మన ‘కారం’పై కన్నేసిన డ్రాగన్…

మన ‘కారం’పై కన్నేసిన డ్రాగన్.
* దేశీయ మిర్చిపై అంతర్జాతీయ కుట్ర!
*లోపాయికారీ ముఠాలతో విత్తనాల చౌర్యం.
* పురుగుమందుల సాకుతో చైనా దగా.
* జెమినీ వైరస్ వెనుక బయో-వార్ కోణం?
* కఠిన చర్యలు కోరుతున్న అన్నదాతలు.
హైదరాబాద్, మహా.
ఖమ్మం, గుంటూరు, ప్రకాశం.. ఈ పేర్లు వినగానే ప్రపంచ దేశాలకు ఘాటైన, నాణ్యమైన మిర్చి గుర్తుకొస్తుంది. ముఖ్యంగా చైనా వంటి దేశాలకు మన మిర్చి లేనిదే పూట గడవని పరిస్థితి. దశాబ్దాలుగా అంతర్జాతీయ మార్కెట్లో రారాజుగా వెలుగొందుతున్న భారతీయ మిర్చిపై ఇప్పుడు ఓ భారీ అంతర్జాతీయ కుట్ర జరుగుతోందన్న సంచలన నిజాలు వెలుగుచూస్తున్నాయి. మన దేశ సంపదను దొడ్డిదారిన తరలిస్తూ, ఆరుగాలం శ్రమించే మన రైతులకు తీరని ద్రోహం చేస్తున్న డ్రాగన్ దేశం ఎత్తుగడలు, లోపాయికారీ ముఠాల దందా ఇప్పుడు వ్యవసాయ, వాణిజ్య వర్గాలను విస్మయానికి గురిచేస్తోంది.
**విత్తనాల చౌర్యం.. వ్యవస్థల్లోని నల్లగొర్రెల దందా**
గత కొన్నేళ్లుగా భారతదేశానికి చెందిన అత్యంత విలువైన, అధిక దిగుబడినిచ్చే మిరప విత్తనాలు చైనాకు అడ్డదారిలో స్మగ్లింగ్ అవుతున్నాయి. దొంగిలించిన మన విత్తనాలతోనే తమ దేశంలో మిర్చిని పండించి, అంతర్జాతీయ మార్కెట్లో భారతదేశానికే పోటీగా నిలబెట్టాలనేది చైనా కుట్రపూరిత వ్యూహం. ఈ దందాను వెనకుండి నడిపిస్తున్న కొన్ని స్వార్థపూరిత శక్తులు, ‘కమ్మీ ముఠాలు’ ఇంకా కేంద్ర ప్రభుత్వ సంస్థల్లోనే పాతుకుపోయి ఉండటం అత్యంత శోచనీయం. ప్రభుత్వ ఉద్యోగుల ముసుగులో దేశద్రోహానికి పాల్పడుతున్న ఈ నల్లగొర్రెలు, మన రైతుల కడుపుకొడుతూ చైనాకు లాభాలు చేకూరుస్తున్నారు.
**క్వాలిటీ పేరుతో సరికొత్త డ్రామా**
ఖమ్మం, గుంటూరు మార్కెట్ల నుండి ఏటా వందల కోట్ల రూపాయల విలువైన మిర్చిని కొనుగోలు చేసే చైనా, ఇప్పుడు హఠాత్తుగా ప్లేట్ మార్చింది. “క్వాలిటీ లేదు” అనే సాకుతో భారతీయ మిర్చి లోడింగులను వరుసగా తిరస్కరిస్తోంది. దీని వెనుక ఉన్నది నాణ్యతా లోపం కాదు, అదో పెద్ద అంతర్జాతీయ కుట్ర. మన ఉత్పత్తుల నాణ్యతను ప్రపంచం ముందు తక్కువ చేసి చూపి, అంతర్జాతీయ మార్కెట్లో “భారతీయ మిర్చి” బ్రాండ్ ఇమేజ్‌ను మసకబార్చడమే డ్రాగన్ అసలు ప్లాన్. తద్వారా డిమాండ్‌ను, ధరలను అమాంతం పడగొట్టి మన రైతుల నడ్డి విరవాలని ఆ దేశం కుతంత్రాలు పన్నుతోంది. ఇక్కడ తేలాల్సిన అతి ముఖ్యమైన విషయం ఒకటుంది. చైనా తిరస్కరించిన ఆ మిర్చి నాణ్యంగానే ఉందని, ఎగుమతికి అర్హమైనదేనని భారత ప్రభుత్వం పేరుతో తొలుత “క్వాలిటీ క్లియరెన్స్” ఇచ్చిన అధికారులు ఎవరు? ఒకవేళ నిజంగానే నాణ్యత లేకపోతే సర్టిఫికెట్ ఎలా ఇచ్చారు? వ్యవస్థలోని కొందరు లంచగొండి అధికారులు చైనా ఏజెంట్లతో చేతులు కలిపి ఈ డ్రామా ఆడుతున్నారా అన్న కోణంలో సమగ్ర విచారణ జరగాల్సిన అవసరం ఉంది.
**జెమిని వైరస్ వెనుక బయో-వార్ కోణం?**
కొన్నేళ్ల క్రితం తెలుగు రాష్ట్రాల్లోని ఖమ్మం, గుంటూరు, ప్రకాశం తదితర ప్రాంతాలలో మిరప పంటను సర్వనాశనం చేసిన “జెమిని వైరస్” తీవ్రతను రైతాంగం ఇంకా మర్చిపోలేదు. వేలాది ఎకరాల్లో పంట తుడిచిపెట్టుకుపోయి, రైతులు కోట్లలో నష్టపోయి అప్పుల పాలయ్యారు. అయితే, మన దేశీయ మిర్చి మార్కెట్‌ను కోలుకోకుండా చేయడానికి విదేశీ ల్యాబ్‌ల నుండి ఉద్దేశపూర్వకంగానే ఈ వైరస్‌ను వ్యాప్తి చేశారా అనే బలమైన అనుమానాలు ఇప్పుడు వ్యక్తమవుతున్నాయి. మిర్చి మార్కెట్‌పై గుత్తాధిపత్యం కోసం జరిగిన ఈ ‘బయో-వార్’ కోణంపై జాతీయ భద్రతా సంస్థలు లోతైన దర్యాప్తు చేయాలని రైతులు డిమాండ్ చేస్తున్నారు.
**పురుగుమందుల వాడకం.. వాస్తవాలు వర్సెస్ చైనా దుష్ప్రచారం**
మన మిర్చిలో రసాయనాలు ఎక్కువగా ఉన్నాయని గగ్గోలు పెడుతున్న చైనా వాదనల్లో ఎలాంటి పసాలేదని అంతర్జాతీయ గణాంకాలే స్పష్టం చేస్తున్నాయి. ప్రపంచవ్యాప్తంగా సాగవుతున్న పంటల విస్తీర్ణాన్ని, వాడుతున్న పురుగుమందుల పరిమాణాన్ని పరిశీలిస్తే.. భారతీయ రైతులు వాడే రసాయనాల సగటు చాలా తక్కువ. ఐక్యరాజ్యసమితికి చెందిన ఫుడ్ అండ్ అగ్రికల్చర్ ఆర్గనైజేషన్ , కేంద్ర వ్యవసాయ మంత్రిత్వ శాఖ నివేదికల ప్రకారం… భారతదేశంలో హెక్టారుకు సగటున కేవలం 0.5 నుంచి 0.6 కిలోల (ఎకరానికి సుమారు 200 గ్రాములు) పురుగుమందులు మాత్రమే వాడుతున్నారు. ప్రపంచ సగటు హెక్టారుకు 2.4 కిలోలుగా (ఎకరానికి 970 గ్రాములు) ఉంది. కానీ, “క్వాలిటీ” గురించి నీతులు చెబుతున్న చైనా.. హెక్టారుకు ఏకంగా 13 కిలోల (ఎకరానికి 5.2 కిలోలు) మేర రసాయనాలను గుప్పిస్తోంది.
మన దేశంలో పంజాబ్, తెలంగాణ, ఏపీ వంటి రాష్ట్రాల్లో గరిష్టంగా వాడినా అది హెక్టారుకు 4 కిలోల లోపే ఉంటుంది. చైనా తక్కువ భూమిలో అత్యధిక దిగుబడి సాధించడం కోసం విపరీతంగా రసాయన ఎరువులను, పురుగుమందులను, కలుపు మందులను వాడుతోంది. మరోవైపు భారతీయ రైతులు ఇప్పటికీ సేంద్రియ ఎరువులు, వేపనూనె వంటి సహజసిద్ధమైన పద్ధతులకు ప్రాధాన్యత ఇస్తున్నారు. మనకంటే 20 రెట్లకు పైగా ఎక్కువ పురుగుమందులను వాడే చైనా.. మన ఉత్పత్తులపై నిందలు వేయడం ముమ్మాటికీ వాణిజ్య కుట్రేనని స్పష్టమవుతోంది.
**రైతును కాపాడుకుందాం.. దేశ బ్రాండ్‌ను నిలబెట్టుకుందాం**
ఇది కేవలం రెండు దేశాల మధ్య జరిగే సాధారణ మిర్చి వ్యాపారానికి సంబంధించిన వివాదం కాదు. ఇది మన దేశ ఆహార భద్రత, అన్నదాతల ఆరుగాలపు శ్రమ, భారత ఆర్ధిక వ్యవస్థపై జరుగుతున్న ప్రత్యక్ష దాడి. ఇప్పటికైనా కేంద్ర ప్రభుత్వం, జాతీయ నిఘా సంస్థలు మేల్కొనాలి. విదేశీ ముఠాలతో చేతులు కలిపిన మన మంత్రిత్వ శాఖల్లోని నల్లగొర్రెలను, చైనా ఏజెంట్లను ఏరిపారేయాలి. కఠినమైన చట్టపరమైన చర్యల ద్వారా దోషులను శిక్షించినప్పుడే.. మన రైతుల కన్నీరు తుడుచుకోగలం, అంతర్జాతీయ స్థాయిలో భారతీయ మిర్చి బ్రాండ్‌ను సగర్వంగా నిలబెట్టుకోగలం.