‘పులి’ బండారం బయటపెడతాం.
*దేవుడి పేరు చెప్పకుండా కిషన్ రెడ్డి గెలవగలరా.
*స్వాతంత్య్ర పోరాటంలో బీజేపీదేం పాత్ర?
*టీపీసీసీ చీఫ్ మహేశ్ గౌడ్ సంచలన వ్యాఖ్యలు.
హైదరాబాద్, మహా.
బీఆర్ఎస్ అధినేత కేసీఆర్ లక్ష్యంగా, అటు కేంద్రంలోని భారతీయ జనతా పార్టీ విధానాలపై తెలంగాణ పీసీసీ అధ్యక్షుడు మహేశ్ కుమార్ గౌడ్ తీవ్రస్థాయిలో విరుచుకుపడ్డారు. శనివారం గాంధీభవన్లో మీడియాతో ముచ్చటించిన ఆయన, జగిత్యాల సభ ద్వారా బయటకు రానున్న కేసీఆర్పై ఘాటు విమర్శలు చేశారు. అదే సమయంలో కేంద్ర మంత్రి కిషన్ రెడ్డి, కర్ణాటక బీజేపీ ఎంపీ తేజస్వీ సూర్యల తీరును తీవ్రంగా ఎండగట్టారు. మహిళా రిజర్వేషన్ల బిల్లు ముసుగులో బీజేపీ పన్నిన కుట్రను ప్రతిపక్షాలు సమర్థవంతంగా అడ్డుకున్నాయని ఆయన ప్రశంసించారు.
**బయటకొస్తే ఆ ‘పులి’ బాగోతం విప్పుతాం**
జగిత్యాలలో జరగనున్న బీఆర్ఎస్ సమావేశంలో కేసీఆర్ పాల్గొనడంపై మహేశ్ గౌడ్ వ్యంగ్యాస్త్రాలు సంధించారు. కేసీఆర్ బయటకు వస్తే, ఆయన తనను తాను ‘పులి’గా వర్ణించుకునే తీరుపై అసలు నిజాలు చెబుతామని హెచ్చరించారు. ఆ పులి ఎన్ని మేకలను తిన్నదో, ఎన్ని ఆవులను మింగిందో, ఆ పులి ఆసరా చూసుకుని ఎన్ని ‘పిల్లులు’ లబ్ధి పొందాయో ప్రజల ముందు ఉంచుతామని ఆయన వ్యాఖ్యానించారు. ముఖ్యంగా కాళేశ్వరం ప్రాజెక్టు పేరుతో ఆ ‘పులి’ సాగించిన విధ్వంసాన్ని, అవినీతిని ఈ నెల 20వ తేదీన ఆధారాలతో సహా బయటపెడతామని స్పష్టం చేశారు.
**స్వాతంత్య్ర పోరాటంలో బీజేపీదేం పాత్ర?**
దేశ స్వాతంత్య్ర సంగ్రామంలో భారతీయ జనతా పార్టీకి ఎలాంటి చారిత్రక పాత్రా లేదని మహేశ్ గౌడ్ విమర్శించారు. మతాలు, కులాల మధ్య చిచ్చుపెట్టి రాజకీయ పబ్బం గడుపుకోవడం మినహా బీజేపీ నేతలకు మరేమీ చేతకాదని దుయ్యబట్టారు. బీజేపీ ఎంపీలంతా ‘యాక్సిడెంటల్ లీడర్స్’ (ప్రమాదవశాత్తు నాయకులైనవారు) అని ఆయన ఎద్దేవా చేశారు. కర్ణాటకకు చెందిన ఎంపీ తేజస్వీ సూర్య తెలంగాణను కించపరుస్తూ మాట్లాడుతుంటే, రాష్ట్రానికి చెందిన బీజేపీ ఎంపీలు నిద్రపోతున్నారా అని ఆయన సూటిగా ప్రశ్నించారు. గడిచిన నలభై ఏళ్ల రాజకీయ జీవితంలో కేంద్ర మంత్రి కిషన్ రెడ్డి ఏ ఒక్క బీసీ నాయకుడినైనా తయారు చేశారా అని నిలదీశారు.
**దేవుడి పేరు చెప్పకుండా కిషన్ రెడ్డికి గెలిచే సత్తా ఉందా?**
కేంద్ర మంత్రి కిషన్ రెడ్డికి మహేశ్ గౌడ్ ఒక బహిరంగ సవాలు విసిరారు. ఎన్నికలొస్తే తప్ప శ్రీరాముడు గుర్తుకురాని నాయకులు.. ‘జై శ్రీరామ్’ అనే నినాదం లేకుండా, కేవలం తాము చేసిన అభివృద్ధిని చూపిస్తూ ఓట్లు అడిగి గెలవగలరా అని ప్రశ్నించారు. దేవుడి పేరు చెబితే గుడ్డిగా ఓట్లు వేసే పరిస్థితి ఇప్పుడు లేదని, జై శ్రీరామ్ అనకుంటే బీజేపీకి రాజకీయ మనుగడే లేదని తేల్చి చెప్పారు. ఇక కర్ణాటక ఎంపీ తేజస్వీ సూర్యను ఒక ‘చిన్న పిల్లాడి’గా అభివర్ణించారు. దేవుడి పేరు చెప్పుకుని యాక్సిడెంటల్గా ఎంపీ అయిన తేజస్వీకి తన సొంత రాష్ట్రం కర్ణాటక గురించే పూర్తి అవగాహన లేదని, అలాంటి వ్యక్తికి తెలంగాణ గురించి ఏం తెలుసని మండిపడ్డారు.
**డీలిమిటేషన్ కుట్ర భగ్నం.. మోదీకి చెంపపెట్టు**
మహిళా సాధికారత విషయంలో కాంగ్రెస్, బీజేపీల మధ్య ఉన్న వ్యత్యాసాన్ని మహేశ్ గౌడ్ వివరించారు. దేశానికి తొలి మహిళా ప్రధానిని, తొలి మహిళా రాష్ట్రపతిని అందించిన ఘనత కాంగ్రెస్ పార్టీదేనని గుర్తుచేశారు. మనువాద భావజాలం ఉన్న బీజేపీకి మహిళలకు గౌరవం ఇవ్వాలన్న కనీస సోయి లేదని విమర్శించారు. పార్లమెంటులో మహిళా రిజర్వేషన్ బిల్లును అడ్డుపెట్టుకుని, నియోజకవర్గాల పునర్విభజన (డీలిమిటేషన్) ద్వారా ఉత్తర భారతదేశానికి ఎక్కువ సీట్లు కట్టబెట్టాలన్న మోదీ ప్రభుత్వ కుట్రను ప్రతిపక్షాలు అడ్డుకున్నాయని తెలిపారు. దొడ్డిదారిన బిల్లును పాస్ చేయాలన్న బీజేపీ నియంతృత్వ పోకడలకు చెక్ పడిందని, ఈ బిల్లు వీగిపోవడం ప్రధాని మోదీకి చెంపపెట్టు లాంటిదని ఆయన అభివర్ణించారు.
కేంద్రానికి చిత్తశుద్ధి ఉంటే తక్షణమే సోమవారం మహిళా బిల్లును పార్లమెంట్లో ప్రవేశపెట్టాలని డిమాండ్ చేశారు. సామాజిక న్యాయం విషయంలో కాంగ్రెస్ నిబద్ధతను ప్రస్తావిస్తూ, స్థానిక సంస్థల ఎన్నికల్లో బీసీలకు 50 శాతం సీట్లు కేటాయించామని, తెలంగాణలో ముఖ్యమంత్రి రేవంత్ రెడ్డి స్వయంగా బీసీ కులగణన చేపట్టారని మహేశ్ గౌడ్ ఈ సందర్భంగా స్పష్టం చేశారు.
