కులమతాలు, రాజకీయాలకు అతీతంగా ‘అలయ్ బలయ్’ ఆత్మీయ సమ్మేళనం.

• మాజీ గవర్నర్ బండారు దత్తాత్రేయ పిలుపు!
• ‘నషా ముక్త్ భారత్.. వికసిత్ భారత్’ నినాదంతో అంబరాన్నంటిన వేడుకలు.

హైదరాబాద్, మహా.

కులమతాలు, రాజకీయాలు, ప్రాంతీయ భేదాలకతీతంగా ప్రజలందరినీ ఒకే వేదికపైకి తీసుకొచ్చి ఐక్యతను చాటే గొప్ప సంప్రదాయం ‘అలయ్ బలయ్’ అని మాజీ గవర్నర్ బండారు దత్తాత్రేయ ఉద్బోధించారు. వ్యక్తుల మధ్య ఎన్ని భిన్నాభిప్రాయాలు, రాజకీయ విభేదాలు ఉన్నప్పటికీ పండుగల వేళ వాటిని పక్కనపెట్టి ఆత్మీయంగా కలుసుకోవాలని, పరస్పరం శుభాకాంక్షలు పంచుకోవాలని ఆయన పిలుపునిచ్చారు. ఈ వేడుకకు విచ్చేసిన ప్రతి ఒక్కరికీ దత్తాత్రేయ కృతజ్ఞతలు తెలిపారు.

స్నేహభావం, ఐక్యతే అలయ్ బలయ్ ప్రధాన ఉద్దేశం..

స్నేహభావం, సోదరభావాన్ని పెంపొందించడమే ‘అలయ్ బలయ్’ ప్రధాన ఉద్దేశమని దత్తాత్రేయ పేర్కొన్నారు. విజయదశమి పండుగ చెడుపై మంచి సాధించిన విజయానికి ప్రతీక అని గుర్తుచేశారు. ఈ పండుగ స్ఫూర్తితో సమాజంలో సోదరభావం, మతసామరస్యం మరింత బలపడాలని ఆకాంక్షించారు. వ్యక్తిగత అభిప్రాయాలు, రాజకీయ విభేదాలు ఏవైనా సరే.. పండుగల వేళ అందరూ కలిసి ఆనందాన్ని పంచుకోవాలనే గొప్ప సందేశాన్ని ఈ కార్యక్రమం సమాజానికి అందిస్తోందని వివరించారు.

తెలుగు రాష్ట్రాల మధ్య పరస్పర సహకారం ఉండాలి..

రెండు తెలుగు రాష్ట్రాలైన తెలంగాణ, ఆంధ్రప్రదేశ్ పరస్పర సహకారంతో ముందుకు సాగుతూ సంయుక్తంగా అభివృద్ధి సాధించాలని బండారు దత్తాత్రేయ ఆకాంక్షించారు. రెండు రాష్ట్రాల ప్రజల మధ్య ఎప్పుడూ స్నేహపూర్వక సంబంధాలు కొనసాగాలని, ప్రాంతీయ భేదాలకు తావులేకుండా ఐకమత్యంతో ప్రగతి పథంలో పయనించాలని కోరారు.

‘నషా ముక్త్ భారత్.. వికసిత్ భారత్’ నినాదం..

ఈసారి ప్రధానంగా ‘నషా ముక్త్ భారత్.. వికసిత్ భారత్’ (మద్యం/మాదకద్రవ్యాల రహిత భారతదేశం.. అభివృద్ధి చెందిన భారతదేశం) నినాదంతో అలయ్ బలయ్ కార్యక్రమాన్ని నిర్వహిస్తున్నట్లు దత్తాత్రేయ వెల్లడించారు. దేశంలో మాదకద్రవ్యాల నిర్మూలనతో పాటు, 2047 నాటికి భారత్‌ను బలమైన అభివృద్ధి చెందిన దేశంగా తీర్చిదిద్దాలనే లక్ష్యంపై ప్రజల్లో విస్తృతమైన అవగాహన పెంపొందించాల్సిన అవసరం ఉందని నొక్కిచెప్పారు. పండుగలు కేవలం సంబరాలకే పరిమితం కాకుండా సమాజానికి మంచి దిశానిర్దేశం చేసే వేదికలుగా నిలవాలని ఆయన అభిలషించారు. భిన్నత్వంలో ఏకత్వాన్ని చాటుతూ, పరస్పర ప్రేమాభిమానాలను పంచుకుంటూ సమాజ అభ్యున్నతికి ప్రతి ఒక్కరూ తమవంతు సహకారం అందించాలని పిలుపునిచ్చారు.