చెరువులకు మహర్దశ.. పునరుద్ధరణకు హైడ్రా శ్రీకారం.
*రూ.107 కోట్లతో నాలుగు ప్రధాన చెరువుల అభివృద్ధి.
*భూమిపూజ చేసి పనులు ప్రారంభించిన కమిషనర్ రంగనాథ్.
*311 ఎకరాల విస్తీర్ణంలో సరికొత్తగా రూపురేఖలు.
*వాకింగ్ ట్రాక్లు, ఓపెన్ జిమ్లు, బోటింగ్ సౌకర్యాల ఏర్పాటు.
హైదరాబాద్, మహా.
మహానగరంలో చెరువుల పరిరక్షణే ధ్యేయంగా నడుం బిగించిన హైడ్రా ముందస్తు కార్యాచరణలోకి దిగింది. నగరంలో వరద ముప్పును శాశ్వతంగా నివారించడంతో పాటు, పడిపోతున్న భూగర్భ జలాలను పెంచే బృహత్తర లక్ష్యంతో నాలుగు ప్రధాన చెరువుల సమగ్ర పునరుద్ధరణకు లాంఛనంగా శ్రీకారం చుట్టింది. ఏకంగా రూ.107 కోట్ల భారీ అంచనా వ్యయంతో చేపట్టనున్న ఈ పనులకు హైడ్రా కమిషనర్ రంగనాథ్ స్వయంగా భూమిపూజ నిర్వహించి, అభివృద్ధి పనులను లాంఛనంగా ప్రారంభించారు.
ఈ ప్రతిష్ఠాత్మక ప్రాజెక్టు కింద నగరంలోని కీలకమైన ఇబ్రహీం పెద్ద చెరువు, భగీరథమ్మ చెరువు, కాముని చెరువుతో పాటు కాప్రా చెరువులను సర్వాంగ సుందరంగా తీర్చిదిద్దనున్నారు. మొత్తంగా 311 ఎకరాల విశాల విస్తీర్ణంలో ఉన్న ఈ నాలుగు చెరువులకు సరికొత్త రూపురేఖలు తీసుకురానున్నారు. కబ్జాల బారి నుంచి నీటి వనరులను రక్షించడమే కాకుండా, రాబోయే వర్షాకాలంలో సమీప కాలనీలు జలమయం కాకుండా వరద ప్రభావాన్ని సమర్థవంతంగా అడ్డుకోవడం ఈ పునరుద్ధరణ ప్రధాన లక్ష్యమని అధికారులు స్పష్టం చేశారు. వర్షపు నీటిని నిల్వ చేయడం ద్వారా ఈ ప్రాంతాల్లో అడుగంటిన భూగర్భ జలాల మట్టం సైతం గణనీయంగా పెరిగే అవకాశం ఉందన్నారు.
కేవలం చెరువుల కట్టల పటిష్ఠతకే పరిమితం కాకుండా వాటిని నగరవాసులకు అద్భుతమైన ఆహ్లాద కేంద్రాలుగా మలిచేందుకు హైడ్రా పక్కా ప్రణాళికలు సిద్ధం చేసింది. పచ్చని వాతావరణం మధ్య ప్రజలు నడిచేందుకు వీలుగా అందమైన వాకింగ్ ట్రాక్లు, ఆరోగ్య పరిరక్షణ కోసం ఓపెన్ జిమ్లు, అలాగే చిన్నారులు ఆడుకునేందుకు ప్రత్యేకంగా కిడ్స్ ప్లే ఏరియాలను ఈ చెరువుల వద్ద ఏర్పాటు చేయనున్నారు. వీటితో పాటు పెద్ద చెరువులను ప్రధాన పర్యాటక కేంద్రాలుగా అభివృద్ధి చేసే దిశగానూ చర్యలు ముమ్మరం చేశారు. ఇందులో భాగంగా రాష్ట్ర పర్యాటక శాఖ సహకారంతో ఈ చెరువుల్లో బోటింగ్ (విహారయాత్ర) సౌకర్యాన్ని సైతం అందుబాటులోకి తీసుకొచ్చేందుకు హైడ్రా కసరత్తు చేస్తోంది. ఈ పనులన్నీ పూర్తయితే సిటీ జనులకు ఆహ్లాదకరమైన పర్యావరణంతో పాటు, వారాంతాల్లో కుటుంబ సమేతంగా సేదదీరేందుకు సరికొత్త విహార కేంద్రాలు అందుబాటులోకి రానున్నాయి.
