- నా గౌరవం నాకుంటుంది.
- ప్లానింగ్‌ కమిషన్‌ పదవి ‘టిల్‌ ఫర్దర్‌ ఆర్డర్‌’తో ఇచ్చారు.
- సీఎంను కలవాలని ప్రయత్నించలేదు.
- కాంగ్రెస్‌ సీనియర్ నేత, మాజీ మంత్రి డాక్టర్‌ జి. చిన్నారెడ్డి.
హైదరాబాద్‌, మహా:
తెలంగాణ రాజకీయాల్లో కీలక పరిణామాల నేపథ్యంలో రాష్ట్ర ప్రణాళికా సంఘం ఉపాధ్యక్ష పదవి నుంచి తొలగింపుపై కాంగ్రెస్‌ సీనియర్ నేత, మాజీ మంత్రి డాక్టర్‌ జి. చిన్నారెడ్డి స్పందించారు. తనకు పదవులపై ఎలాంటి మోజు లేదని స్పష్టం చేశారు. పదవి ఉన్నా.. లేకున్నా తన గౌరవం తనకు ఉంటుందని పేర్కొన్నారు. ‘‘నాకు పదవులపై సోకు లేదు. పదవి ఉన్నప్పుడే ప్రొటోకాల్‌ను వదులుకున్నా’’ అని వ్యాఖ్యానించారు.
చిన్నారెడ్డి నియామకాన్ని రద్దు చేస్తూ ప్రభుత్వం గురువారం ఉత్తర్వులు జారీ చేసింది. ఆయన స్థానంలో మాజీ జీహెచ్‌ఎంసీ మేయర్‌, మాజీ రాష్ట్ర మహిళా కమిషన్‌ చైర్‌పర్సన్‌ గద్వాల విజయలక్ష్మిని రాష్ట్ర ప్రణాళికా బోర్డు వైస్‌ చైర్‌పర్సన్‌గా నియమించింది. ఆమెకు కేబినెట్‌ హోదా కల్పించినట్లు ప్రభుత్వ ఉత్తర్వుల్లో పేర్కొన్నట్లు పలు నివేదికలు వెల్లడించాయి.
‘టిల్‌ ఫర్దర్‌ ఆర్డర్‌’తోనే పదవి ఇచ్చారు
తనకు ప్రణాళికా సంఘం పదవి శాశ్వతంగా కాదన్న భావనను చిన్నారెడ్డి తన వ్యాఖ్యల ద్వారా స్పష్టం చేశారు. ‘‘నాకు ప్లానింగ్‌ కమిషన్‌ పదవి టిల్‌ ఫర్దర్‌ ఆర్డర్‌ అని ఇచ్చారు’’ అని తెలిపారు. పదవులు రావడం, పోవడం రాజకీయ జీవితంలో సహజమేనన్న ధోరణిని ఆయన ప్రదర్శించారు.
2024 ఫిబ్రవరిలో రేవంత్‌రెడ్డి ప్రభుత్వం చిన్నారెడ్డిని తెలంగాణ ప్రణాళికా సంఘం ఉపాధ్యక్షుడిగా నియమించింది. ఆ సమయంలో ఆయనకు కేబినెట్‌ హోదా కల్పించారు.
‘సీఎంను కలవాలని ప్రయత్నించలేదు’
తాజా పరిణామాల నేపథ్యంలో ముఖ్యమంత్రి రేవంత్‌రెడ్డిని కలిసేందుకు తాను ప్రయత్నించలేదని చిన్నారెడ్డి స్పష్టం చేశారు. తన పదవి విషయంలో వ్యక్తిగతంగా ఎవరినీ కలవాల్సిన అవసరం తనకు లేదన్న సంకేతాన్ని ఇచ్చారు. ‘‘సీఎంను కలవాలనే ప్రయత్నం చేయలేదు’’ అని పేర్కొన్నారు.
పదవిలో ఉన్న సమయంలోనే ప్రొటోకాల్‌కు దూరంగా ఉన్నానని గుర్తుచేస్తూ.. అధికార హోదా తన వ్యక్తిత్వాన్ని నిర్ణయించదని ఆయన వ్యాఖ్యానించారు. ‘‘పదవి ఉన్నా.. లేకున్నా నా గౌరవం నాకుంటుంది’’ అని తేల్చిచెప్పారు.
