- మహిళా ఎమ్మెల్యేలపై దురుసు ప్రవర్తనపై సీరియస్‌.
- సభలో సభ్యులు తప్పు చేస్తే స్పీకరే చర్యలు తీసుకోవాలి: తెలంగాణ హైకోర్టు
హైదరాబాద్‌: మహా.
తెలంగాణ అసెంబ్లీ సమావేశాల తొలిరోజు అసెంబ్లీ ప్రధాన గేటు వద్ద చోటుచేసుకున్న ఉద్రిక్తతలు, పోలీసుల తీరుపై వివాదం ముదిరిన నేపథ్యంలో తెలంగాణ హైకోర్టు జోక్యం చేసుకుంది. శాసనసభ, శాసనమండలి సమావేశాలకు హాజరయ్యే ఎమ్మెల్యేలు, ఎమ్మెల్సీలను పోలీసులు అడ్డుకోవడానికి వీల్లేదని స్పష్టం చేసింది. ప్రజాప్రతినిధులు తమ విధులకు హాజరవుతున్న సమయంలో పోలీసుల జోక్యం సరికాదని తేల్చిచెప్పింది.
బీఆర్‌ఎస్‌ ఎమ్మెల్యేలు అత్యవసరంగా హైకోర్టును ఆశ్రయించడంతో ఈ పిటిషన్‌పై ధర్మాసనం విచారణ చేపట్టింది. అసెంబ్లీ, మండలి సమావేశాలకు హాజరయ్యే ప్రజాప్రతినిధులను పోలీసులు అడ్డుకోరాదని కోర్టు స్పష్టం చేసినట్లు సమాచారం. శాసనసభ్యులు సభకు హాజరయ్యే హక్కును పోలీసులు తమ చర్యల ద్వారా నిరోధించకూడదని పేర్కొంది.
సభలో సభ్యులు ఏదైనా నిబంధన ఉల్లంఘిస్తే వారిపై చర్యలు తీసుకునే అధికారం స్పీకర్‌కు మాత్రమే ఉంటుందని హైకోర్టు స్పష్టం చేసింది. శాసనసభ్యులపై పోలీసులు స్వయంగా చర్యలు తీసుకునే అధికారం లేదని పేర్కొన్నట్లు సమాచారం. సభా వ్యవహారాలు, సభ్యుల ప్రవర్తనకు సంబంధించిన అంశాల్లో శాసనసభా నియమాలు, స్పీకర్‌ అధికారాలే కీలకమని ధర్మాసనం స్పష్టం చేసింది.
అసెంబ్లీ సమావేశాల తొలిరోజు బీఆర్‌ఎస్‌ ఎమ్మెల్యేలు, ఎమ్మెల్సీలు నల్ల టీషర్టులు ధరించి అసెంబ్లీకి వచ్చిన సమయంలో ఉద్రిక్తత చోటుచేసుకుంది. నినాదాలతో కూడిన టీషర్టులతో అసెంబ్లీ ప్రాంగణంలోకి వెళ్లేందుకు పోలీసులు అభ్యంతరం వ్యక్తం చేయడంతో ఇరువర్గాల మధ్య వాగ్వాదం, తోపులాట జరిగింది. పలువురు బీఆర్‌ఎస్‌ ప్రజాప్రతినిధులను పోలీసులు అదుపులోకి తీసుకున్నారు. ఈ పరిణామాలపై బీఆర్‌ఎస్‌ ఎమ్మెల్యేలు హైకోర్టును ఆశ్రయించారు.
మహిళా ఎమ్మెల్యేలపై ఘటనపై తీవ్ర ఆగ్రహం
నిరసనల సందర్భంగా మహిళా ఎమ్మెల్యేల పట్ల పోలీసులు దురుసుగా వ్యవహరించారన్న ఆరోపణలను హైకోర్టు తీవ్రంగా పరిగణించింది. మహిళా ప్రజాప్రతినిధులపై దాడి లేదా అనుచితంగా ప్రవర్తించిన పోలీసు సిబ్బందిని గుర్తించాలని ఆదేశించింది. బాధ్యులైన పోలీసులపై కఠిన చర్యలు తీసుకోవాలని డీజీపీ సీవీ ఆనంద్‌ను ఆదేశించినట్లు సమాచారం.
మహిళా ఎమ్మెల్యేలపై పోలీసుల ప్రవర్తనకు సంబంధించిన అంశంపై ప్రభుత్వం పూర్తి వివరాలతో కౌంటర్‌ దాఖలు చేయాలని ధర్మాసనం ఆదేశించింది. ఘటనకు సంబంధించిన వివరాలను కోర్టు ముందుంచాలని ప్రభుత్వ తరఫు న్యాయవాదికి నోటీసులు జారీ చేసింది.
ప్రజాప్రతినిధుల విధులకు ఆటంకం కలిగించే విధంగా పోలీసులు వ్యవహరించకూడదని కోర్టు స్పష్టం చేసిన నేపథ్యంలో అసెంబ్లీ పరిసరాల్లో జరిగిన పరిణామాలపై రాజకీయంగా మరింత చర్చ మొదలైంది. సభకు వెళ్లే ఎమ్మెల్యేలు, ఎమ్మెల్సీల విషయంలో పోలీసుల పాత్ర, శాసనసభ స్పీకర్‌ అధికారాలపై హైకోర్టు చేసిన వ్యాఖ్యలు ప్రాధాన్యం సంతరించుకున్నాయి.
ఇరువైపుల వాదనలు విన్న అనంతరం ఈ కేసు తదుపరి విచారణను రెండు వారాలకు వాయిదా వేసింది. అప్పటిలోగా ప్రభుత్వం ఘటనకు సంబంధించిన పూర్తి వివరాలను కోర్టుకు సమర్పించాల్సి ఉంటుంది.
అసెంబ్లీ సమావేశాల తొలిరోజే బీఆర్‌ఎస్‌ ప్రజాప్రతినిధులు, పోలీసుల మధ్య చోటుచేసుకున్న వివాదం రాజకీయ దుమారం రేపగా.. తాజాగా హైకోర్టు జోక్యంతో వ్యవహారం న్యాయస్థానం పరిధిలోకి వెళ్లింది. ఎమ్మెల్యేలు, ఎమ్మెల్సీలను సభకు హాజరుకాకుండా పోలీసులు అడ్డుకోవడంపై కోర్టు స్పష్టమైన వైఖరి వ్యక్తం చేయడం, మహిళా ఎమ్మెల్యేలపై దురుసు ప్రవర్తనకు పాల్పడిన పోలీసులపై చర్యలు తీసుకోవాలని ఆదేశించడం ఈ కేసులో కీలక పరిణామంగా మారింది.
