం ఈ ఏడాదికి మరింత ప్రత్యేకతను తీసుకొచ్చిందన్నారు.
డ్రగ్స్‌కు దూరంగా యువత
భారత్‌ను మాదకద్రవ్యాల రహిత దేశంగా మార్చేందుకు ప్రజలంతా కలిసి పనిచేయాలని ప్రధాని పిలుపునిచ్చారు. డ్రగ్స్‌ వ్యసనం ఒక వ్యక్తి జీవితాన్నే కాకుండా కుటుంబం, సమాజంపై కూడా తీవ్ర ప్రభావం చూపుతుందని చెప్పారు. ‘వికసిత్‌ భారత్‌ కోసం నషా ముక్త్‌ యువ’ ప్రచారం దేశవ్యాప్తంగా వేగం పుంజుకుంటోందన్నారు.
దేశ యువత ఆరోగ్యంగా, ఆనందంగా, ఉజ్వల భవిష్యత్తుతో ముందుకు సాగేందుకు మాదకద్రవ్యాల నిర్మూలన ప్రతి ఒక్కరి బాధ్యతగా మారాలని మోదీ అన్నారు. యువతను ఈ ప్రమాదం నుంచి కాపాడేందుకు కుటుంబాలు, విద్యాసంస్థలు, సమాజం సమష్టిగా కృషి చేయాలని సూచించారు.
అమర్‌నాథ్‌ యాత్రలో పరిశుభ్రతకు ప్రశంస
ఈ ఏడాది అమర్‌నాథ్‌ యాత్రలో పరిశుభ్రత, ప్రజా భాగస్వామ్యానికి సంబంధించిన మంచి ఉదాహరణలు కనిపించాయని ప్రధాని తెలిపారు. క్లిష్టమైన మార్గాల్లో వేలాది మంది పారిశుధ్య కార్మికులు రేయింబవళ్లు సేవలందించారని చెప్పారు. యాత్ర సందర్భంగా 400 మెట్రిక్‌ టన్నులకు పైగా వ్యర్థాలను సేకరించి శుద్ధి చేసినట్లు పేర్కొన్నారు.
యాత్రికులు కూడా పరిశుభ్రత కార్యక్రమంలో చురుగ్గా పాల్గొన్నారని, 16 వేల మందికి పైగా పరిశుభ్రత ప్రమాణం చేశారని తెలిపారు. పరిశుభ్రతను ప్రతి పౌరుడి వ్యక్తిగత బాధ్యతగా మార్చుకుంటే పరిసరాలే కాకుండా ఒక ప్రాంతం మొత్తం రూపురేఖలు మారిపోతాయని మోదీ అన్నారు.
ఏఐతో చరిత్రకు కొత్త రూపం
ముంబైకి చెందిన కృష్ణ శేషాద్రి రూపొందించిన ‘భారత్‌రాజ్య’ వెబ్‌సైట్‌ను కూడా మోదీ ప్రస్తావించారు. కోడింగ్‌ పరిజ్ఞానం లేకపోయినా ఆర్టిఫిషియల్‌ ఇంటెలిజెన్స్‌ సాయంతో భారత చరిత్రను డిజిటల్‌ రూపంలో అందుబాటులోకి తీసుకురావడం అభినందనీయమని పేర్కొన్నారు.
వెబ్‌సైట్‌లో ఒక సంవత్సరం ఎంచుకుంటే ఆ సమయంలో భారతదేశంలోని వివిధ ప్రాంతాలను ఎవరు పాలించారో తెలుసుకునే అవకాశం ఉందని మోదీ వివరించారు. సాంకేతికతను సృజనాత్మకంగా ఉపయోగించి చరిత్రను యువతకు ఆసక్తికరంగా చేరువ చేయడం మంచి ప్రయత్నమని ఆయన అభినందించారు.
