న్యాయస్థానం ముందు తలవంచాల్సిందే…..

న్యాయస్థానం ముందు తలవంచాల్సిందే.
* చట్టానికి ఎవరూ అతీతులు కారు.
* హైడ్రా కమిషనర్ ఏవీ రంగనాథ్ తీరుపై తెలంగాణ హైకోర్టు తీవ్ర ఆగ్రహం.
* ఉద్దేశపూర్వక ఉల్లంఘనలపై మండిపాటు.
హైదరాబాద్, మహా.
రాష్ట్రంలో సంచలనం సృష్టిస్తున్న ‘హైడ్రా’ (హైదరాబాద్ డిజాస్టర్ రెస్పాన్స్ అండ్ అసెట్ మానిటరింగ్ అండ్ ప్రొటెక్షన్ ఏజెన్సీ) వ్యవహారశైలిపై ఉన్నత న్యాయస్థానం కొరడా ఝుళిపించింది. కోర్టు ధిక్కరణకు సంబంధించిన కీలక కేసులో హైడ్రా కమిషనర్ ఏవీ రంగనాథ్ వ్యవహరిస్తున్న తీరును తెలంగాణ హైకోర్టు తీవ్రంగా తప్పుబట్టింది. భూ వివాదాలకు సంబంధించిన వ్యవహారాల్లో సర్వోన్నత న్యాయస్థానం జారీ చేసిన ఆదేశాలను పదేపదే ధిక్కరిస్తుండటంపై ధర్మాసనం తీవ్ర అసంతృప్తిని, ఆగ్రహాన్ని వ్యక్తం చేసింది. చట్టం ముందు అందరూ సమానులేనని, సర్కారు ఆదేశాలు అమలు చేసే క్రమంలో న్యాయస్థానాల ఉత్తర్వులను బేఖాతరు చేయడం ఏమాత్రం సహించరాని విషయమని కోర్టు ఈ సందర్భంగా కుండబద్దలు కొట్టింది.
**ఉద్దేశపూర్వక ఉల్లంఘనలపై ప్రశ్నల వర్షం**
వివాదాస్పద ఆస్తుల వ్యవహారంలో కోర్టు ఉత్తర్వులను అధికారులు ఉద్దేశపూర్వకంగా ఉల్లంఘిస్తున్నారంటూ దాఖలైన పిటిషన్‌పై మంగళవారం హైకోర్టులో వాడివేడిగా విచారణ జరిగింది. ముఖ్యంగా వివాదాస్పద స్థలాల్లో యథాతథ స్థితి (స్టేటస్ కో) పాటించకపోవడం, కోర్టు ఆదేశించినప్పటికీ సైన్ బోర్డులను తొలగించకపోవడం వంటి అంశాలను న్యాయమూర్తులు తీవ్రంగా పరిగణించారు. న్యాయస్థానం స్పష్టమైన ఆదేశాలు జారీ చేసినప్పటికీ, దాదాపు 20 రోజుల పాటు ఆ బోర్డులను ఎందుకు తొలగించలేకపోయారని ధర్మాసనం నిలదీసింది. కమిషనర్ అనుసరిస్తున్న మొండి వైఖరి, క్షేత్రస్థాయిలో జరుగుతున్న ప్రక్రియాపరమైన లోపాలపై తీవ్ర అసహనం వ్యక్తం చేసింది. గతంలోనూ పలుమార్లు కమిషనర్‌కు నోటీసులు జారీ చేసిన విషయాన్ని ఈ సందర్భంగా న్యాయస్థానం గుర్తుచేసింది.
**బాధ్యతారాహిత్యంపై సీరియస్..**
కోర్టు విచారణ పట్ల కమిషనర్ ప్రదర్శించిన నిర్లక్ష్య వైఖరిని ధర్మాసనం ఎండగట్టింది. అత్యంత కీలకమైన ఈ కోర్టు ధిక్కరణ కేసులో కమిషనర్ కనీస బాధ్యత లేకుండా వ్యవహరించారని కోర్టు ఆక్షేపించింది. విచారణకు వ్యక్తిగతంగా హాజరు కాలేని పరిస్థితుల్లో కనీసం వీడియో కాన్ఫరెన్స్ ద్వారా అయినా వివరణ ఇచ్చే అవకాశాన్ని ఎందుకు వినియోగించుకోలేదని ప్రశ్నించింది. అలాగే, విచారణకు గైర్హాజరవుతున్నట్లు తెలుపుతూ, ముందుస్తుగా మినహాయింపు కోరుతూ కనీసం ఒక అఫిడవిట్ కూడా దాఖలు చేయకపోవడం ఆయన నిర్లక్ష్య ధోరణికి నిలువుటద్దమని న్యాయస్థానం ఘాటు వ్యాఖ్యలు చేసింది. కారణాలు వివరిస్తూ తక్షణమే అఫిడవిట్ దాఖలు చేయాలని ఆదేశిస్తూ విచారణను మధ్యాహ్నానికి వాయిదా వేసింది.
**కెరీర్‌పై తీవ్ర ప్రభావం పడుతుందని హెచ్చరిక**
మధ్యాహ్నం తిరిగి ప్రారంభమైన విచారణలో హైడ్రా తరపు న్యాయవాది హుటాహుటిన కోర్టుకు అఫిడవిట్ సమర్పించారు. దీంతో కమిషనర్‌ వ్యక్తిగత హాజరు నుంచి కోర్టు తాత్కాలికంగా మినహాయింపునిచ్చింది. అయితే, సమర్పించిన అఫిడవిట్ లో ఎలాంటి సమగ్ర సమాచారం లేకపోవడాన్ని న్యాయస్థానం తీవ్రంగా పరిగణించింది. ఆ వివరణ అసంపూర్తిగా, అత్యంత నిర్లక్ష్యంగా ఉందని అభిప్రాయపడిన కోర్టు.. తక్షణమే పూర్తి వివరాలతో కూడిన సమగ్రమైన నివేదికను సమర్పించాలని స్పష్టమైన ఆదేశాలు జారీ చేసింది. అత్యున్నత పదవిలో ఉన్న అధికారి కోర్టు ఆదేశాలను ఇలాగే బేఖాతరు చేస్తే.. భవిష్యత్తులో అది ఆయన వృత్తిపరమైన కెరీర్‌పై తీవ్ర ప్రభావం చూపుతుందని హెచ్చరించింది. ఈ తీవ్రతను ఆయనకు వెంటనే స్పష్టంగా తెలియజేయాలని హైడ్రా న్యాయవాదికి సూచిస్తూ, తదుపరి విచారణను ధర్మాసనం వాయిదా వేసింది.