జేఈఈ మెయిన్ ఫలితాల్లో తెలుగు తేజాల ప్రభంజనం….

* జాతీయ స్థాయిలో సత్తా చాటిన మన విద్యార్థులు.
* జేఈఈ మెయిన్‌ సెషన్-2లో అదరగొట్టిన తెలుగు రాష్ట్రాల ఆణిముత్యాలు.
* దేశవ్యాప్తంగా 26 మందికి వంద పర్సంటైల్.
* అందులో 10 మంది మనోళ్లే.
* ఘనంగా వెలువడిన జేఈఈ మెయిన్ ఫలితాలు.
ఢిల్లీ,మహా.
లక్షలాది మంది విద్యార్థులు, తల్లిదండ్రుల సుదీర్ఘ నిరీక్షణకు తెరపడింది. దేశవ్యాప్తంగా ఇంజనీరింగ్ విద్యాసంస్థల్లో ప్రవేశాల కోసం ఎంతో ఉత్కంఠగా ఎదురుచూస్తున్న జేఈఈ మెయిన్‌ సెషన్-2 ఫలితాలను నేషనల్ టెస్టింగ్ ఏజెన్సీ (ఎన్టీఏ) ఘనంగా విడుదల చేసింది. సోమవారం అధికారికంగా ఫైనల్ కీని వెల్లడించిన అధికారులు, సాయంత్రానికి పేపర్-1 తుది ఫలితాలను సైతం ప్రకటించారు. దేశవ్యాప్తంగా ఉన్న ప్రతిష్టాత్మక ఐఐటీలు, నిట్‌లు, ఇతర కేంద్ర ప్రభుత్వ విద్యాసంస్థల్లో ఇంజనీరింగ్ కోర్సుల్లో అడుగుపెట్టేందుకు నిర్వహించిన ఈ అత్యంత కీలకమైన ప్రవేశ పరీక్షకు దాదాపు 11.23 లక్షల మందికి పైగా విద్యార్థులు హాజరయ్యారు. ఈ ఫలితాలతో ఎంతో మంది విద్యార్థుల ఉన్నత విద్య కలలకు మార్గం సుగమమైంది.
ఈ జేఈఈ మెయిన్ తుది విడత ఫలితాల్లో తెలుగు రాష్ట్రాల విద్యార్థులు జాతీయ స్థాయిలో తమ సత్తా చాటారు. అత్యుత్తమ ప్రతిభ కనబరిచి దేశం గర్వించదగ్గ స్థాయిలో అద్భుతమైన విజయాలను నమోదు చేశారు. దేశవ్యాప్తంగా మొత్తం ఇరవై ఆరు మంది విద్యార్థులు నూటికి నూరు (100) పర్సంటైల్ స్కోరు సాధించి అగ్రస్థానంలో నిలవగా, అందులో ఏకంగా పది మంది మన తెలుగు విద్యార్థులే ఉండటం తెలుగు రాష్ట్రాలకు ఎంతో గర్వకారణం. వంద శాతం పర్సంటైల్ సాధించిన వారిలో ఆంధ్రప్రదేశ్ రాష్ట్రానికి చెందిన జొన్నల రోషన్‌ మణిదీప్‌ రెడ్డి, నరేంద్ర బాబు గారి మహిత్‌, తుంగా దుర్గా సుప్రభాత్‌, పసల మోహిత్‌, బిజ్జం వెంకట చంద్ర శేఖర్‌ రెడ్డి ఉండగా.. తెలంగాణ రాష్ట్రం నుంచి డి. భవితేశ్‌ రెడ్డి, మంథా శివ కామేశ్‌, సాయి రిత్విక్‌ రెడ్డి, వివాన్‌ శరద్‌ మహిశ్వరి, రిషి ప్రేమ్‌నాథ్‌ తదితరులు తమ అమోఘమైన ప్రతిభతో అదరగొట్టి తెలుగు రాష్ట్రాల కీర్తి పతాకాలను జాతీయ స్థాయిలో రెపరెపలాడించారు.
ఇక జేఈఈ మెయిన్‌లో అద్భుతమైన ప్రతిభ కనబరిచి నిర్దేశిత కటాఫ్ మార్కులతో అర్హత సాధించిన అభ్యర్థులు తమ తదుపరి లక్ష్యమైన జేఈఈ అడ్వాన్స్‌డ్ పరీక్షకు సన్నద్ధం కానున్నారు. మే పదిహేడవ తేదీన జరగనున్న ఈ జేఈఈ అడ్వాన్స్‌డ్ పరీక్ష కోసం అర్హత సాధించిన విద్యార్థులు ఇప్పటి నుంచే ప్రణాళికలు సిద్ధం చేసుకుంటున్నారు. దేశంలోని అత్యున్నత సాంకేతిక విద్యాసంస్థలైన ఇండియన్ ఇన్‌స్టిట్యూట్ ఆఫ్ టెక్నాలజీ (ఐఐటీ)లలో ప్రవేశాలకు ఈ అడ్వాన్స్‌డ్ పరీక్షే ఏకైక ముఖద్వారంగా నిలుస్తుంది. మెయిన్స్‌లో చూపించిన స్ఫూర్తితోనే అడ్వాన్స్‌డ్‌లోనూ అత్యుత్తమ ర్యాంకులు సాధించి, ప్రతిష్టాత్మక ఐఐటీ క్యాంపస్‌లలో అడుగుపెట్టాలని విద్యార్థులు ఉవ్విళ్లూరుతున్నారు.