- తెలంగాణ ఖాకీ కోటకు కొత్త సారథి.
- మే 1న డీజీపీగా సి.వి. ఆనంద్ బాధ్యతల స్వీకారం.
- బహుముఖ ప్రజ్ఞాశాలికి పట్టాభిషేకం.
హైదరాబాద్ , మహా.
తెలంగాణ రాష్ట్ర పోలీస్ దళానికి నూతన సర్వసైన్యాధ్యక్షుడిగా సీనియర్ ఐపీఎస్ అధికారి సి.వి. ఆనంద్ నియామకమయ్యారు. రాష్ట్ర పోలీస్ డైరెక్టర్ జనరల్ (డీజీపీ)గా ఆయన మే 1వ తేదీన బాధ్యతలు చేపట్టనున్నారు. సుమారు 35 ఏళ్ల సుదీర్ఘ సర్వీసులో క్షేత్రస్థాయి నుంచి అత్యున్నత విభాగాల వరకు అన్నింటా తనదైన ముద్ర వేసిన ఆనంద్, ఇప్పుడు రాష్ట్ర పోలీస్ వ్యవస్థను సమర్థవంతంగా నడిపించేందుకు సిద్ధమయ్యారు. హైదరాబాద్ మట్టిలోనే పుట్టి పెరిగి, ఇక్కడి పరిస్థితులపై పూర్తి అవగాహన ఉన్న అధికారి కావడంతో ఆయన నియామకంపై సర్వత్రా హర్షం వ్యక్తమవుతోంది.
విద్యార్థి దశ నుంచే టాపర్గా..
1968లో భాగ్యనగరంలో జన్మించిన సి.వి. ఆనంద్, విద్యార్థి దశ నుంచే అత్యంత ప్రతిభావంతుడిగా గుర్తింపు పొందారు. ప్రతిష్టాత్మక హైదరాబాద్ పబ్లిక్ స్కూల్లో టాపర్గా నిలిచిన ఆయన, నిజాం కాలేజీ మరియు ఉస్మానియా విశ్వవిద్యాలయంలో ఉన్నత విద్యను అభ్యసించారు. చదువులో ఎంతటి ప్రతిభ చూపారో, కెరీర్ విషయంలోనూ అంతే పట్టుదల కనబరిచారు. కేవలం 22 ఏళ్ల వయసులోనే, అదీ తొలి ప్రయత్నంలోనే ఐపీఎస్కు ఎంపికై తన సత్తా చాటారు. వృత్తి పట్ల ఆయనకున్న అంకితభావానికి ఇది తొలి నిదర్శనం.
సవాళ్లను ఎదుర్కొని సాహస పతకంతో..
కెరీర్ ఆరంభంలోనే వరంగల్, నిజామాబాద్ వంటి నక్సల్స్ ప్రభావిత జిల్లాల్లో పనిచేసిన ఆనంద్, శాంతిభద్రతల పరిరక్షణలో రాజీలేని పోరు సాగించారు. ప్రాణాలకు తెగించి నక్సలైట్లపై పోరాడిన ఆయన సాహసానికి గుర్తింపుగా ప్రభుత్వం ‘ప్రెసిడెంట్స్ గ్యాలంట్రీ మెడల్’ తో గౌరవించింది. శాంతిభద్రతల నిర్వహణలో ఎంత కఠినంగా ఉంటారో, ప్రజలకు ఉపయోగపడే సంస్కరణలు తీసుకురావడంలో అంతే ఉత్సాహం చూపుతారు. హైదరాబాద్ ట్రాఫిక్ విభాగంలో నేడు మనం చూస్తున్న ఈ-చలానా , డ్రంక్ అండ్ డ్రైవ్ వంటి కీలక తనిఖీలను కఠినంగా ప్రవేశపెట్టి వాహనదారుల్లో క్రమశిక్షణ తెచ్చింది ఆయనే.
మహిళా భద్రత,టెక్నాలజీకి పెద్దపీట
సైబరాబాద్ పోలీస్ కమిషనర్గా పనిచేసిన కాలంలో మహిళా భద్రతకు అత్యధిక ప్రాధాన్యతనిచ్చారు. షీ-టీమ్స్, షీ-షటిల్స్ వంటి విప్లవాత్మక కార్యక్రమాలను బలోపేతం చేసి, నగరంలో మహిళలకు భరోసా కల్పించారు. అలాగే హైదరాబాద్ కమిషనర్గా పండుగలను అత్యంత ప్రశాంతంగా నిర్వహించి మెప్పించారు. ఆధునిక నేరాలను అరికట్టేందుకు టెక్నాలజీని వాడుకోవడంలో ఆయన ఎప్పుడూ ముందుంటారు. డ్రగ్స్ నియంత్రణ కోసం ‘హెచ్-న్యూ’ , సైబర్ నేరాల కట్టడికి ప్రత్యేక విభాగాలు ఏర్పాటు చేయడం ఆయన దూరదృష్టికి అద్దం పడుతోంది. డ్రగ్స్ నియంత్రణలో ఆయన సాధించిన విజయాలకు గాను దుబాయ్లో జరిగిన వరల్డ్ పోలీస్ సమ్మిట్లో అంతర్జాతీయ పురస్కారం లభించడం గమనార్హం.
బహుముఖ ప్రజ్ఞాశాలి.. క్రీడా స్ఫూర్తి ప్రదాత
కేవలం పోలీస్ శాఖకే పరిమితం కాకుండా, పౌర సరఫరాల విభాగంలోనూ ఆనంద్ అద్భుతాలు చేశారు. రేషన్ షాపుల్లో ఈ-పోస్ యంత్రాలను ప్రవేశపెట్టి అవినీతిని అరికట్టడం ద్వారా ప్రభుత్వానికి వేల కోట్ల రూపాయలను ఆదా చేశారు. అలాగే కేంద్ర సర్వీసుల్లో సీఐఎస్ఎఫ్ అధికారిగా దేశవ్యాప్త విమానాశ్రయాల భద్రతను పర్యవేక్షించిన అనుభవం ఆయనకు ఉంది. వృత్తిపరంగా ఎంతటి బిజీగా ఉన్నా, ఆయన క్రీడలను ఎప్పుడూ వదిలిపెట్టలేదు. క్రికెట్లో రంజీ ట్రోఫీ స్థాయి వరకు ఆడిన ఆయన, 50 ఏళ్లు దాటినా నేటికీ మైదానంలో శతకాలతో అలరిస్తూ అత్యంత ఫిట్గా ఉంటున్నారు. టెన్నిస్, క్రికెట్ ఆడుతూ క్రీడా స్ఫూర్తితో సిబ్బందిని నడిపించడంలో ఆయన దిట్ట. రాష్ట్రపతి పోలీస్ పతక గ్రహీత అయిన సి.వి. ఆనంద్ సారథ్యంలో తెలంగాణ పోలీస్ వ్యవస్థ సరికొత్త శిఖరాలను అధిరోహించనుంది.
