కప్పు కాఫీ రూ.4,700.
* తయారయ్యేది ఏనుగు పేడతో!
* ప్రపంచంలోనే అత్యంత ఖరీదైన ‘బ్లాక్ ఐవరీ కాఫీ’.
* థాయ్లాండ్లో అత్యంత పరిమిత స్థాయిలో ప్రత్యేక ఉత్పత్తి.
*చేదు లేని మధురమైన రుచి దీని సొంతం.
* కిలో ధర ఏకంగా రెండు వేల డాలర్లు.
ఢిల్లీ, మహా.
ఉదయం నిద్ర లేవగానే ఓ కప్పు వేడివేడి కాఫీ గొంతులో పడితే గానీ చాలామందికి రోజువారీ దినచర్య ప్రారంభం కాదు. ప్రపంచవ్యాప్తంగా కాఫీ ప్రియులు కోట్లలో ఉన్నారు. వారి అభిరుచికి తగ్గట్లుగానే మార్కెట్లో ఎన్నో రకాల కాఫీ బ్రాండ్లు అందుబాటులో ఉన్నాయి. అయితే, ఒక కప్పు కాఫీ ధర ఏకంగా రూ.4,700 ఉంటుందంటే నమ్మగలరా? అంతేకాదు, ఆ కాఫీ గింజలను ఏనుగుల పేడ నుంచి సేకరిస్తారని తెలిస్తే ఆశ్చర్యపోవడం ఖాయం. వినడానికి కాస్త విడ్డూరంగా అనిపించినా.. ఇదే ప్రపంచంలో అత్యంత అరుదైన, ఖరీదైన ‘బ్లాక్ ఐవరీ కాఫీ’ థాయ్లాండ్లో తయారయ్యే ఈ కాఫీకి అంతర్జాతీయంగా ఉన్న క్రేజ్ అంతాఇంతా కాదు.
ఉత్తర థాయ్లాండ్లోని ‘గోల్డెన్ ట్రయాంగిల్’ ప్రాంతంలో ఈ అరుదైన బ్లాక్ ఐవరీ కాఫీని ఉత్పత్తి చేస్తున్నారు. కెనడాకు చెందిన బ్లేక్ డింకిన్ అనే వ్యాపారవేత్త ఈ వినూత్న కాఫీ తయారీకి శ్రీకారం చుట్టారు. అత్యుత్తమ నాణ్యత కలిగిన థాయ్ ‘అరబికా’ రకం కాఫీ గింజలను ఏనుగుల జీర్ణవ్యవస్థ ద్వారా సహజసిద్ధంగా ప్రాసెస్ చేసి, ఈ కాఫీని తయారు చేయడం దీని ప్రధాన ప్రత్యేకత. అంతర్జాతీయ మార్కెట్లో కిలో బ్లాక్ ఐవరీ కాఫీ గింజల ధర సుమారు 2,000 డాలర్లు (భారత కరెన్సీలో దాదాపు రూ.1.66 లక్షలు) పలుకుతోంది. ఒక కప్పు కాఫీ తాగాలంటే సగటున 50 డాలర్లు (రూ.4,700కి పైగా) చెల్లించాల్సిందే.
ఈ కాఫీ తయారీ విధానం అత్యంత శ్రమ, ఓపికతో కూడుకున్నది. ముందుగా అరబికా రకం కాఫీ గింజలను (చెర్రీలను) బియ్యం, అరటిపండ్లు, చింతపండు, ఇతర పండ్లతో కలిపి ఏనుగులకు ఆహారంగా పెడతారు. ఆ ఆహారం ఏనుగు కడుపులో జీర్ణమవడానికి సుమారు 15 నుంచి 17 గంటల సమయం పడుతుంది. ఈ క్రమంలో ఏనుగు కడుపులో ఉత్పత్తి అయ్యే ఆమ్లాలు (యాసిడ్స్), ఎంజైమ్లు కాఫీ గింజల్లోని చేదుకు కారణమయ్యే ప్రోటీన్లను విచ్ఛిన్నం చేస్తాయి. తద్వారా ఆ గింజలకు సహజమైన మాధుర్యం తోడవుతుంది. జీర్ణక్రియ పూర్తయిన తర్వాత ఏనుగుల మల విసర్జన (పేడ) నుంచి మావటీలు ఆ కాఫీ గింజలను అత్యంత జాగ్రత్తగా ఏరి సేకరిస్తారు. ఆ తర్వాత వాటిని ఎన్నో దఫాలుగా శుభ్రపరిచి, ఎండబెట్టి, అత్యుత్తమ పద్ధతిలో రోస్ట్ చేసి కాఫీ పొడిని తయారు చేస్తారు.
బ్లాక్ ఐవరీ కాఫీ అంత ఖరీదు ఉండటానికి ప్రధాన కారణం దాని ఉత్పత్తి శాతం చాలా తక్కువగా ఉండటమే. ఏనుగులకు 33 కిలోల కాఫీ గింజలను ఆహారంగా ఇస్తే, అందులో నుంచి కేవలం ఒక్క కిలో గింజలను మాత్రమే సేకరించగలుగుతారు. మిగతా గింజలు ఏనుగులు నమలడం వల్ల పాడైపోవడం లేదా గడ్డిలో కలిసిపోవడం జరుగుతుంది. ఈ కాఫీకి సాధారణ కాఫీలో ఉండే ఎలాంటి చేదు ఉండదు. దానికి బదులుగా చాక్లెట్, మాల్ట్, డ్రై నట్స్, అడవి మట్టి వాసనల కలయికతో కూడిన ఒక అద్భుతమైన రుచి, సువాసన వస్తుందని దీనిని ఆస్వాదించిన కాఫీ ప్రియులు వివరిస్తున్నారు. ఫైవ్ స్టార్ హోటళ్లు, అత్యంత విలాసవంతమైన రిసార్టుల్లో మాత్రమే ఇది కస్టమర్లకు అందుబాటులో ఉంటుంది.
ఏనుగుల పేడ నుంచి గింజలు సేకరిస్తున్నారని వాటికి హాని జరుగుతుందేమోనని పర్యావరణవేత్తలు సందేహించాల్సిన పనిలేదని తయారీ సంస్థలు చెబుతున్నాయి. పశువైద్యుల పర్యవేక్షణలో ఏనుగుల ఆరోగ్యానికి ఎలాంటి హాని కలగకుండా, పూర్తి శాస్త్రీయ పద్ధతిలో ఈ ప్రక్రియను నిర్వహిస్తున్నారు. కాఫీ గింజల్లోని కెఫిన్ వల్ల ఏనుగులకు ఎలాంటి ఇబ్బందీ కలగదు. పైగా, ఈ కాఫీ విక్రయాల ద్వారా వచ్చే లాభాల్లో కొంత శాతాన్ని ‘గోల్డెన్ ట్రయాంగిల్ ఏషియన్ ఎలిఫెంట్ ఫౌండేషన్’కు విరాళంగా అందిస్తున్నారు. ఏనుగుల సంరక్షణకు, మావటీల కుటుంబాలకు అదనపు ఆదాయం కల్పించడానికి ఈ ప్రాజెక్టు ఎంతగానో ఉపయోగపడుతోంది. మొత్తానికి ఏనుగుల కడుపులో జరిగే ఈ సహజసిద్ధమైన మాయాజాలం.. కాఫీ ప్రియులకు ఒక విలాసవంతమైన అమృతాన్ని అందిస్తూ ప్రపంచం దృష్టిని ఆకర్షిస్తోంది.
