తమిళనాట కుప్పకూలిన డీఎంకే కోట.. పరాజయం పాలైన సీఎం స్టాలిన్!

హైదరాబాద్, మహా.
తమిళనాడు రాజకీయ ముఖచిత్రం ఒక్కసారిగా మారిపోయింది. ఎన్నికల సర్వే సంస్థల అంచనాలన్నీ తలకిందులయ్యాయి. దశాబ్దాల పాటు ద్రవిడ రాజకీయాలను శాసించిన, అజేయంగా కనిపించిన అధికార ద్రవిడ మున్నేట్ర కజగం (డీఎంకే) 2026 అసెంబ్లీ ఎన్నికల్లో అనూహ్య పరాజయాన్ని చవిచూసింది. ఏకంగా ముఖ్యమంత్రి ఎం.కే. స్టాలిన్ స్వయంగా ఓటమి పాలుకావడం ఆ పార్టీ దుస్థితికి పరాకాష్టగా నిలిచింది. సంక్షేమ పథకాలను అమలు చేసినప్పటికీ డీఎంకేను ప్రజలు నిర్మొహమాటంగా తిరస్కరించారు. దళపతి విజయ్ సృష్టించిన రాజకీయ సునామీలో ముఖ్యమంత్రి స్టాలిన్ వ్యూహాలు, అధికార యంత్రాంగం పూర్తిగా విఫలమై ద్రావిడ కోట కుప్పకూలింది.
**వారసత్వ రాజకీయాలపై ప్రజల్లో వెగటు**
డీఎంకే ఘోర ఓటమికి పరాకాష్టకు చేరుకున్న వారసత్వ రాజకీయాలే ప్రధాన కారణంగా రాజకీయ విశ్లేషకులు భావిస్తున్నారు. ముఖ్యమంత్రి స్టాలిన్ తన కుమారుడు ఉదయనిధి స్టాలిన్‌కు అతి తక్కువ కాలంలోనే కీలక మంత్రి పదవులు కట్టబెట్టడం, ఆ తర్వాత ఏకంగా ఉప ముఖ్యమంత్రిగా ప్రమోషన్ ఇవ్వడం సామాన్య ఓటర్లకు ఏమాత్రం రుచించలేదు. ప్రభుత్వంలో, పార్టీలో ఒకే కుటుంబం ఆధిపత్యం చెలాయించడంపై క్షేత్రస్థాయిలో తీవ్ర వ్యతిరేకత వ్యక్తమైంది. దశాబ్దాలుగా పార్టీ కోసం పనిచేసిన సీనియర్ నాయకులను సైతం పక్కనపెట్టి ఉదయనిధికి పెద్దపీట వేయడం పార్టీ అంతర్గత క్యాడర్‌లో తీవ్ర నైరాశ్యాన్ని నింపింది. ఈ పరిణామాలతో డీఎంకే పూర్తిగా ఒక కుటుంబ పార్టీగా మారిపోయిందన్న విపక్షాల ప్రచారం ప్రజల్లోకి బలంగా చొచ్చుకుపోయింది.
**నీటిమూటలైన హామీలు.. నడ్డివిరిచిన పన్నులు**
గడచిన 2021 ఎన్నికల్లో అధికారంలోకి వచ్చే ముందు డీఎంకే ఇచ్చిన కీలక హామీలను అమలు చేయకపోవడం కూడా ఓటర్లలో తీవ్ర ఆగ్రహానికి కారణమైంది. ముఖ్యంగా తమిళనాడును ‘నీట్’ పరీక్ష నుంచి మినహాయిస్తామని ఇచ్చిన హామీ ఐదేళ్లు గడిచినా అమలుకు నోచుకోలేదు. ఇది విద్యార్థులు, యువతను తీవ్రంగా నిరాశపరిచింది. దీనికి తోడు ప్రభుత్వం పదే పదే పెంచిన విద్యుత్ ఛార్జీలు, భారీగా పెంచిన ఆస్తి పన్నులు మధ్యతరగతి ప్రజల నడ్డి విరిచాయి. నిత్యావసర వస్తువుల ధరలు ఆకాశాన్ని అంటడంపై ప్రభుత్వానికి ఎలాంటి నియంత్రణ లేకపోవడంతో.. ప్రభుత్వం ఇస్తున్న మహిళా సంక్షేమ నిధుల వంటి పథకాలు ఈ పెరిగిన ఆర్థిక భారం ముందు ఏమాత్రం ఆదుకోలేకపోయాయి.
**అవినీతి ఆరోపణలు.. మత్తు మాఫియా పడగ**
ప్రభుత్వ వ్యతిరేకత ప్రజల్లో స్పష్టంగా కనిపించడానికి మంత్రుల అవినీతి ఆరోపణలు మరో ప్రధాన కారణం. స్టాలిన్ కేబినెట్‌లోని సెంథిల్ బాలాజీ, పొన్ముడి వంటి సీనియర్ మంత్రులు మనీ లాండరింగ్, అవినీతి కేసుల్లో చిక్కుకుని జైలు పాలు కావడం ప్రభుత్వ పారదర్శకతను, ఇమేజ్‌ను తీవ్రంగా దెబ్బతీసింది. వీటికి తోడు, గత ఐదేళ్ల పాలనలో రాష్ట్రవ్యాప్తంగా గంజాయి, సింథటిక్ డ్రగ్స్ విచ్చలవిడిగా మారాయన్న వాదనను ప్రతిపక్ష అన్నాడీఎంకేతో పాటు టీవీకే పార్టీలు బలంగా ప్రజల్లోకి తీసుకెళ్లడంలో సఫలమయ్యాయి. డ్రగ్స్ మాఫియాకు అధికార పార్టీ నేతల అండదండలు ఉన్నాయన్న ఆరోపణలు యువత తల్లిదండ్రుల్లో భద్రతాపరమైన అభద్రతా భావాన్ని, తీవ్ర ఆందోళనను రేకెత్తించాయి.
**అంచనాలు తలకిందులు చేసిన ‘దళపతి’ సునామీ**
ఎన్నికల వ్యూహాలను రచించడంలో అధికార డీఎంకే పూర్తిగా విఫలమైంది. వారి దృష్టి అంతా కేవలం తమ సంప్రదాయ ప్రత్యర్థి అయిన అన్నాడీఎంకే పైనే ఉండిపోయింది. కానీ దళపతి విజయ్ స్థాపించిన ‘తమిళగ వెట్రి కళగం (టీవీకే)’ రూపంలో క్షేత్రస్థాయిలో వస్తున్న సైలెంట్ సునామీని వారు ఏమాత్రం అంచనా వేయలేకపోయారు. దశాబ్దాలుగా డీఎంకేకు కంచుకోటగా ఉన్న దళితులు, మైనార్టీలు, యువత ఈసారి ప్రత్యామ్నాయంగా ఒక బలమైన, ఆకర్షణీయమైన నాయకుడు కనిపించేసరికి గంపగుత్తగా విజయ్ వైపు మొగ్గుచూపారు. సాధారణంగా కొత్త పార్టీ బరిలో ఉంటే ప్రభుత్వ వ్యతిరేక ఓట్లు చీలిపోయి అధికార పార్టీకి లాభిస్తుంది. కానీ ఇక్కడ అధికార వ్యతిరేక ఓటు చీలకపోగా, డీఎంకే సొంత ఓటు బ్యాంకుకు భారీ గండి పడటంతో పరాజయం అనివార్యమైంది.