తెలంగాణ ఎంపీల అండతోనే మోదీ ప్రధాని అయ్యారు.
* అభివృద్ధిపై రాజకీయం వద్దు: సీఎం రేవంత్ రెడ్డి.
* సైబరాబాద్ పరిధిలో రూ.1,674 కోట్లతో మెగా ప్రాజెక్టులకు శంకుస్థాపన.
* బీజేపీ ఎంపీలు గుజరాత్కు గులాంలా ఎందుకు పని చేస్తున్నారు?
*కాలుష్యం తీవ్రమైతే దిల్లీ తరహాలో పీఎంవో మూసేసే పరిస్థితి రావొద్దు.
* రాబోయే రెండేళ్లు రాజకీయం పక్కనబెట్టి అభివృద్ధికి సహకరించాలని ముఖ్యమంత్రి పిలుపు.
హైదరాబాద్, మహా.
తెలంగాణ నుంచి గెలిచిన ఎనిమిది మంది భారతీయ జనతా పార్టీ (బీజేపీ) ఎంపీల బలంతోనే నరేంద్ర మోదీ దేశానికి మళ్లీ ప్రధానమంత్రి అయ్యారని ముఖ్యమంత్రి ఎ. రేవంత్ రెడ్డి వ్యాఖ్యానించారు. రాష్ట్రంలో ఎన్నికలు ముగిసిపోయినందున, తదుపరి ఎన్నికలకు మరో ఆరు నెలల ముందు మాత్రమే రాజకీయం మాట్లాడుకుందామని.. ఈ లోపు రాబోయే రెండేళ్ల కాలం అందరం కలిసికట్టుగా రాష్ట్రాన్ని అభివృద్ధి చేసుకుందామని ఆయన పిలుపునిచ్చారు. సోమవారం సైబరాబాద్ పరిధిలోని మియాపూర్ లక్ష్మీనగర్లో జరిగిన భారీ బహిరంగ సభలో ముఖ్యమంత్రి పాల్గొని ప్రసంగించారు. తెలంగాణ ప్రజలు ఓట్లేసి గెలిపించిన ఎనిమిది మంది బీజేపీ ఎంపీలు ఈ రాష్ట్రానికి కేంద్రం నుంచి ఏం పట్టుకొచ్చారో సమాధానం చెప్పాలని డిమాండ్ చేశారు. ఇక్కడి ప్రజల ప్రయోజనాలను పక్కనబెట్టి, బీజేపీ ఎంపీలు గుజరాత్కు గులాంలుగా ఎందుకు వ్యవహరిస్తున్నారని ఆయన నిలదీశారు. తన రెండేళ్ల పాలనలో ఏం చేయలేదని ప్రశ్నిస్తున్న విపక్ష నేతలు, ముందు తాము సాధించిందేమిటో ప్రజలకు వివరించాలని స్పష్టం చేశారు.
**మూసి ప్రక్షాళనకు బీజేపీ ఎందుకు అడ్డుపడుతోంది?**
కేంద్ర మంత్రి జి. కిషన్ రెడ్డిపై ముఖ్యమంత్రి రేవంత్ రెడ్డి పదునైన విమర్శలు గుప్పించారు. తెలంగాణకు రావాల్సిన సాగునీటి, నీటి పారుదల ప్రాజెక్టుల నిధులు రాకుండా కేంద్ర మంత్రి నిరంతరం అడ్డుపుల్లలు వేస్తున్నారని తీవ్రస్థాయిలో ధ్వజమెత్తారు. ఉత్తర భారత దేశంలో సబర్మతి, గంగా, యమునా నదులను ప్రక్షాళన చేస్తే ఆహా ఓహో అంటూ భజన చేసే స్థానిక బీజేపీ నేతలు.. హైదరాబాద్ గుండెకాయ లాంటి మూసి నది ప్రక్షాళనకు మాత్రం ఎందుకు సహకరించడం లేదని ప్రశ్నించారు. మూసి నదిని శుద్ధి చేసి నగరాన్ని కాపాడేందుకు కేంద్రం నుంచి నిధులు తీసుకురావాలని, ఆ దిశగా కేంద్ర ప్రభుత్వంపై ఒత్తిడి తెచ్చేందుకు బీజేపీ ఎంపీలు ముందుకు రావాలని హితవు పలికారు.
**హైదరాబాద్ నివాస అనుకూల నగరం.. దిల్లీలా మారొద్దు**
దేశ ఆర్థిక వ్యవస్థను నడిపించడంలో దిల్లీ, ముంబయి, కోల్కతా, చెన్నై, బెంగళూరులతో పాటు హైదరాబాద్ అత్యంత కీలకమైన పాత్ర పోషిస్తోందని ముఖ్యమంత్రి పేర్కొన్నారు. జాతీయ స్థాయిలో ఎదురవుతున్న పర్యావరణ ముప్పును ప్రస్తావిస్తూ.. దేశ రాజధాని దిల్లీలో కాలుష్యం ఏ స్థాయికి చేరిందో అందరం చూశామని, వాతావరణం దెబ్బతినడం వల్ల అక్కడ పాఠశాలలతో పాటు ఏకంగా ప్రధానమంత్రి కార్యాలయాన్నే (పీఎంవో) మూసివేయాల్సిన పరిస్థితులు వచ్చాయని గుర్తుచేశారు. దేశంలోని మెట్రో నగరాలన్నీ కాలుష్యం, తీవ్రమైన ట్రాఫిక్ సమస్యలతో కొట్టుమిట్టాడుతుంటే.. హైదరాబాద్ మాత్రం ఇప్పటికీ నివాసానికి అత్యంత అనుకూలమైన సురక్షిత నగరంగా నిలిచిందని కొనియాడారు. భవిష్యత్తులో పెద్ద నగరాల్లో ఉన్న లాంటి జటిలమైన సమస్యలు ఇక్కడ ఉత్పన్నం కాకుండా చూసేందుకే నిపుణులతో ప్రత్యేక కమిటీని వేశామన్నారు. నగర పాలనా సమన్వయాన్ని మరింత బలోపేతం చేయడానికే మూడు వేర్వేరు మున్సిపల్ కార్పొరేషన్లను ఏర్పాటు చేసినట్లు స్పష్టం చేశారు. దేశ ఐటీ ఎగుమతుల్లో ఒక్క హైదరాబాద్ నుంచే ఏకంగా 16.77 శాతం సేవలు అందుతుండటం మన నగర వైభవానికి నిదర్శనమని చెప్పారు.
**రూ.1,674 కోట్ల అభివృద్ధి పనులకు మహోజ్వల శ్రీకారం**
భాగ్యనగర పశ్చిమ ప్రాంత రవాణా రంగంలో విప్లవాత్మక మార్పులు తీసుకువస్తూ సైబరాబాద్ మున్సిపల్ కార్పొరేషన్ (సీఎంసీ) పరిధిలో రూ. 1674.74 కోట్ల వ్యయంతో చేపట్టనున్న పలు భారీ మౌలిక వసతుల ప్రాజెక్టులకు ముఖ్యమంత్రి రేవంత్ రెడ్డి శంకుస్థాపనలు చేశారు. ఇందులో భాగంగా ఇజ్జత్నగర్లో రూ. 161 కోట్లతో నిర్మించనున్న సైబరాబాద్ మున్సిపల్ కార్పొరేషన్ నూతన పరిపాలనా భవన సముదాయానికి, ఖానామెట్లో సీఎంసీ భవనానికి పునాదిరాయి వేశారు. అలాగే మియాపూర్లో ట్రాఫిక్ కష్టాలు తీర్చేందుకు రూ. 530 కోట్ల భారీ అంచనాతో మియాపూర్ ఎక్స్ రోడ్ నుంచి ఆల్విన్ ఎక్స్ రోడ్ వరకు నిర్మించనున్న ఆరు వరుసల ద్విముఖ పైవంతెన (ఫ్లైఓవర్) పనులకు, రెండు అత్యాధునిక అండర్పాస్ల నిర్మాణానికి శంకుస్థాపన చేశారు. వీటితో పాటు గచ్చిబౌలి, నల్లగండ్ల పరిసర ప్రాంతాల రవాణా సౌకర్యాన్ని మెరుగుపరిచేందుకు శేరిలింగంపల్లి రైల్వే స్టేషన్ సమీపంలో రూ. 308 కోట్లతో నిర్మించనున్న నాలుగు వరుసల రైల్వే ఓవర్ బ్రిడ్జ్ (ఆర్ఓబీ) నిర్మాణానికి కూడా భూమిపూజ చేశారు. ఈ కార్యక్రమంలో మంత్రులు, స్థానిక ప్రజాప్రతినిధులు, ఉన్నతాధికారులు పెద్ద సంఖ్యలో పాల్గొన్నారు.
