వీకెండ్ అనాలసిస్: మోదీ-షా వ్యూహానికి గండి.. రాజకీయ చదరంగంలో మారుతున్న సమీకరణాలు!

• వీకెండ్ అనాలసిస్
  …….
  మోదీ లెక్క ఎలా తప్పింది?
• అసెంబ్లీ ఎన్నికల ముందు ఎందుకు తప్పటడుగు వేశారు?
• ఓవర్ కాన్ఫిడెన్సే కొంపముంచిందా?
• మోదీషాల వ్యూహ పదునుతగ్గిందా? ప్రతిపక్షం రాటుదేలిందా?
• తమిళనాడు బెంగాల్ ఎన్నికలముందు ప్రత్యేక భేటీ ఎందుకు?
• 50శాతం పెంపుపై కూటమిలోనే ఏకాభిప్రాయం లేదా?
• లోక్ సభ లో మోదీ బిల్లు ఓటమి స్టాలిన్, మమతలకు కలిసొస్తుందా?
• ఇక మహిళాబిల్లు డీలిమిటేషన్ అటకెక్కినట్లేనా?
• సౌత్ లో రేవంత్ దూకుడు ఇండి కూటమికి కలిసొచ్చిందా?
• కేసీఆర్ జగిత్యాల సభ రాష్ట్ర రాజకీయాలపై ఎఫెక్ట్ చూపుతుందా?
• కవిత కొత్త రాజకీయపార్టీ ఏ పార్టీకి నష్టం చేయనుంది?
• తాజా రాజకీయ పరిణామాలపై ఏఎన్ఎన్ , మహాపత్రిక సీఈవో కంది రామచంద్రారెడ్డి వీకెండ్ అనాలసిస్
  ……….

ఆకాశమంత ఎత్తుకు ఎదిగిన వృక్షమైనా.. గాలివాటం మారితే నేలకొరగక తప్పదు. రాజకీయంలో ‘అజేయుడు’ అనే పదానికి కాలం చెల్లిందని తాజా లోక్ సభ పరిణామాలు నిరూపిస్తున్నాయి. ఏనుగు ఏడు అడుగులు వెనక్కి వేసిందంటే అది భయపడి కాదు.. దూకడానికి సిద్ధమవుతుందని అర్థం. కానీ, అదే ఏనుగు ఊబిలో కాలు వేస్తే? ఇప్పుడు మోదీ-షా ద్వయం పరిస్థితి అలాగే కనిపిస్తోంది.” రాజకీయం అంటేనే చదరంగం. ఇక్కడ ఎత్తులు పారుతాయి.. పొత్తులు కుదురుతాయి. కానీ, ఎప్పుడూ అజేయులుగా భావించే మోదీ-షా ద్వయం వేసిన “స్పెషల్ సెషన్” ఎత్తుగడ చివరకు సెల్ఫ్ గోల్ లా మారింది. 2014 తర్వాత తిరుగులేని ఆధిపత్యంతో దూసుకుపోతున్న బీజేపీకి, లోక్ సభలో ఎదురైన ఈ పరిణామం ఒక హెచ్చరిక. గాయం తగిలిన చోటే గెలుపు పాఠం మొదలవుతుంది అంటారు.. మరి ఈ గాయం నుంచి బీజేపీ పాఠం నేర్చుకుంటుందా? లేక పతనం మొదలవుతుందా? చాణక్యం చెదిరిందా? మోదీ మార్క్ ‘మేజిక్’ రివర్స్ అయిందా?
…….
ప్రతిపక్ష ఐక్యతతో భంగపాటు

ఎన్డీఏ అతివిశ్వాసంపై పోటు

ఒక్క ఓటమితో ఆగదు.. ఈ అంశం

ప్రత్యర్ధులకు అందిన పాశుపతాస్త్రం

…………..
ప్రతిపక్ష ఐక్యత మోదీషాకు 2014 తర్వాత తొలిసారి షాక్ ఇచ్చింది. ఈ షాక్ చిన్నది కాదు. మోదీ-షా ద్వయం అంటేనే అజేయమైన వ్యూహకర్తలు అనే ముద్ర ఉండేది. కానీ లోక్ సభలో ప్రత్యేక సమావేశం పెట్టి ప్రవేశపెట్టిన బిల్లుల పరిస్థితి చూస్తుంటే ‘ఓవర్ కాన్ఫిడెన్స్’ వారిని దెబ్బతీసిందా అన్న అనుమానం కలగక మానదు. బలాబలాలు అంచనా వేయడంలో మోదీ లెక్క ఎందుకు తప్పింది? బెంగాల్, తమిళనాడు ఎన్నికల ముందు ఈ ప్రత్యేక సమావేశం సలహా ఇచ్చింది ఎవరు? బీజేపీని బొక్కబోర్లా పడేలా చేసిన వ్యూహకర్తలు ఎవరు? ఈ తప్పు ఎవరిది? అవసరం లేని ఎత్తుగడ వేసి భంగపాటుకు గురైన మోదీ మరో వారం, పదిరోజుల్లో జరిగే ఎన్నికలముందు క్యాడర్ ఆత్మస్థైర్యం దెబ్బతినేలా వ్యవహరించారని చెప్పకతప్పదు. ఇపుడు లోక్ సభలో ఓడించాం.. బెంగాల్ లో ఓడిస్తాం.. తర్వాత ఢిల్లీలో దింపేస్తాం అంటూ మమతాబెనర్జీ హెచ్చరిస్తున్నారు. ఇలాంటి అవకాశాలను బీజేపీ చేజేతులా అందించింది. బీజేపీ వ్యూహపదును తప్పిందా? అధికారం వ్యూహకర్తల తలకెక్కిందా? ఎంతో ఊరించి బిల్లు సభకు తీసుకొచ్చి.. బొక్కబోర్లా పడి నవ్వులపాలు కావడం విస్మయపరిచే అంశమే. పరాభవం తర్వాత రాత్రి టీవీల ముందుకు వచ్చి, తర్వాత రోడ్లపైకి వచ్చి మహిళా ద్రోహులని విపక్షాలను దూషిస్తే లోక్ సభ సాక్షిగా పోయిన ప్రతిష్ట తిరిగిరాదు.

అతి విశ్వాసమే శాపమా?
మోదీ లెక్క ఎక్కడ తప్పింది? అసెంబ్లీ ఎన్నికల ముంగిట అనవసరమైన హడావుడితో ప్రత్యేక సమావేశం నిర్వహించడం, అందులో కీలక బిల్లులు వీగిపోవడం భారత రాజకీయ చరిత్రలో అరుదైన ఘట్టం. ఒకప్పుడు అమిత్ షా వ్యూహం అంటే ప్రత్యర్థులకు వణుకు. కానీ ఇప్పుడు రాహుల్, ప్రియాంక, మమతా బెనర్జీ, స్టాలిన్ వంటి నేతలు ఆ వ్యూహాలను చిత్తు చేస్తున్నారు. అసలు ఎన్నికల ముందు ఈ సాహసం చేయమని సలహా ఇచ్చింది ఎవరు? బలాబలాలు అంచనా వేయడంలో గ్రౌండ్ రిపోర్ట్స్ ఎందుకు తప్పులతడకయ్యాయి? 1970వ దశకంలో ఇందిరా గాంధీ కూడా ఇలాగే తిరుగులేని శక్తిగా ఎదిగారు. కానీ ‘అతి విశ్వాసం’ ఆమెను అత్యవసర పరిస్థితి వైపు నడిపించింది. నేడు మోదీ విషయంలో కూడా అలాంటి ‘అధికార గర్వం’ వ్యూహకర్తల తలకెక్కిందా అనిపిస్తోంది. “లోక్ సభలో ఓడించాం.. బెంగాల్ లో ఓడిస్తాం.. ఢిల్లీలో దింపేస్తాం” అన్న మమతా బెనర్జీ మాటలు ఇప్పుడు బీజేపీ క్యాడర్ ఆత్మస్థైర్యాన్ని దెబ్బతీస్తున్నాయి. ఎన్నికలకు వారం రోజుల ముందు ఇలాంటి భంగపాటు బీజేపీకి కోలుకోలేని దెబ్బ. వ్యూహకర్తలు మేల్కోకపోతే, అజేయమైన మోదీ-షా ద్వయం చరిత్రకే పరిమితం కావాల్సి వస్తుంది.

‘ఇండి’ కూటమి రాటుదేలిందా?
గతంలో విడివిడిగా ఉన్న ప్రతిపక్షాలు ఇప్పుడు ఒకే తాటిపైకి రావడం మోదీకి అతిపెద్ద సవాలుగా మారింది. బెంగాల్, తమిళనాడు ఎన్నికల ముందు వీరిద్దరూ ఏకమై కేంద్రాన్ని ఢీకొనడం బీజేపీకి గడ్డు పరిస్థితిని కల్పిస్తోంది. చారిత్రాత్మక బిల్లు అంటూ ప్రచారం చేసుకున్న మహిళా రిజర్వేషన్ బిల్లు ఇప్పుడు డీలిమిటేషన్ అనే సందిగ్ధంలో పడింది. అసలు ఈ బిల్లు అమలులోకి వస్తుందా? లేక కేవలం ఎన్నికల గిమ్మిక్కుగానే మిగిలిపోతుందా? అని మహిళా లోకం ప్రశ్నిస్తోంది. 50 శాతం పెంపుపై ఎన్డీఏ కూటమిలో ఏకాభిప్రాయం లేకపోవడం కూడా బీజేపీకి ఇబ్బందికరంగా మారినట్లు కనిపిస్తోంది.

దక్షిణాది రాజకీయం: రేవంత్ దూకుడు

దక్షిణాదిలో రేవంత్ రెడ్డి దూకుడు ‘ఇండి’ కూటమికి కొత్త ఊపిరి పోస్తోంది. క్షేత్రస్థాయిలో కాంగ్రెస్ పుంజుకోవడం బీజేపీ, బీఆర్ఎస్ లకు ఆందోళన కలిగిస్తోంది. సౌత్ కు అన్యాయం జరుగుతున్నదంటూ సౌత్ సీఎంలు అందరికీ లేఖలు రాయడం, కొత్త అజెండాను ప్రతిపాదించడం జాతీయస్థాయిలో ఎన్డీఏ వ్యతిరేక వాతావరణాన్ని క్రియేట్ చేశాయి.

జగిత్యాల సభతో కేసీఆర్ ఆగమనం

తెలంగాణ పాలిటిక్స్ లో మళ్ళీ సంచలనం

కేసీఆర్ జగిత్యాల సభ రాష్ట్ర రాజకీయాలను మలుపు తిప్పనుంది. కేసీఆర్ సభ రోజే రేవంత్ కాళేశ్వరం మేడిగడ్డకు వెళ్ళడం ప్రభావాన్ని తగ్గించే వ్యూహం. రాజకీయాల్లో వ్యూహాలు ప్రతివ్యూహాలు ఉంటాయి. మరోవైపు కవిత కొత్త రాజకీయ పార్టీ అంశం ఇప్పుడు హాట్ టాపిక్ గా మారింది. కవిత కొత్త పార్టీ ఏ పార్టీ ఓట్లను చీలుస్తుంది? అది అంతిమంగా కాంగ్రెస్ కి లాభమా లేక బీజేపీకా? అన్నది రానున్నరోజుల్లో జరిగే వలసలు, చేరికలు, ఎజెండా, కార్యాచరణ ఆధారంగా ఉండనుంది.

బీజేపీకి గడ్డు పరిస్థితి

డ్యామేజ్ కంట్రోల్ చేయకుంటే అధోగతే

అవసరం లేని ఎత్తుగడ వేసి భంగపాటుకు గురైన మోదీ, ఎన్నికల ముందు క్యాడర్ ఆత్మస్థైర్యం దెబ్బతినేలా వ్యవహరించారనడంలో సందేహం లేదు. రాబోయే వారం రోజులు బీజేపీకి అత్యంత కీలకం. డ్యామేజ్ కంట్రోల్ చేయకపోతే, 2026 అసెంబ్లీ ఎన్నికలు 2029 లోక్ సభ ఎన్నికలకు ఒక ట్రైలర్ లా మారే అవకాశం ఉంది.

ఇదీ ఈ వారం వీకెండ్ అనాలసిస్ బై కేఆర్ ఆర్