• సరూర్నగర్ స్టేడియంలో నేడు సభ.
• షరతులతో అనుమతి మంజూరు చేసిన ధర్మాసనం
హైదరాబాద్, మహా.
తెలంగాణలో నిరుద్యోగులు, విద్యార్థుల సమస్యలను ప్రధాన అజెండాగా తీసుకుని బీఆర్ఎస్ నిర్వహించ తలపెట్టిన ‘యువ సంగ్రామ సదస్సు’కు తెలంగాణ హైకోర్టు అనుమతి మంజూరు చేసింది. హైదరాబాద్లోని సరూర్నగర్ ఇండోర్ స్టేడియం ప్రాంగణంలో శనివారం జరగనున్న ఈ సభకు తొలుత పోలీసులు అనుమతి నిరాకరించగా, బీఆర్ఎస్ నాయకత్వం హైకోర్టును ఆశ్రయించింది. దీనిపై విచారణ చేపట్టిన ధర్మాసనం శాంతిభద్రతలకు భంగం కలగకుండా కొన్ని షరతులు విధిస్తూ సభ నిర్వహణకు గ్రీన్ సిగ్నల్ ఇచ్చింది. దీంతో సభ నిర్వహణపై నెలకొన్న ఉత్కంఠకు తెరపడింది.
తెలంగాణ అసెంబ్లీ ఎన్నికల సమయంలో కాంగ్రెస్ పార్టీ యువత, నిరుద్యోగులకు ఇచ్చిన హామీలను అమలు చేయడంలో ప్రభుత్వం విఫలమైందని ఆరోపిస్తూ బీఆర్ఎస్ ఈ సదస్సును నిర్వహిస్తోంది. ఎన్నికల ప్రచారంలో రాహుల్ గాంధీ, ప్రియాంక గాంధీ సమక్షంలో ప్రకటించిన ‘యూత్ డిక్లరేషన్’లోని హామీలను కాంగ్రెస్ ప్రభుత్వం ఇప్పటికీ అమలు చేయలేదని బీఆర్ఎస్ నేతలు విమర్శిస్తున్నారు. నిరుద్యోగ భృతి, జాబ్ క్యాలెండర్, ఫీజు రీయింబర్స్మెంట్, ఉద్యోగాల భర్తీ వంటి అంశాల్లో ప్రభుత్వం ఇచ్చిన హామీలు కాగితాలకే పరిమితమయ్యాయని ఆరోపిస్తున్నారు.
ప్రత్యేకంగా కాంగ్రెస్ పార్టీ ‘యూత్ డిక్లరేషన్’ ప్రకటించిన అదే సరూర్నగర్ వేదికను ఎంచుకోవడం ద్వారా ప్రభుత్వాన్ని రాజకీయంగా నిలదీయాలన్న వ్యూహంతో బీఆర్ఎస్ ముందుకెళ్తోంది. యువతకు ఇచ్చిన హామీల అమలుపై ప్రభుత్వాన్ని ప్రశ్నించడంతో పాటు నిరుద్యోగుల సమస్యలపై రాష్ట్రవ్యాప్త ఉద్యమ కార్యాచరణను ప్రకటించేందుకు ఈ సభను కీలక వేదికగా ఉపయోగించుకోనుంది.
పోలీసులు తొలుత అనుమతి నిరాకరించడంతో సభ జరుగుతుందా లేదా అన్న అనిశ్చితి నెలకొన్నప్పటికీ, హైకోర్టు అనుమతి ఇవ్వడంతో బీఆర్ఎస్ శ్రేణుల్లో కొత్త ఉత్సాహం కనిపిస్తోంది. రాష్ట్రవ్యాప్తంగా ఉన్న నిరుద్యోగులు, విద్యార్థులు, యువత పెద్ద ఎత్తున సభకు హాజరుకావాలని పార్టీ పిలుపునిచ్చింది. సభకు బీఆర్ఎస్ వర్కింగ్ ప్రెసిడెంట్ కే. తారక రామారావు (కేటీఆర్) ముఖ్య అతిథిగా హాజరై కాంగ్రెస్ ప్రభుత్వంపై విమర్శలు గుప్పించడంతో పాటు నిరుద్యోగుల సమస్యలపై పార్టీ భవిష్యత్ కార్యాచరణను ప్రకటించే అవకాశం ఉందని పార్టీ వర్గాలు తెలిపాయి.
హైకోర్టు విధించిన షరతులను పూర్తిగా పాటిస్తూ శాంతియుతంగా సభ నిర్వహించాలని నిర్వాహకులకు సూచించినట్లు తెలుస్తోంది. మరోవైపు సభ నేపథ్యంలో సరూర్నగర్ పరిసర ప్రాంతాల్లో పోలీసులు విస్తృత భద్రతా ఏర్పాట్లు చేపట్టారు. సభకు పెద్ద సంఖ్యలో ప్రజలు హాజరయ్యే అవకాశం ఉండటంతో ట్రాఫిక్ నియంత్రణ, భద్రతా చర్యలను మరింత కట్టుదిట్టం చేశారు. దీంతో రాజకీయంగా ప్రాధాన్యం సంతరించుకున్న ఈ ‘యువ సంగ్రామ సదస్సు’పై రాష్ట్రవ్యాప్తంగా ఆసక్తి నెలకొంది.
