• చిల్లర లేదని బస్సు దిగమన్న కండక్టర్.
• సామాన్యుడిలా దిగిపోయిన రవాణా మంత్రి.
బెంగళూరు,మహా.
సామాన్య ప్రయాణికులు ప్రభుత్వ బస్సుల్లో ఎదుర్కొనే ఇబ్బందులను ప్రత్యక్షంగా తెలుసుకోవాలన్న ఉద్దేశంతో మారువేషంలో తనిఖీలకు వెళ్లిన కర్ణాటక రవాణా శాఖ మంత్రి బైరతి సురేష్కు ఊహించని అనుభవం ఎదురైంది. టికెట్ కోసం వంద రూపాయల నోటు ఇవ్వగా చిల్లర లేదని చెప్పిన కండక్టర్, సరిపడా చిల్లర ఇవ్వలేకపోతే బస్సు దిగిపోవాలని స్పష్టం చేయడంతో మంత్రి నిశ్శబ్దంగా బస్సు దిగి వెళ్లిపోయారు. ఈ ఘటన ప్రస్తుతం సామాజిక మాధ్యమాల్లో విస్తృతంగా చర్చనీయాంశమైంది.
రాత్రి వేళల్లో బీఎంటీసీ బస్సుల్లో ప్రయాణించే ప్రజలు ఎదుర్కొంటున్న సమస్యలు, సిబ్బంది వ్యవహారశైలి, సేవల నాణ్యతను క్షేత్రస్థాయిలో పరిశీలించాలనే ఉద్దేశంతో మంత్రి బైరతి సురేష్ ముఖానికి మాస్క్ ధరించి సాధారణ ప్రయాణికుడిలా బస్సు ఎక్కారు. హెబ్బాళ్ నుంచి నాగశెట్టిహళ్లి వరకు వెళ్లే బస్సులో ఆయన దాదాపు రెండు గంటల పాటు ప్రయాణిస్తూ వివిధ మార్గాల్లో పరిస్థితులను పరిశీలించారు.
జయమహల్, టీవీ టవర్, ఆర్టీ నగర్, సీబీఐ రోడ్, హెబ్బాళ్, మాన్యతా టెక్ పార్క్, నాగవార, హెన్నూర్, హెన్నూర్ బండే, బైరతి బండే, గెద్దలహళ్లి ప్రాంతాల మీదుగా సాగిన తనిఖీల సందర్భంగా ఒక దశలో మంత్రి రెండు టికెట్లు కావాలని కోరుతూ వంద రూపాయల నోటును కండక్టర్కు అందించారు. అయితే ఖచ్చితమైన చిల్లర ఇవ్వాలని కండక్టర్ కోరగా, తన వద్ద ప్రస్తుతం చిల్లర లేదని మంత్రి చెప్పారు.
దాంతో కండక్టర్ తన వద్ద కూడా చిల్లర లేదని చెబుతూ టికెట్ బ్యాగ్ను చూపించాడు. చిల్లర ఇవ్వలేకపోతే బస్సులో ప్రయాణం సాధ్యం కాదని, వెంటనే దిగిపోవాలని స్పష్టం చేశాడు. ముఖానికి మాస్క్ ఉండటంతో తనతో మాట్లాడుతున్న వ్యక్తి రాష్ట్ర రవాణా శాఖ మంత్రేనన్న విషయం కండక్టర్కు తెలియలేదు.
ఈ పరిస్థితిలో కూడా మంత్రి తన అసలు గుర్తింపును బయటపెట్టకుండా పూర్తిగా సామాన్య ప్రయాణికుడిలా వ్యవహరించారు. అధికార హోదాను ప్రదర్శించకుండా కండక్టర్తో ఎలాంటి వాగ్వాదానికి దిగకుండా ప్రశాంతంగా బస్సు దిగి వెళ్లిపోయారు. అనంతరం తనిఖీలను కొనసాగిస్తూ ఇతర బస్సుల్లో కూడా ప్రయాణించి ప్రయాణికుల సమస్యలను పరిశీలించినట్లు సమాచారం.
ఈ ఘటన వెలుగులోకి రావడంతో సామాజిక మాధ్యమాల్లో విస్తృత స్పందన వ్యక్తమవుతోంది. ప్రజలు ఎదుర్కొంటున్న వాస్తవ పరిస్థితులను తెలుసుకోవడానికి మంత్రి స్వయంగా మారువేషంలో క్షేత్రస్థాయికి వెళ్లడాన్ని పలువురు అభినందిస్తున్నారు. అదే సమయంలో చిల్లర సమస్య ఇప్పటికీ ప్రయాణికులకు ఇబ్బందిగా మారుతుండడం, కొంతమంది కండక్టర్ల వ్యవహారశైలిపై కూడా చర్చ సాగుతోంది.
ప్రజా రవాణా సేవలను మరింత ప్రయాణికుల అనుకూలంగా తీర్చిదిద్దేందుకు ఇటువంటి ఆకస్మిక తనిఖీలు ఉపయోగపడతాయని అభిప్రాయాలు వ్యక్తమవుతున్నాయి. మంత్రి స్వయంగా ఎదుర్కొన్న ఈ అనుభవం బీఎంటీసీ సేవల్లో ఉన్న లోపాలపై దృష్టి సారించేలా చేస్తుందనే అభిప్రాయం వ్యక్తమవుతోంది.
