**దేశమంతా ‘మోదీ’మయం.. బెంగాల్లో కమల వికాసం**
**21కి చేరిన ఎన్డీఏ పాలిత రాష్ట్రాలు.. ఆరుకే పరిమితమైన ‘ఇండియా’ కూటమి**
**సోషల్ మీడియాలో కాషాయ వర్ణంతో దేశ పటాన్ని విడుదల చేసిన బీజేపీ**
హైదరాబాద్, మహా.
సార్వత్రిక రాజకీయ ముఖచిత్రంపై కాషాయ దళం మరోసారి తిరుగులేని ఆధిపత్యాన్ని ప్రదర్శించింది. ఐదు రాష్ట్రాల అసెంబ్లీ ఎన్నికల ఫలితాల్లో భారతీయ జనతా పార్టీ అద్భుత విజయాలను నమోదు చేసుకుంటూ తన సామ్రాజ్యాన్ని మరింత విస్తరించింది. ముఖ్యంగా ఎంతోకాలంగా కలలుగంటున్న పశ్చిమ బెంగాల్ పీఠాన్ని ఎగ్జిట్ పోల్స్ అంచనాలకు తగ్గట్టుగానే కైవసం చేసుకుని చరిత్ర సృష్టించింది. ఒకవైపు బెంగాల్లో కమలనాథులు రికార్డు విజయం సాధించగా, అటు అసోం, పుదుచ్చేరిలలోనూ ఎన్డీఏ కూటమి విజయదుందుభి మోగించింది. ఈ ఎన్నికల ఫలితాలతో దేశ రాజధాని ఢిల్లీ నుంచి బెంగాల్ వరకు భారతావని అంతా కాషాయమయంగా మారుతోందని బీజేపీ వర్గాలు సంబరాలు జరుపుకుంటున్నాయి.
**‘వికసిత్ భారత్’ దిశగా అడుగులు.. ఆసక్తికరమైన పోస్ట్**
బెంగాల్లో 190కి పైగా స్థానాల్లో సత్తా చాటి అతిపెద్ద పార్టీగా అవతరించిన నేపథ్యంలో బీజేపీ అధిష్ఠానం సామాజిక మాధ్యమం ‘ఎక్స్’ వేదికగా ఒక ఆసక్తికరమైన పోస్ట్ చేసింది. భారత్ అంతా మోదీ మయం అంటూ.. ఎన్డీఏ అధికారంలో ఉన్న రాష్ట్రాలను కాషాయ రంగులో దర్శింపజేస్తూ ఒక మ్యాప్ను విడుదల చేసింది. “దేశ కేంద్రమైన ఢిల్లీ నుంచి బెంగాల్ వరకు విస్తరించిన ఈ కాషాయ వర్ణం కేవలం భౌగోళిక చిత్రపటంలో వ్యాప్తి మాత్రమే కాదు. ఇది ప్రగతి పథంలో పయనించాలని దృఢంగా సంకల్పించిన దేశ ప్రజల విశ్వాసానికి ప్రతీక. ఉత్తరాది నుంచి ఈశాన్యం వరకు వస్తున్న ఈ మార్పుల పరంపరలో.. బెంగాల్ విజయం ఒక సరికొత్త అధ్యాయం మాత్రమే. మనమందరం కలిసి 2047 నాటికి ‘వికసిత్ భారత్’ను నిర్మిద్దాం” అని ఆ పోస్ట్లో సగర్వంగా ప్రకటించింది. బెంగాల్ విజయంతో కోల్కతాలోని బీజేపీ కార్యాలయంలో పార్టీ శ్రేణులు ‘ఝాల్మూరి’ పంచుకుంటూ సంబరాల్లో మునిగితేలారు. ఈ ఉత్సాహభరిత వాతావరణం నడుమ ప్రధాని నరేంద్ర మోదీ సోమవారం ఢిల్లీలోని బీజేపీ జాతీయ ప్రధాన కార్యాలయాన్ని సందర్శించనున్నారు.
**దేశంలో 21 రాష్ట్రాలు ఎన్డీఏ వశం**
తాజా విజయాలతో దేశంలో ఎన్డీఏ కూటమి పాలనలో ఉన్న రాష్ట్రాల సంఖ్య రికార్డు స్థాయిలో 21కి చేరింది. బెంగాల్ గెలుపుతో దేశవ్యాప్తంగా బీజేపీ స్వతంత్రంగా పాలిస్తున్న రాష్ట్రాల సంఖ్య 15కు పెరిగింది. దీనికి అదనంగా బీహార్లో జేడీయూ, ఆంధ్రప్రదేశ్లో టీడీపీ, నాగాలాండ్లో నాగా పీపుల్స్ ఫ్రంట్, మేఘాలయలో నేషనల్ పీపుల్స్ పార్టీ మద్దతుతో ఆ సంఖ్య 21కి చేరింది. దేశంలో మొత్తం 29 రాష్ట్రాలు ఉండగా.. మెజారిటీ మార్కు 14.5. దీన్ని బీజేపీ కూటమి ఎప్పుడో అధిగమించింది. ప్రస్తుతం కేరళ, కర్ణాటక, జార్ఖండ్, పంజాబ్, హిమాచల్ ప్రదేశ్, జమ్మూకశ్మీర్, మిజోరం మినహా మిగతా అన్ని రాష్ట్రాలు, కేంద్రపాలిత ప్రాంతాల్లో ఎన్డీఏ కూటమే ప్రభుత్వాలను నడిపిస్తూ అప్రతిహత శక్తిగా అవతరించింది.
**కుదేలైన ‘ఇండియా’ కూటమి**
ఇదే సమయంలో కేంద్రంలో ప్రధాన ప్రతిపక్షంగా ఉన్న ‘ఇండియా’ కూటమి క్రమంగా కుంచించుకుపోతోంది. తాజా ఫలితాలతో ఆ కూటమి బలం దేశవ్యాప్తంగా కేవలం ఆరు రాష్ట్రాలకే పరిమితమైంది. కేరళలో విజయంతో కొంత ఊరట లభించినా.. తమిళనాడులో ఊహించని ఎదురుదెబ్బ తగలడంతో కాంగ్రెస్ నేతృత్వంలోని కూటమి భవిష్యత్తుపై తీవ్ర అనిశ్చితి నెలకొంది. ప్రస్తుతం కాంగ్రెస్ పార్టీ కేవలం తెలంగాణ, కర్ణాటక, హిమాచల్ ప్రదేశ్ రాష్ట్రాల్లో మాత్రమే స్వతంత్ర మెజారిటీతో అధికారంలో ఉంది. జార్ఖండ్లో జేఎంఎంతో కలిసి కూటమిలో ఉండగా, పంజాబ్లో అధికారంలో ఉన్న ఆమ్ ఆద్మీ పార్టీ (ఆప్) ప్రస్తుతం ఇండియా కూటమిలో భాగం కాకపోవడం గమనార్హం. తాజా ఎన్నికల్లో అసోంలోనూ భారీ పరాజయం మూటగట్టుకోవడం కాంగ్రెస్ను మరింత కుంగదీసింది.
**తమిళనాట టీవీకే ప్రభంజనం.. కేరళలో యూడీఎఫ్ హవా**
ఐదు రాష్ట్రాల ఎన్నికల్లో మూడు చోట్ల (బెంగాల్, అసోం, పుదుచ్చేరి) బీజేపీ స్పష్టమైన ఆధిక్యం ప్రదర్శించగా.. తమిళనాడు, కేరళలో స్థానిక సమీకరణాలు గెలుపును నిర్దేశించాయి. ద్రవిడ రాజకీయాలకు కేరాఫ్ అడ్రస్ అయిన తమిళనాడులో ప్రముఖ నటుడు విజయ్ నేతృత్వంలోని తమిళ వెట్రి కజగం (టీవీకే) పార్టీ ప్రభంజనం సృష్టించింది. మొత్తం 234 స్థానాలకు గాను 110కి పైగా స్థానాల్లో ఆధిక్యం ప్రదర్శిస్తూ టీవీకే హవా కొనసాగిస్తోంది. ఇక్కడ అధికార డీఎంకే-కాంగ్రెస్ కూటమి ఘోర పరాజయం పాలుకాగా, ఎన్డీఏ కూటమిలోని అన్నాడీఎంకే అనూహ్యంగా పుంజుకుని గట్టి పోటీనిచ్చింది. ఇక కేరళలో 140 స్థానాలకు గాను 100కు పైగా స్థానాల్లో యునైటెడ్ డెమోక్రటిక్ ఫ్రంట్ (యూడీఎఫ్) ఘన విజయం సాధించి అధికార పీఠాన్ని దక్కించుకుంది.
