* ‘సమృద్ధి బిహార్’ లక్ష్యంగా కీలక చర్చలు.
* అభివృద్ధి పథంలో నవ బిహార్.
ఢిల్లీ,మహా.
దేశ రాజధాని న్యూఢిల్లీ వేదికగా మంగళవారం ఒక కీలక రాజకీయ భేటీ చోటుచేసుకుంది. భారత ప్రధానమంత్రి నరేంద్ర మోదీని బిహార్ సీఎం సామ్రాట్ చౌదరి మర్యాదపూర్వకంగా కలుసుకున్నారు. ‘వికసిత భారత్ – సమృద్ధి బిహార్’ అనే బృహత్తర లక్ష్యంతో సాగుతున్న అభివృద్ధి ప్రస్థానంలో భాగంగా ఈ సమావేశం నిర్వహించారు. ప్రధాని నివాసంలో జరిగిన ఈ భేటీ అత్యంత స్నేహపూర్వక వాతావరణంలో సాగింది. బిహార్ రాష్ట్ర పురోభివృద్ధికి కేంద్ర ప్రభుత్వం అందిస్తున్న అండదండలు, ప్రధాని మోదీ చూపుతున్న ప్రత్యేక శ్రద్ధ పట్ల ఈ సందర్భంగా ఆయన హర్షం వ్యక్తం చేశారు. రాబోయే రోజుల్లో రాష్ట్రం ఎదుర్కోవాల్సిన సవాళ్లు, సాధించాల్సిన లక్ష్యాలపై ప్రధాని నుంచి విలువైన మార్గదర్శకత్వాన్ని పొందారు.
బీహార్ను దేశంలోనే అగ్రగామి రాష్ట్రంగా తీర్చిదిద్దేందుకు ఎన్డీఏ ,ప్రభుత్వం చిత్తశుద్ధితో పనిచేస్తోందని, ఈ ప్రయాణంలో ప్రధాని మోదీ నాయకత్వం తమకు కొండంత అండగా నిలుస్తోందని ఆయన కొనియాడారు. కేవలం రాజకీయాలకే పరిమితం కాకుండా, సామాన్య ప్రజల జీవన ప్రమాణాలను మెరుగుపరిచే దిశగా కేంద్రం తీసుకుంటున్న నిర్ణయాలు రాష్ట్ర ప్రగతికి కొత్త ఊపిరి పోస్తున్నాయని పేర్కొన్నారు. రాష్ట్రంలోని మౌలిక సదుపాయాల కల్పన, పారిశ్రామికాభివృద్ధి , వ్యవసాయ రంగాల్లో రాబోయే రోజుల్లో చేపట్టబోయే వినూత్న కార్యక్రమాలపై ప్రధానితో చర్చించినట్లు సమాచారం. ‘నవ బిహార్’ నిర్మాణంలో కేంద్ర, రాష్ట్ర ప్రభుత్వాల మధ్య ఉన్న ఈ సమన్వయం దేశానికే ఒక ఆదర్శంగా నిలవబోతోందని ఆయన ఆశాభావం వ్యక్తం చేశారు.
ప్రధాని మోదీ నేతృత్వంలో దేశం ఆర్థికంగా బలోపేతమవుతున్న తరుణంలో, బిహార్ కూడా అదే స్ఫూర్తితో ముందుకు సాగాలని, అందుకు అవసరమైన అన్ని రకాల సాంకేతిక , ఆర్థిక సహకారాన్ని అందిస్తామని ప్రధాని హామీ ఇచ్చినట్లు తెలుస్తోంది. ప్రధాని మోదీ తనపై చూపిస్తున్న స్నేహం , బిహార్ అభివృద్ధి పట్ల ఆయనకున్న నిబద్ధత రాష్ట్ర ప్రజలందరికీ గర్వకారణమని సీఎం సామ్రాట్ చౌదరి వ్యాఖ్యానించారు.
