- ‘వికసిత భారత్ 2047’లో భాగస్వాములు కావాలి.
- అస్సాం–తమిళనాడు మధ్య భాషా, సాహిత్య బంధం మరింత బలపడాలి.
- ఉపరాష్ట్రపతి రాధాకృష్ణన్‌ .
గువహాటి,మహా.
ఈశాన్య భారతదేశంలో అత్యంత ప్రాచీనమైన గువహాటి విశ్వవిద్యాలయంలో రూ.110 కోట్ల వ్యయంతో చేపట్టనున్న వివిధ మౌలిక వసతుల అభివృద్ధి పనులకు ఉపరాష్ట్రపతి సీ.పీ. రాధాకృష్ణన్‌ సోమవారం శంకుస్థాపన చేశారు. విశ్వవిద్యాలయంలో కొత్త బహుళశాఖల విద్యా భవనం, బాలురతో పాటు విదేశీ విద్యార్థుల కోసం నూతన వసతి గృహం, ఆడిటోరియం నిర్మాణం, గ్రంథాలయ ఆధునీకరణ వంటి పనులు ఈ ప్రాజెక్టులో భాగంగా చేపట్టనున్నారు.
ఈ సందర్భంగా మాట్లాడిన ఉపరాష్ట్రపతి.. గువహాటి విశ్వవిద్యాలయం ఈశాన్య భారతదేశంలో విద్యా రంగానికి అందిస్తున్న సేవలను ప్రశంసించారు. విశ్వవిద్యాలయ అభివృద్ధికి చేపడుతున్న మౌలిక వసతుల ప్రాజెక్టులు విద్యార్థులకు మరింత మెరుగైన విద్యా వాతావరణాన్ని కల్పిస్తాయని పేర్కొన్నారు.
ప్రజా ఉద్యమం నుంచి ఆవిర్భవించిన విశ్వవిద్యాలయం
గువహాటి విశ్వవిద్యాలయ ఆవిర్భావ చరిత్రను ఉపరాష్ట్రపతి ఈ సందర్భంగా గుర్తుచేశారు. గోపీనాథ్‌ బోర్డోలోయ్‌ నాయకత్వంలో సాగిన ప్రజా ఉద్యమం ఫలితంగా 1948లో ఈ విశ్వవిద్యాలయం ఏర్పడిందని తెలిపారు. ఈశాన్య రాష్ట్రాల్లో ఏర్పాటైన తొలి విశ్వవిద్యాలయంగా గువహాటి విశ్వవిద్యాలయానికి ప్రత్యేక గుర్తింపు ఉందన్నారు.
విశ్వవిద్యాలయం జాతీయ స్థాయిలో సాధిస్తున్న ప్రగతిని కూడా రాధాకృష్ణన్‌ ప్రశంసించారు. జాతీయ మదింపు, గుర్తింపు మండలి నుంచి ఏ ప్లస్‌ గుర్తింపు పొందడం, జాతీయ సంస్థాగత ర్యాంకింగ్స్‌లో రాష్ట్ర ప్రభుత్వ విశ్వవిద్యాలయాల విభాగంలో 9వ స్థానంలో నిలవడం అభినందనీయమన్నారు.
భాషలు.. సంస్కృతులకు వారధులు
భాషలు కేవలం సంభాషణకు మాత్రమే కాకుండా నాగరికత, సంస్కృతి, చరిత్ర, జ్ఞానాన్ని తరతరాలకు అందించే వాహకాలుగా పనిచేస్తాయని ఉపరాష్ట్రపతి పేర్కొన్నారు. అస్సామీ, తమిళ సాహిత్య రచనలను పరస్పరం అనువదించుకునే ప్రయత్నాలను ఆయన స్వాగతించారు.
అస్సాం, తమిళనాడు మధ్య సాహిత్య, సాంస్కృతిక మార్పిడి మరింత విస్తరించాలని ఆకాంక్షించారు. భిన్న భాషలు, ప్రాంతాలు, సంస్కృతుల మధ్య పరస్పర అవగాహన పెంపొందించడంలో విశ్వవిద్యాలయాలు కీలక పాత్ర పోషించాలని సూచించారు.
ఉన్నత విద్యలో మహిళల భాగస్వామ్యం పెరుగుతోంది
దేశంలో మహిళల ఉన్నత విద్యా ప్రవేశాలు గణనీయంగా పెరుగుతున్నాయని రాధాకృష్ణన్‌ తెలిపారు. 2014-15లో 1.57 కోట్లుగా ఉన్న మహిళల ఉన్నత విద్యా ప్రవేశాలు 2023-24 నాటికి 2.24 కోట్లకు చేరాయని పేర్కొన్నారు. ఇది 42.2 శాతం పెరుగుదల అని తెలిపారు.
విద్యలో మహిళల భాగస్వామ్యం పెరగడం దేశంలో మహిళా సాధికారతకు నిదర్శనమని అన్నారు. ఉన్నత విద్యలో మరింత మంది మహిళలు ప్రవేశించేలా అవకాశాలను విస్తరించాల్సిన అవసరం ఉందని సూచించారు.
‘వికసిత భారత్ 2047’లో యువత కీలకం
భారతదేశాన్ని 2047 నాటికి అభివృద్ధి చెందిన దేశంగా తీర్చిదిద్దే లక్ష్యంలో విద్యార్థులు, యువత కీలక భాగస్వాములు కావాలని ఉపరాష్ట్రపతి పిలుపునిచ్చారు. విద్యతో పాటు నైపుణ్యాలు, క్రమశిక్షణ, దేశభక్తి, సామాజిక బాధ్యతలను అలవర్చుకోవాలని సూచించారు.
ఈ సందర్భంగా స్వామి వివేకానంద ఇచ్చిన స్ఫూర్తిదాయక పిలుపును రాధాకృష్ణన్‌ గుర్తుచేశారు. లక్ష్యాన్ని నిర్దేశించుకుని దానిని సాధించే వరకు పట్టుదలతో ముందుకు సాగాలని విద్యార్థులకు సూచించారు.
మత్తు పదార్థాలకు దూరంగా ఉండాలి
యువతను మత్తు పదార్థాల బారిన పడకుండా కాపాడాల్సిన బాధ్యత సమాజంపై ఉందని ఉపరాష్ట్రపతి పేర్కొన్నారు. ఈ సందర్భంగా విద్యార్థులతో మత్తు పదార్థాలకు దూరంగా ఉంటామంటూ ప్రతిజ్ఞ చేయించారు.
యువత తమ శక్తి, ప్రతిభను దేశ నిర్మాణానికి వినియోగించాలని సూచించారు. విద్య, విజ్ఞానం, నైపుణ్యాలతో భవిష్యత్తును తీర్చిదిద్దుకోవాలని పిలుపునిచ్చారు.
పుస్తకాల ఆవిష్కరణ
ఈ కార్యక్రమంలో భాగంగా భూపేన్‌ హజారికా శతజయంతి సందర్భంగా రూపొందించిన ‘భూపేన్‌ హజారికా: హండ్రెడ్‌ ఇయర్స్‌ ఆఫ్‌ ఎ వాండరింగ్‌ సాంగ్స్‌’ పుస్తకాన్ని ఉపరాష్ట్రపతి ఆవిష్కరించారు. అలాగే అస్సామీ భాషకు చెందిన ప్రముఖ నిఘంటువు ‘చంద్రకాంత అభిధాన్‌’ ఐదో సవరించిన ప్రతిని కూడా విడుదల చేశారు.
అస్సాంలో విద్య, మౌలిక వసతులు, ఉపాధి కల్పన రంగాల్లో జరుగుతున్న అభివృద్ధిని ఉపరాష్ట్రపతి ప్రశంసించారు. ముఖ్యమంత్రి హిమంత బిశ్వ శర్మ నాయకత్వంలో రాష్ట్రంలో చేపడుతున్న కార్యక్రమాలను అభినందించారు.
ఈ కార్యక్రమంలో అస్సాం గవర్నర్‌ లక్ష్మణ్‌ ప్రసాద్‌ ఆచార్య, ముఖ్యమంత్రి హిమంత బిశ్వ శర్మ, విద్యాశాఖ మంత్రి రణోజ్‌ పెగు, గువహాటి విశ్వవిద్యాలయ ఉపకులపతి నాని గోపాల్‌ మహంత తదితరులు పాల్గొన్నారు.
