ప్రపంచ సైనిక సామ్రాజ్యంలో అగ్రగామిగా అమెరికా…

* సగర్వంగా నాలుగో స్థానంలో భారత్.
* పది కీలక ప్రమాణాలతో గ్లోబల్ మిలిటరీ ర్యాంకింగ్స్ వెల్లడి.
* రష్యా, చైనాల తర్వాతి స్థానంలో సత్తా చాటిన మన దేశం.
* దాయాది పాకిస్థాన్‌కు 14వ స్థానం.. 25వ స్థానంలో ఉక్రెయిన్.
*సైనిక ఆస్తులు, సాంకేతికత, అణ్వస్త్రాల వెయిటేజీ ఆధారంగా నివేదిక.
హైదరాబాద్, మహా.
ప్రపంచ దేశాల సైనిక పాటవాన్ని, రక్షణ వ్యవస్థల బలాబలాలను కళ్లకు కట్టే సరికొత్త జాబితా విడుదలైంది. యాహూ ఫైనాన్స్ నివేదిక ఆధారంగా వెలువడిన ఈ జాబితా రక్షణ రంగంలో ఆయా దేశాల ఆధిపత్యాన్ని, అంతర్జాతీయ స్థాయిలో వాటి స్థానాన్ని స్పష్టం చేస్తోంది. అత్యంత శక్తిమంతమైన మిలిటరీ ఉన్న దేశాల జాబితాలో అగ్రరాజ్యం అమెరికా తన ఆధిపత్యాన్ని నిలబెట్టుకుని మొదటి స్థానాన్ని కైవసం చేసుకోగా.. ఎప్పటిలాగే రష్యా, చైనాలు వరుసగా రెండు, మూడు స్థానాల్లో నిలిచాయి. ఈ ప్రతిష్ఠాత్మక జాబితాలో భారతదేశం సగర్వంగా నాలుగో స్థానాన్ని దక్కించుకుని తన ప్రపంచస్థాయి సైనిక సత్తాను మరోసారి ఘనంగా చాటిచెప్పింది.
అగ్రశ్రేణి దేశాల జాబితాను నిశితంగా పరిశీలిస్తే ఐరోపా దిగ్గజం బ్రిటన్ ఐదో స్థానంలో నిలవగా.. ఆసియాలో బలమైన సైనిక శక్తిగా నిరంతరం ఎదుగుతున్న దక్షిణ కొరియా ఆరో స్థానాన్ని దక్కించుకుంది. ఐరోపా ఖండం నుంచి ఫ్రాన్స్ ఏడు, జర్మనీ తొమ్మిది, ఇటలీ పది స్థానాల్లో నిలిచాయి. సాంకేతికంగా అత్యంత ముందుండే జపాన్ ఎనిమిదో స్థానానికే పరిమితమైంది. పశ్చిమాసియాలో చుట్టుపక్కల దేశాల నుంచి నిరంతరం దాడులు ఎదుర్కొంటూనే శత్రువులకు దీటుగా బదులిస్తున్న ఇజ్రాయెల్ 11వ స్థానంలో నిలిచి తన ఉనికిని చాటుకుంది. యూరప్, ఆసియా ఖండాల మధ్య కీలకమైన టర్కీ 12, లాటిన్ అమెరికా దేశమైన బ్రెజిల్ 13వ స్థానాల్లో నిలవగా.. దాయాది దేశం పాకిస్థాన్ 14వ స్థానంలో సరిపెట్టుకుంది. అరబ్ ప్రపంచంలో కీలకమైన ఈజిప్ట్ 15, ఇరాన్ 16, అమెరికా పొరుగు దేశమైన కెనడా 17, స్పెయిన్ 18, థాయ్‌లాండ్ 19, నెదర్లాండ్స్ 20వ స్థానాల్లో నిలిచాయి. ఆగ్నేయాసియా దేశమైన ఇండోనేషియా, ఆస్ట్రేలియా, సౌదీ అరేబియా, పోలాండ్ వరుసగా 21 నుంచి 24 స్థానాల్లో నిలవగా.. సుదీర్ఘకాలంగా రష్యాతో భీకర పోరు సాగిస్తున్న ఉక్రెయిన్ 25వ స్థానాన్ని దక్కించుకుంది.
ఈ గ్లోబల్ మిలిటరీ ర్యాంకులను కేవలం సైనికుల సంఖ్యను లెక్కించి కేటాయించలేదు. ప్రతి దేశపు రక్షణ వ్యవస్థను పది అత్యంత కీలకమైన ప్రామాణికాల ఆధారంగా అత్యంత శాస్త్రీయంగా విశ్లేషించారు. భవిష్యత్తు యుద్ధాలను శాసించే, అత్యధిక విధ్వంసకర సామర్థ్యం ఉన్న అణ్వస్త్రాలకు ఈ మూల్యాంకనంలో అత్యధికంగా 15 శాతం ప్రాధాన్యం ఇచ్చారు. గగనతల ఆధిపత్యాన్ని నిర్ణయించే ఫైటర్ జెట్లతో కూడిన సైనిక విమానాలకు 15 శాతం, విశాలమైన సముద్ర మార్గాల్లో దేశ రక్షణకు కవచంలా నిలిచే నావికా దళ ఆస్తులకు 15 శాతం వెయిటేజీ ఇచ్చారు. ఆధునిక భూతల యుద్ధాల్లో కీలక పాత్ర పోషించే యుద్ధ ట్యాంకులు, ఆయా దేశాలు రక్షణ రంగానికి చేస్తున్న వ్యయం (బడ్జెట్), ఏ క్షణంలోనైనా యుద్ధానికి సన్నద్ధంగా ఉండే క్రియాశీలక సైనిక మానవ వనరులకు పదేసి శాతం చొప్పున వెయిటేజీ కేటాయించారు.
సైనిక ఆయుధ సంపదతో పాటు దేశ ఆర్థిక, సాంకేతిక బలం కూడా యుద్ధ తంత్రంలో అత్యంత కీలకమని నిపుణులు భావించారు. అందుకే దేశ ఆర్థిక పటిష్టతను సూచించే స్థూల దేశీయోత్పత్తికి (జీడీపీ) ఐదు శాతం ప్రాధాన్యం ఇచ్చారు. అంతరిక్షం నుంచి నిఘా వ్యవస్థను పటిష్టం చేసే మిలిటరీ ఉపగ్రహాలు, శత్రువుల వ్యూహాలను చిత్తు చేసే అత్యాధునిక సాంకేతిక సామర్థ్యాలు, నిరంతరం అప్రమత్తంగా ఉంటూ యుద్ధ విమానాలను నడిపేందుకు వీలున్న యాక్టివ్ ఎయిర్‌ఫీల్డ్‌లు, తమ సరిహద్దులు దాటి ఇతర దేశాల్లో ఏర్పాటు చేసుకున్న విదేశీ సైనిక స్థావరాలకు ఐదేసి శాతం చొప్పున వెయిటేజీ ఇచ్చి ఈ నివేదికను రూపొందించారు. కేవలం సైనిక బలగాలు ఉండటమే కాకుండా.. ఆధునిక సాంకేతికత, ఆర్థిక స్థిరత్వం మేళవిస్తేనే అంతర్జాతీయ స్థాయిలో అగ్రరాజ్యంగా మనగలుగుతారనే వాస్తవాన్ని ఈ జాబితా తేటతెల్లం చేసింది. అన్ని రంగాల్లో వేగంగా అభివృద్ధి చెందుతూ, రక్షణ రంగంలో ఆత్మనిర్భరత దిశగా అడుగులు వేస్తున్న భారత్ భవిష్యత్తులో ఈ ర్యాంకింగ్స్‌లో మరింత పైకి ఎగబాకే అవకాశాలు స్పష్టంగా కనిపిస్తున్నాయి.