ఆధ్యాత్మిక శోభతో పులకించిన కాశీ….

* విశ్వనాథుని సన్నిధిలో ప్రధాని మోదీ ప్రత్యేక పూజలు.
* 594 కిలోమీటర్ల ‘గంగా ఎక్స్‌ప్రెస్‌వే’ను ప్రారంభించిన ప్రధాని.
*హర హర మహాదేవ్.. వారణాసి వీధుల్లో జనసంద్రమైన మోదీ రోడ్‌షో.
* వారణాసిలో భారీ సమ్మేళనం.
వారణాసి, మహా.
ఉత్తరప్రదేశ్ పర్యటనలో భాగంగా భారత ప్రధానమంత్రి నరేంద్ర మోదీ వారణాసిలో పర్యటించి ఆధ్యాత్మిక, అభివృద్ధి రంగాల్లో సరికొత్త అధ్యాయానికి శ్రీకారం చుట్టారు. బుధవారం ఉదయం పవిత్ర కాశీ విశ్వనాథుని ఆలయాన్ని సందర్శించిన ప్రధానికి వారణాసి ప్రజలు అపూర్వ స్వాగతం పలికారు. డోలు, సన్నాయి వాయిద్యాలు, శంఖారావాల నడుమ ఆలయ ప్రాంగణమంతా ఆధ్యాత్మిక శోభతో నిండిపోయింది. ప్రధాని మోదీ అత్యంత భక్తిశ్రద్ధలతో పరమశివునికి ప్రత్యేక పూజలు నిర్వహించి, దేశ ప్రజలందరికీ సుఖశాంతులు, ఆరోగ్యం కలగాలని ప్రార్థించారు. అనంతరం అమ్మ అన్నపూర్ణను, గంగా మాతను దర్శించుకున్న ఆయన, ఈ పర్యటన తనలో అపారమైన సానుకూల శక్తిని నింపిందని, కాశీ ప్రజల ప్రేమాభిమానాలు వెలకట్టలేనివని కొనియాడారు.
వారణాసి వీధుల్లో ప్రధాని మోదీ చేపట్టిన రోడ్‌షో ఒక చారిత్రాత్మక ఘట్టంగా నిలిచింది. ముఖ్యంగా లహురాబీర్ క్రాసింగ్ వద్ద ప్రధానికి ఘన స్వాగతం పలికేందుకు ప్రజలు భారీ సంఖ్యలో తరలివచ్చారు. ప్రధాని కాన్వాయ్ వెళుతుండగా దారిపొడవునా భక్తులు, అభిమానులు పూలవర్షం కురిపించారు. ‘హర హర మహాదేవ్’, ‘జై శ్రీరామ్’ నినాదాలతో వారణాసి పురవీధులు హోరెత్తాయి. ప్రజల ఉత్సాహం చూసి పులకించిపోయిన ప్రధాని, కాన్వాయ్ నుండి ప్రజలకు అభివాదం చేస్తూ ముందుకు సాగారు. ఈ రోడ్‌షో ఆద్యంతం అత్యంత ఉత్సాహంగా, భావోద్వేగభరితంగా సాగడం విశేషం. ఆధ్యాత్మిక రాజధానిలో మోదీకి లభించిన ఈ ఆదరణ ఆయన పట్ల ప్రజలకున్న అచంచలమైన నమ్మకానికి నిదర్శనంగా నిలిచింది.
అధ్యాత్మికతతో పాటు అభివృద్ధికి పెద్దపీట వేస్తూ ఉత్తరప్రదేశ్‌లో అత్యంత ప్రతిష్టాత్మకంగా నిర్మించిన 594 కిలోమీటర్ల పొడవైన ‘గంగా ఎక్స్‌ప్రెస్‌వే’ను ప్రధాని మోదీ ఈ పర్యటనలో భాగంగా ప్రారంభించారు. మీరట్, ప్రయాగ్‌రాజ్ నగరాలను కలుపుతూ హై-స్పీడ్ కారిడార్‌గా రూపొందిన ఈ ప్రాజెక్టు రాష్ట్ర రవాణా ముఖచిత్రాన్నే మార్చివేయనుంది. ఈ ఎక్స్‌ప్రెస్‌వే అందుబాటులోకి రావడం వల్ల ప్రయాణ సమయం తగ్గడమే కాకుండా, పారిశ్రామికంగా, ఆర్థికంగా ఈ ప్రాంతం అభివృద్ధి పథంలో దూసుకుపోతుందని ప్రధాని ఆశాభావం వ్యక్తం చేశారు. ఇది కేవలం ఒక రహదారి మాత్రమే కాదని, ఉత్తరప్రదేశ్ అభివృద్ధికి ఒక కీలక మైలురాయి అని ఆయన అభివర్ణించారు.
పర్యటనలో భాగంగా బనారస్ లోకోమోటివ్ వర్క్స్ మైదానంలో జరిగిన ‘మహిళా సమ్మేళనం’లో ప్రధాని మోదీ పాల్గొన్నారు. ఈ సభకు భారీ సంఖ్యలో మహిళలు హాజరై ప్రధానికి నీరాజనాలు పలికారు. మహిళా సాధికారతే తమ ప్రభుత్వ లక్ష్యమని, వారి సంక్షేమం కోసం అనేక పథకాలను అమలు చేస్తున్నామని మోదీ ఈ సందర్భంగా గుర్తుచేశారు. ఈ కార్యక్రమంలో ఉత్తరప్రదేశ్ ముఖ్యమంత్రి యోగి ఆదిత్యనాథ్, బీజేపీ జాతీయ నాయకుడు నితిన్ నబిన్ కూడా పాల్గొన్నారు. సీఎం యోగి నేతృత్వంలో ఉత్తరప్రదేశ్ శాంతిభద్రతల విషయంలో, అభివృద్ధిలో కొత్త పుంతలు తొక్కుతోందని ప్రధాని ప్రశంసించారు. ఆద్యంతం భక్తి, శక్తి, యుక్తి కలగలిసిన ఈ వారణాసి పర్యటన రాష్ట్ర రాజకీయాల్లోనే కాకుండా, జాతీయ స్థాయిలోనూ గొప్ప చర్చకు దారితీసింది.