- బేషరతుగా క్షమాపణ కోరిన వాట్సాప్ అడ్మిన్!
- నిజానిజాలు నిర్ధారించుకోకుండానే ఫేక్ న్యూస్ షేర్ చేశానంటూ గ్రూప్‌లో వివరణ.
- సైబర్ క్రైమ్‌కు ఫిర్యాదు చేసేందుకు సిద్ధమైన డిప్యూటీ సీఎం కార్యాలయం.
అమరావతి, మహా.
ఆంధ్రప్రదేశ్ ఉప ముఖ్యమంత్రి పవన్ కల్యాణ్ రాజీనామా చేస్తున్నారంటూ సోషల్ మీడియాలో ప్రచారమైన తప్పుడు వార్త (ఫేక్ న్యూస్) రాజకీయ వర్గాలలో తీవ్ర కలకలం రేపింది. ఎలాంటి నిజానిజాలు పరిశీలించకుండా సృష్టించిన ఈ వదంతులపై పవన్ కల్యాణ్ తీవ్రంగా స్పందించారు. ఈ వ్యవహారంపై కఠిన చర్యలు తీసుకునేందుకు, సైబర్ క్రైమ్ పోలీసులకు అధికారికంగా ఫిర్యాదు చేసేందుకు సిద్ధమయ్యారు. డిప్యూటీ సీఎం కార్యాలయం నుంచి చట్టపరమైన చర్యలు ఉంటాయనే స్పష్టత రావడంతో.. ఆ తప్పుడు వార్తను పోస్ట్ చేసిన వాట్సాప్ గ్రూప్ అడ్మిన్ ఉక్కిరిబిక్కిరై దిగివచ్చారు. తాను చేసిన పొరపాటును గ్రహించి వెంటనే బేషరతుగా క్షమాపణలు కోరుతూ వివరణాత్మక సందేశాన్ని విడుదల చేశారు.
ఉదయం పూట తాను నిర్వహిస్తున్న వాట్సాప్ గ్రూప్‌లో పవన్ కల్యాణ్ డిప్యూటీ సీఎం పదవికి రాజీనామా చేస్తున్నారంటూ ఓ పోస్ట్ పెట్టానని, సోషల్ మీడియాలో చూసిన ఆ వార్తను ఎలాంటి నిజానిజాలు పూర్తిగా నిర్ధారించుకోకుండానే తొందరపాటుతో షేర్ చేశానని ఆ అడ్మిన్ తన ప్రకటనలో పేర్కొన్నారు. అది పూర్తిగా ఒక అబద్ధపు వార్త అని తర్వాత తెలిసిందని, దీనిపై డిప్యూటీ సీఎం కార్యాలయం నుంచి తీవ్ర స్పందన వచ్చి చట్టపరమైన చర్యలు ఉంటాయని తెలియజేయడంతో తాను హృదయపూర్వకంగా చింతిస్తున్నానని తెలిపారు.
ఎటువంటి దురుద్దేశం లేకుండా, పొరపాటున ఈ ఘటన జరిగిందని పేర్కొంటూ పవన్ కల్యాణ్, జనసేన పార్టీ నాయకులు, కార్యకర్తలు, గ్రూప్ సభ్యులందరికీ తన తరఫున బేషరతుగా క్షమాపణలు తెలియజేస్తున్నట్లు అడ్మిన్ స్పష్టం చేశారు. ఇకపై సోషల్ మీడియాలో వచ్చే ఏ వార్తనైనా పూర్తిగా పరిశీలించి, నిర్ధారించుకున్న తర్వాతే పోస్ట్ చేస్తానని హామీ ఇస్తూ గ్రూప్ సభ్యులు మన్నించాలని కోరారు. సోషల్ మీడియా వేదికగా నిరాధారమైన వదంతులు సృష్టించి ప్రజలను తప్పుదారి పట్టించేవారిపై ప్రభుత్వం కఠినంగా వ్యవహరిస్తుందనేదానికి ఈ పరిణామం అద్దం పడుతోంది.
