నార్వేతో ద్వైపాక్షిక చర్చలు….

నార్వేతో ద్వైపాక్షిక చర్చలు.
• సైనిక ఘర్షణలతో శాశ్వత శాంతి అసాధ్యం.
• పహల్గాం దాడి సమయంలో నార్వే అండ.
• ఉగ్రవాదంపై పోరులో నిజమైన స్నేహాన్ని చాటిన నార్వే – ప్రధాని మోదీ.
* మోదీకి నార్వే అత్యున్నత పురస్కారం.
ఓస్లో,మహా.
నాలుగు ఐరోపా దేశాల పర్యటనలో భాగంగా నార్వే రాజధాని ఓస్లో చేరుకున్న భారత ప్రధాన మంత్రి నరేంద్ర మోదీ, ఆ దేశ ప్రధాని జోనాస్ గహర్ స్టోర్‌తో కీలక ద్వైపాక్షిక చర్చలు జరిపారు. ఉగ్రవాద నిర్మూలన, ప్రపంచ శాంతి, ద్వైపాక్షిక వాణిజ్యం, సముద్ర భద్రత తదితర కీలక అంశాలపై ఇరు దేశాల నేతలు సుదీర్ఘంగా మంతనాలు సాగించారు. అత్యంత క్లిష్టసమయంలో ఉగ్రవాదానికి వ్యతిరేకంగా భారతదేశానికి నార్వే అండగా నిలిచి తన నిజమైన స్నేహాన్ని చాటుకుందని ప్రధాని నరేంద్ర మోదీ ఈ సందర్భంగా ప్రశంసించారు. ఉగ్రవాదాన్ని దాని అన్ని రూపాల్లోనూ సమూలంగా నిర్మూలించడం ప్రపంచ దేశాల ఉమ్మడి బాధ్యత అని ఆయన స్పష్టం చేశారు.
**సైనిక ఘర్షణలతో శాశ్వత శాంతి అసాధ్యం**
సైనిక ఘర్షణల ద్వారా మాత్రమే శాశ్వత శాంతిని సాధించలేమని, ఉక్రెయిన్, పశ్చిమాసియా సంక్షోభాలను కేవలం చర్చలు, దౌత్య మార్గాల ద్వారానే పరిష్కరించుకోవాలని ప్రధాని మోదీ పిలుపునిచ్చారు. నియమ, నిబంధనలతో కూడిన ప్రపంచ వ్యవస్థను భారత్, నార్వే దేశాలు బలంగా విశ్వసిస్తాయని, శాంతి స్థాపన కోసం జరిగే ప్రతి ప్రయత్నానికి తమ మద్దతు ఉంటుందని ఆయన ఉద్ఘాటించారు. అలాగే, పెరుగుతున్న ప్రపంచ సవాళ్లను సమర్థవంతంగా ఎదుర్కొనేందుకు ఐక్యరాజ్యసమితి లాంటి అంతర్జాతీయ సంస్థలలో తక్షణమే సంస్కరణలు తీసుకురావాల్సిన అవసరం ఉందని నొక్కి చెప్పారు. ఈ విషయంలో భారత్, నార్వే ఒకే అంచనాతో, ఏకాభిప్రాయంతో ఉన్నాయని ఆయన వెల్లడించారు.
**పహల్గాం దాడి సమయంలో నార్వే అండ**
గతేడాది పహల్గాంలో హిందూ పురుషులే లక్ష్యంగా జరిగిన పాక్ ప్రేరేపిత ఉగ్రదాడిలో 26 మంది భారత పౌరులు ప్రాణాలు కోల్పోయిన విషయాన్ని ప్రధాని మోదీ ప్రత్యేకంగా గుర్తుచేసుకున్నారు. ఆ క్లిష్ట సమయంలో ఉగ్రవాదానికి వ్యతిరేకంగా భారతదేశానికి అండగా నిలబడి నార్వే తన నిజమైన స్నేహాన్ని చాటుకుందని ప్రశంసించారు. వాస్తవానికి గత ఏడాదే తన నార్వే పర్యటన జరగాల్సి ఉన్నప్పటికీ, పహల్గాం ఉగ్రదాడి వల్లే వాయిదా వేసుకోవాల్సి వచ్చిందని ఆయన వివరించారు. ఆ విపత్కర సమయంలో నార్వే చూపిన సంఘీభావానికి మోదీ తన హృదయపూర్వక కృతజ్ఞతలు తెలియజేశారు.
**వ్యూహాత్మక భాగస్వామ్యం.. గ్రీన్ స్ట్రేటజీ**
భారత్, నార్వేల మధ్య ఉన్న వ్యూహాత్మక భాగస్వామ్యం వల్ల ఇరు దేశాలకు అనేక ప్రయోజనాలు ఉన్నాయని, నార్వే నుంచి సాంకేతికత, పెట్టుబడులు భారత్‌కు భారీగా వస్తున్నాయని ప్రధాని వివరించారు. ఇటీవల భారత్‌, ఈయూ మధ్య జరిగిన చారిత్రక ఒప్పందం ఇరు దేశాల వాణిజ్య బంధాన్ని మరింత బలోపేతం చేస్తుందని ఆశాభావం వ్యక్తం చేశారు. ఇంజినీరింగ్ విభాగాల్లోనూ ఇరుదేశాల మధ్య అనేక ఒప్పందాలు జరిగాయని, ముఖ్యంగా ఇస్రో, నార్వే స్పేస్ ఏజెన్సీల మధ్య ఉన్న ఒప్పందాలతో అంతరిక్ష పరిశోధనలు వేగవంతం అవుతున్నాయని తెలిపారు. పర్యావరణ పరిరక్షణ కోసం ఇరు దేశాలు సంయుక్తంగా అవలంబిస్తున్న గ్రీన్ స్ట్రేటజీ ప్రపంచానికే ఆదర్శంగా నిలుస్తుందని మోదీ పేర్కొన్నారు.
**మోదీకి నార్వే అత్యున్నత పురస్కారం**
మారిటైమ్ భద్రత విషయంలోనూ భారత్, నార్వే కలిసి పనిచేస్తున్నాయని, భారతదేశం నేతృత్వంలోని ‘ఇండో-పసిఫిక్ ఓషన్స్ ఇనీషియేటివ్’లో చేరాలని నార్వే తీసుకున్న నిర్ణయాన్ని మోదీ అభినందించారు. రెండు ప్రధాన సముద్రతీర దేశాలుగా సముద్ర ఆధారిత ఆర్థిక వ్యవస్థ, సముద్ర భద్రత, సామర్థ్య పెంపుదలలో సహకారాన్ని మరింత బలోపేతం చేయడానికి కలిసి పనిచేస్తామని స్పష్టం చేశారు. ఈ చారిత్రక పర్యటనలో భాగంగా నార్వే ప్రభుత్వం, తమ దేశ అత్యున్నత పౌర పురస్కారమైన ‘గ్రాండ్ క్రాస్ ఆఫ్ ది రాయల్ నార్వేజియన్ ఆర్డర్ ఆఫ్ మెరిట్’తో ప్రధాని నరేంద్ర మోదీని ఘనంగా సత్కరించింది. ప్రధాని మోదీ అందుకున్న అంతర్జాతీయ పురస్కారాల్లో ఇది 32వ పురస్కారం కావడం విశేషం.