అవినీతిపై సీఎం విజయ్‌ ఉక్కుపాదం….

అవినీతిపై సీఎం విజయ్‌ ఉక్కుపాదం.
లంచాధికారిని పట్టిస్తే రూ.లక్ష నజరానా.
చెన్నై,మహా.
తమిళనాడు రాష్ట్ర ముఖ్యమంత్రిగా బాధ్యతలు చేపట్టిన విజయ్‌ అవినీతి రహిత పాలన దిశగా సంచలన నిర్ణయాలకు శ్రీకారం చుట్టారు. ‘ప్రజల సొమ్ములో ఒక్క పైసా కూడా ముట్టుకోను’ అని స్పష్టం చేసిన ఆయన.. అదే స్ఫూర్తితో అవినీతి అధికారుల భరతం పట్టేందుకు కఠిన చర్యలకు ఉపక్రమించారు. ప్రభుత్వ కార్యాలయాల్లో ఎవరైనా అధికారి కనీసం రూ.వెయ్యి లంచం డిమాండ్ చేసినా, ఆ విషయాన్ని ఆధారాలతో సహా ప్రభుత్వానికి ఫిర్యాదు చేసిన వారికి ఏకంగా రూ.లక్ష బహుమతిగా అందజేస్తామని నూతన ప్రభుత్వం ఒక సంచలన ప్రకటన చేసింది. ఈ వినూత్న పథకం ద్వారా వ్యవస్థలో పారదర్శకతను పెంచడంతో పాటు, లంచగొండితనానికి పూర్తిగా చెక్‌ పెట్టాలని సర్కారు భావిస్తోంది.
అవినీతి ఆరోపణలు ఎదుర్కొంటున్న అధికారులపై నేరుగా సామాన్య ప్రజల నుంచే సమాచారం సేకరించేందుకు వీలుగా ప్రభుత్వం పకడ్బందీ వ్యవస్థను రూపకల్పన చేసింది. బాధితులు ఎవరైనా ఫిర్యాదు చేయడానికి సులభంగా ఉండేలా ప్రత్యేకంగా ఒక టోల్ ఫ్రీ హెల్ప్‌లైన్‌ నంబర్‌తో పాటు, అత్యాధునిక ఆన్‌లైన్ పోర్టల్‌ను కూడా అందుబాటులోకి తీసుకురానున్నారు. ప్రజలు కార్యాలయాల చుట్టూ తిరగాల్సిన పనిలేకుండా ఎక్కడి నుంచైనా తమ ఫిర్యాదులను నమోదు చేసేలా ఈ నూతన వ్యవస్థను తీర్చిదిద్దుతున్నారు. ఫిర్యాదుదారుల వ్యక్తిగత వివరాలను అత్యంత గోప్యంగా ఉంచుతామని, అందిన ఫిర్యాదులపై నిర్దిష్ట కాలవ్యవధిలో విచారణ జరిపి తప్పు చేసిన వారిపై ఎంతటి కఠిన చర్యలకైనా వెనుకాడబోమని ప్రభుత్వం స్పష్టం చేసింది.
తమిళనాడు రాష్ట్రాన్ని అవినీతి రహితంగా తీర్చిదిద్దడమే తన ప్రథమ కర్తవ్యమని ముఖ్యమంత్రి విజయ్ భావిస్తున్నారు. రాష్ట్ర అప్పుల భారాన్ని తగ్గించి, సంక్షేమ పథకాలు అర్హులకు నేరుగా చేరాలంటే పరిపాలనా యంత్రాంగంలో అవినీతిని కూకటివేళ్లతో పెకలించాలని ఆయన యోచిస్తున్నారు. ఈ తాజా బహుమతి ప్రకటన అక్రమార్కుల్లో వణుకు పుట్టిస్తుండగా.. సామాన్య ప్రజల్లో మాత్రం నూతన ప్రభుత్వ చిత్తశుద్ధి పట్ల హర్షం వ్యక్తమవుతోంది. పాలనలో పూర్తి స్థాయి జవాబుదారీతనాన్ని తీసుకురావడానికి ముఖ్యమంత్రి తీసుకున్న ఈ నిర్ణయం ఇప్పుడు దేశవ్యాప్తంగా ఆసక్తికర చర్చకు దారితీసింది.