* సచివాలయంలో రాయబారి మే ఎలిన్ స్టెనర్ బృందం భేటీ.
* గ్రీన్ ఎనర్జీ, పారిశ్రామిక అభివృద్ధిపై కీలక చర్చలు.
* పెట్టుబడులకు ఆహ్వానం పలికిన మంత్రి శ్రీధర్ బాబు, మహేష్ కుమార్ గౌడ్.
హైదరాబాద్, మహా.
తెలంగాణ రాష్ట్రానికి అంతర్జాతీయ పెట్టుబడులను ఆకర్షించే క్రమంలో మరో కీలక అడుగు పడింది. రాష్ట్ర సచివాలయం వేదికగా మంగళవారం నార్వే దేశ రాయబారి మే ఎలిన్ స్టెనర్ నేతృత్వంలోని ఉన్నత స్థాయి ప్రతినిధుల బృందం టీపీసీసీ అధ్యక్షులు, ఎమ్మెల్సీ మహేష్ కుమార్ గౌడ్ ,రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబులతో ప్రత్యేకంగా భేటీ అయ్యింది. ఈ సమావేశంలో ప్రధానంగా గ్రీన్ ఎనర్జీ, పారిశ్రామికాభివృద్ధి, సస్టైనబుల్ డెవలప్మెంట్ మరియు ఇన్నోవేషన్ రంగాల్లో ఉభయ ప్రాంతాల మధ్య ఉండాల్సిన పరస్పర సహకార అవకాశాలపై అధికారులు సుదీర్ఘంగా చర్చించారు. తెలంగాణ ప్రభుత్వం అనుసరిస్తున్న పారిశ్రామిక విధానాలు, నూతన ఆవిష్కరణలకు కల్పిస్తున్న ప్రోత్సాహకాలు నార్వే ప్రతినిధులను విశేషంగా ఆకట్టుకున్నాయి.
రాష్ట్రం సాధిస్తున్న ఆర్థిక పురోగతిని, పారిశ్రామిక రంగంలో ప్రవేశపెట్టిన విప్లవాత్మక మార్పులను మంత్రి శ్రీధర్ బాబు ఈ సందర్భంగా రాయబారి బృందానికి వివరించారు. ముఖ్యంగా పునరుత్పాదక ఇంధన వనరులు (గ్రీన్ ఎనర్జీ) మరియు పర్యావరణ హిత అభివృద్ధి లక్ష్యాలను చేరుకోవడంలో నార్వేకు ఉన్న సాంకేతిక నైపుణ్యాన్ని తెలంగాణాలో వినియోగించుకునే అంశంపై దృష్టి సారించారు. తెలంగాణాలో ఉన్న అనుకూలమైన భౌగోళిక పరిస్థితులు, నైపుణ్యం కలిగిన మానవ వనరులు పెట్టుబడులకు అత్యంత ఆశాజనకంగా ఉన్నాయని, నార్వేజియన్ కంపెనీలు ఇక్కడ తమ యూనిట్లను ఏర్పాటు చేసేందుకు ప్రభుత్వం అన్ని విధాలా సహకరిస్తుందని హామీ ఇచ్చారు. రాష్ట్ర అభివృద్ధిలో భాగస్వాములు కావాలని, తద్వారా ఇరు ప్రాంతాల మధ్య వాణిజ్య సంబంధాలు మరింత బలోపేతం అవుతాయని టీపీసీసీ అధ్యక్షులు మహేష్ కుమార్ గౌడ్ పేర్కొన్నారు.
ఈ కార్యక్రమంలో నార్వే దేశానికి చెందిన ఇన్నోవేషన్ హెడ్ బ్యోర్న్ ఐవర్సన్, ఫస్ట్ సెక్రటరీ సిల్జే క్రిస్టీన్ ఆండర్సన్ మరియు విదేశీ వ్యవహారాల మంత్రిత్వ శాఖ డైరెక్టర్ సిరి వెసెత్ మెలింగ్ వంటి ఉన్నతాధికారులు పాల్గొని, తెలంగాణలో పెట్టుబడుల వాతావరణంపై సానుకూలత వ్యక్తం చేశారు. ముఖ్యంగా ఐటీ, క్లీన్ టెక్నాలజీ రంగాల్లో ఇక్కడి స్టార్టప్లతో కలిసి పనిచేసేందుకు తాము సిద్ధంగా ఉన్నామని వారు వెల్లడించారు. భవిష్యత్తులో గ్రీన్ ఎనర్జీ ప్రాజెక్టుల విషయంలో ఇరు దేశాల మధ్య మరింత సమన్వయం పెంచేలా కార్యాచరణ రూపొందించుకోవాలని నిర్ణయించారు. ఈ భేటీ ద్వారా తెలంగాణాకు మరిన్ని అంతర్జాతీయ ప్రాజెక్టులు వచ్చే అవకాశం ఉండటంతో రాష్ట్ర పారిశ్రామిక వర్గాల్లో హర్షం వ్యక్తమవుతోంది.
