తెలుగు నేలపై భానుడి రౌద్రరూపం….

తెలుగు నేలపై భానుడి రౌద్రరూపం.
* వడగాడ్పులకి వంద దాటిన మృతుల సంఖ్య.
*నిప్పుల కొలిమిలా మారిన ఉమ్మడి రాష్ట్రాలు.
* రికార్డు స్థాయిలో 48.3 డిగ్రీల ఉష్ణోగ్రతలు.
* తెలుగు రాష్ట్రాలను వణికిస్తున్న ఎల్‌నినో సెగ.
* శరవేగంగా పెరుగుతున్న మృతుల సంఖ్య.
* హై అలర్ట్ ప్రకటించిన సర్కార్.

హైదరాబాద్, మహా.

రెండు తెలుగు రాష్ట్రాల్లోనూ వేసవి ఉష్ణోగ్రతలు మునుపెన్నడూ లేని విధంగా అత్యంత తీవ్ర స్థాయికి చేరుకున్నాయి. గత కొన్ని దశాబ్దాల రికార్డులను తిరగరాస్తూ భానుడి తీవ్రత అసాధారణంగా పెరగడంతో ఆంధ్రప్రదేశ్, తెలంగాణవ్యాప్తంగా పగటిపూట సాధారణ జనజీవనం పూర్తిగా స్థంభించిపోయింది. రికార్డు స్థాయిలో 48.3 డిగ్రీలకు చేరిన ఉష్ణోగ్రతలు, నిరంతరాయంగా వీస్తున్న తీవ్ర వడగాడ్పుల కారణంగా ఈ ఏడాది వేసవి ప్రారంభమైనప్పటి నుండి నేటి వరకు వడదెబ్బకు గురై రెండు రాష్ట్రాల్లో కలిపి వందకు పైగా ప్రాణాలు కోల్పోవడం ఆందోళన కలిగిస్తోంది. ఒకవైపు గ్రామీణ, పట్టణ ప్రాంతాల్లో విస్తరిస్తున్న ఈ వేసవి విలయం, మరోవైపు అసాధారణ ఉష్ణోగ్రతల వల్ల తలెత్తుతున్న షార్ట్ సర్క్యూట్లతో కోట్ల రూపాయల ఆస్తి నష్టాన్ని మిగులుస్తున్న ఘోర అగ్నిప్రమాదాలు తెలుగు రాష్ట్రాలను కలవరపాటుకు గురిచేస్తున్నాయి. పరిస్థితి తీవ్రతను పరిగణనలోకి తీసుకున్న ఉమ్మడి రాష్ట్రాల ప్రభుత్వాలు అత్యవసర ‘రెడ్ అలర్ట్’ ప్రకటించి, క్షేత్రస్థాయిలో ప్రజల ప్రాణ రక్షణే ధ్యేయంగా యుద్ధ ప్రాతిపదికన నివారణ చర్యలు చేపట్టాయి.

**రికార్డు స్థాయి గరిష్ట ఉష్ణోగ్రతలు**

ఈ వేసవి కాలంలో ఉష్ణోగ్రతలు మునుపటి రికార్డులన్నింటినీ తిరగరాస్తూ అత్యంత భయంకరమైన స్థాయికి చేరుకున్నాయి. గత కొన్ని రోజులుగా వరుసగా వడగాడ్పులు కొనసాగుతుండగా, ఆంధ్రప్రదేశ్ రాష్ట్రంలో అత్యధికంగా తూర్పుగోదావరి జిల్లా పరిధిలోని చిట్యాలలో ఏకంగా 48.3 డిగ్రీల అసాధారణ గరిష్ట ఉష్ణోగ్రత నమోదైంది. తెలంగాణ రాష్ట్రంలో పరిశీలిస్తే కుమురం భీం ఆసిఫాబాద్ జిల్లాలోని కుంచవెల్లి, కాగజ్‌నగర్ ప్రాంతాలతో పాటు జగిత్యాల జిల్లా ధర్మపురిలో అత్యధికంగా 46.4 డిగ్రీల ఉష్ణోగ్రతలు నమోదయ్యాయి. భద్రాద్రి కొత్తగూడెం జిల్లా మణుగూరు, ఖమ్మం రూరల్ మండలం పల్లిగూడెం, వైరా ప్రాంతాలలో కూడా ఉష్ణోగ్రతలు 46.3 డిగ్రీలుగా రికార్డయ్యాయి. ఈ ప్రాంతాలలో గత పది రోజులకు పైగా నిరంతరాయంగా పగటి ఉష్ణోగ్రతలు నలభై ఐదు డిగ్రీలకు పైనే నమోదు కావడం గమనార్హం.

**మరణాల సంఖ్య 100 దాటిన విలయం**

ఈ వేసవి కాలంలో వడదెబ్బ కారణంగా తెలుగు రాష్ట్రాలలో మరణాల సంఖ్య భారీగా పెరిగింది. విపత్తు నిర్వహణ శాఖలు , స్థానిక క్షేత్రస్థాయి నివేదికల ప్రకారం గత మూడు రోజులుగా ఎండ తీవ్రత ఊహించని విధంగా పెరగడంతో రెండు రాష్ట్రాల్లో కలిపి మొత్తం మరణాల సంఖ్య 100 దాటింది. కేవలం శనివారం ఒక్కరోజునే రెండు తెలుగు రాష్ట్రాల్లో కలిపి 67 మంది వడదెబ్బకు గురై ప్రాణాలు కోల్పోగా, అందులో తెలంగాణలో 40 మంది, ఏపీలో 16 మంది బలయ్యారు. అయితే జిల్లా కలెక్టర్ల నుండి అందిన నివేదికల ప్రకారం తెలంగాణలో 16 మరణాలను ప్రభుత్వం అధికారికంగా ధృవీకరించింది. మరణాల సంఖ్య రోజురోజుకూ వేగంగా పెరుగుతుండడంతో రెండు రాష్ట్రాల ఆరోగ్య శాఖలు అత్యవసర రక్షణ చర్యలు ముమ్మరం చేశాయి.

తెలంగాణ రాష్ట్రంలో నమోదైన వడదెబ్బ మరణాల విస్తృతిని పరిశీలిస్తే ఉమ్మడి వరంగల్ జిల్లా అత్యంత తీవ్రంగా ప్రభావితమై అత్యధికంగా ఇరవై మూడు మందిని కోల్పోయింది. ఆ తర్వాత స్థానంలో ఉమ్మడి కరీంనగర్ జిల్లా నిలిచి అక్కడ పెద్దపల్లి, కరీంనగర్ పరిధిలో కలిపి పదకొండు మంది మృత్యువాత పడ్డారు. ఉమ్మడి ఖమ్మం జిల్లా పరిధిలో భద్రాద్రి కొత్తగూడెం మరియు ఖమ్మం ఏరియాలలో కలిపి ఏడుగురు భానుడి భగభగలకు బలయ్యారు. అలాగే ఉమ్మడి ఆదిలాబాద్ జిల్లా పరిధిలో ఐదుగురు, ఉమ్మడి నల్గొండ జిల్లాలో ఐదుగురు ఎండ తీవ్రతకు చనిపోయారు. ప్రభుత్వ అధికారిక ధృవీకరణ నివేదికల ప్రకారం జయశంకర్ భూపాలపల్లిలో నలుగురు, వరంగల్ అర్బన్, కరీంనగర్, నిజామాబాద్ జిల్లాలలో తలా ముగ్గురు చొప్పున, జోగులాంబ గద్వాల, రంగారెడ్డి, సూర్యాపేట జిల్లాలలో ఒక్కొక్కరు చొప్పున మరణించారు.

ఆంధ్రప్రదేశ్ రాష్ట్రంలో కూడా వడదెబ్బ మరణాల సంఖ్య ఆందోళనకరంగా పెరిగి ఇక్కడి జిల్లాలలో తీవ్ర విషాదాన్ని మిగిల్చింది. ముఖ్యంగా ఎన్టీఆర్ జిల్లా , విజయవాడ నగర పరిధిలో ఎండ తీవ్రతకు అత్యధికంగా పది మంది ప్రాణాలు కోల్పోయారు. ఉమ్మడి పశ్చిమ గోదావరి మరియు ఏలూరు జిల్లాల పరిధిలో ఏడుగురు వడదెబ్బతో మృత్యువాత పడ్డారు. గుంటూరు, పల్నాడు జిల్లాల పరిధిలో తలా నలుగురు చొప్పున చనిపోగా, తూర్పు గోదావరి జిల్లాలో ఇద్దరు, డాక్టర్ బి.ఆర్. అంబేద్కర్ కోనసీమ జిల్లాలో ఇద్దరు బలయ్యారు. అలాగే అనకాపల్లి జిల్లాలో ఒకరు చనిపోయినట్లు నివేదికలు స్పష్టం చేస్తున్నాయి. ఈ ప్రాంతాల్లోని పారిశుద్ధ్య కార్మికులు, వలస కూలీలు ఎండ తీవ్రతను తట్టుకోలేక రోడ్లపైనే స్పృహతప్పి పడిపోయి మరణించారు.
వివిధ జిల్లాల నుండి అందిన క్షేత్రస్థాయి నివేదికల ప్రకారం మరణించిన వారిలో అత్యధికులు వృద్ధులు, దినసరి వలస కూలీలు , నిరాశ్రయులే ఉన్నారు. కరీంనగర్ , పెద్దపల్లి జిల్లాలలో పెద్దపల్లి టౌన్‌కు చెందిన ఫయాజ్, మరేడుగొండకు చెందిన గొర్రెల కాపరి కోర మల్లయ్య, సుల్తానాబాద్‌కు చెందిన న్యాథరి మొండయ్య, రాముగిరి మండలం ఆదివారంపేటకు చెందిన బూడిగ కమల ఎండ తీవ్రతకు బలయ్యారు. ఖమ్మం, భద్రాద్రి కొత్తగూడెం పరిధిలో అశ్వాపురం మండలం మొండికుంటకు చెందిన జెట్టి పూలమ్మ, పాల్వంచకు చెందిన పి. వెంకటేశ్వరరావు, జులూరుపాడు మండలం కరివారిగూడెంకు చెందిన ధరావత్ నరసింహారావు, భద్రాచలానికి చెందిన నరేష్ వడదెబ్బతో మరణించారు. ఏపీలోని పల్నాడు జిల్లా వేమవరానికి చెందిన జల్లా కొండలు, కోటికపాలుడికి చెందిన మేకా నిర్మల, అనకాపల్లి జిల్లాకు చెందిన వికలాంగుడు గాడిగోయిల సత్యనారాయణ వడదెబ్బతో మరణించినట్లు క్షేత్రస్థాయిలో గుర్తించారు.

**రాష్ట్రవ్యాప్తంగా ఎగసిపడిన అగ్నికీలలు**

ఎండల తీవ్రతకు తోడు విద్యుత్ వినియోగం విపరీతంగా పెరగడంతో తెలుగు రాష్ట్రాలలో ఘోర అగ్నిప్రమాదాలు చోటుచేసుకున్నాయి. ముఖ్యంగా తెలంగాణలోని మేడిగడ్డ వద్ద ఉన్న ఎల్ అండ్ టీ ప్రాజెక్ట్ కార్యాలయంలో భారీ అగ్నిప్రమాదం సంభవించింది, అక్కడ షార్ట్ సర్క్యూట్ కారణంగా మంటలు ఎగసిపడి కార్యాలయానికి సంబంధించిన అనేక కీలక పత్రాలు, కంప్యూటర్లు పూర్తిగా బూడిదయ్యాయి. ఆంధ్రప్రదేశ్‌, ఒడిశా సరిహద్దుల్లోని ఉమ్మడి మాచ్‌ఖండ్ జలవిద్యుత్ కేంద్రంలో కూడా భారీ అగ్నిప్రమాదం సంభవించి విద్యుత్ ఉత్పాదనకు ఆటంకం కలిగింది. ఏలూరు జిల్లా జంగారెడ్డిగూడెంలో ఒక పెద్ద ప్యాకింగ్ పరిశ్రమలో సంభవించిన ప్రమాదం, గుంటూరు , హైదరాబాద్‌లోని జీడిమెట్ల పారిశ్రామిక ప్రాంతాలలోని రసాయన గిడ్డంగిలలో జరిగిన అగ్నిప్రమాదాలు కోట్ల రూపాయల నష్టాన్ని మిగిల్చాయి. వ్యవసాయ రంగంలో కోతకు వచ్చిన వందలాది ఎకరాల వరి పంట, పత్తి నిల్వలు మరియు ఆయిల్ పామ్ తోటలు బూడిదయ్యాయి.

పరిస్థితి తీవ్రతను గమనించిన తెలంగాణ ముఖ్యమంత్రి రేవంత్ రెడ్డి, ఆంధ్రప్రదేశ్ ముఖ్యమంత్రి చంద్రబాబు నాయుడు అధికారులతో అత్యవసర సమీక్షలు నిర్వహించారు. వడదెబ్బ మరణాలను అరికట్టడానికి జిల్లా కలెక్టర్లకు ప్రత్యేక అధికారాలు అప్పగించారు. వడదెబ్బ కారణంగా మరణించిన వారి కుటుంబాలకు నాలుగు లక్షల రూపాయల చొప్పున ఎక్స్‌గ్రేషియాను తక్షణమే విడుదల చేయాలని తెలంగాణ రెవెన్యూ శాఖ మంత్రి పొంగులేటి శ్రీనివాసరెడ్డి ఉత్తర్వులు జారీ చేశారు. భారత వాతావరణ శాఖ హెచ్చరికల ప్రకారం రాబోయే మూడు రోజుల పాటు తెలుగు రాష్ట్రాలలో వడగాడ్పుల తీవ్రత ఇలాగే కొనసాగే అవకాశం ఉన్నందున, ప్రజలంతా అత్యంత అప్రమత్తంగా ఉంటూ మధ్యాహ్నం వేళల్లో ఇళ్ల నుండి బయటకు రావొద్దని, తగినన్ని నీరు , ద్రవపదార్థాలు తీసుకుంటూ సురక్షితంగా ఉండాలని వాతావరణ నిపుణులు సూచిస్తున్నారు.