రైల్వే పట్టాలపై పెరుగుతున్న బలవన్మరణాలు….

రైల్వే పట్టాలపై పెరుగుతున్న బలవన్మరణాలు.
* ఏడాదికి 1,300 మందికిపైగా మృతి.

హైదరాబాద్, మహా.

సికింద్రాబాద్ ప్రభుత్వ రైల్వే పోలీస్ (జీఆర్పీ) పరిధిలో రైల్వే పట్టాలపై జరిగే మరణాలు ఆందోళన కలిగిస్తున్నాయి. ప్రతి సంవత్సరం సుమారు 1,300 మందికిపైగా వివిధ కారణాలతో ప్రాణాలు కోల్పోతున్నట్లు నమోదైన కేసులు వెల్లడిస్తున్నాయి. వీటిలో ప్రమాదాలతో పాటు బలవన్మరణాలే అధికంగా ఉండటం ఆందోళనకు గురిచేస్తోంది. కుటుంబ కలహాలు, ఆర్థిక ఇబ్బందులు, ఆరోగ్య సమస్యలు, వ్యక్తిగత విభేదాలు వంటి కారణాలతో పలువురు తీవ్ర మానసిక ఒత్తిడికి గురవుతున్నట్లు దర్యాప్తులో వెల్లడవుతోందని అధికారులు చెబుతున్నారు.
జీఆర్పీ అధికారుల సమాచారం ప్రకారం.. 2025 సంవత్సరంలో సికింద్రాబాద్ జీఆర్పీ పరిధిలో మొత్తం 1,317 మరణాలు నమోదయ్యాయి. వీటిలో 529 కేసులు బలవన్మరణాలుగా నిర్ధారణ అయ్యాయి. ప్రస్తుత ఏడాది తొలి ఆరు నెలల్లోనే 258 మంది ప్రాణాలు కోల్పోయినట్లు గణాంకాలు సూచిస్తున్నాయి. చాలామంది చిన్న కారణాలకే ఈ నిర్ణయాలు తీసుకున్నట్లు కనిపించినా, వారి వెనుక తీవ్ర మానసిక వేదన లేదా వ్యక్తిగత సమస్యలు ఉండే అవకాశముందని అధికారులు అభిప్రాయపడుతున్నారు.
ఇటీవలి కాలంలో చోటుచేసుకున్న కొన్ని సంఘటనలు రాష్ట్రవ్యాప్తంగా చర్చనీయాంశంగా మారాయి. చర్లపల్లి రైల్వే ట్రాక్ సమీపంలో ఓ ఐటీ ఉద్యోగి తన ఇద్దరు పిల్లలతో కలిసి మృతి చెందిన ఘటన ఇప్పటికీ మిస్టరీగానే మిగిలింది. అలాగే బీబీనగర్–ఘట్‌కేసర్ మధ్య దంపతుల మృతి కేసులో అప్పులు, ఇతర వ్యక్తిగత పరిస్థితులపై పలు కోణాల్లో విచారణ జరిగినప్పటికీ స్పష్టమైన కారణాలపై ఇంకా సందిగ్ధత కొనసాగుతోందని అధికారులు తెలిపారు.
ఈ తరహా కేసుల్లో వాస్తవాలను వెలికితీయడం పోలీసులకు పెద్ద సవాలుగా మారుతోంది. సరైన ఆధారాలు లభించకపోవడం, కుటుంబ సభ్యులు సామాజిక కారణాలతో పూర్తి వివరాలు వెల్లడించకపోవడం, సిబ్బంది కొరత వంటి కారణాల వల్ల అనేక కేసుల్లో లోతైన దర్యాప్తు కష్టతరమవుతోందని జీఆర్పీ అధికారులు పేర్కొంటున్నారు. అందువల్ల చాలా ఘటనల్లో అసలు కారణాలు పూర్తిగా వెలుగులోకి రావడం లేదని వెల్లడించారు.
అయితే అప్రమత్తతతో అనేక ప్రాణాలను కాపాడుతున్నామని రైల్వే పోలీసులు చెబుతున్నారు. రైల్వే పట్టాలు, స్టేషన్ల పరిసరాల్లో అనుమానాస్పదంగా సంచరించే వ్యక్తులను గస్తీ బృందాలు గుర్తించి మాట్లాడుతున్నాయి. అవసరమైతే వారికి కౌన్సెలింగ్ అందించి కుటుంబ సభ్యులకు అప్పగిస్తున్నాయి. ఈ చర్యల ద్వారా ప్రతి నెలా 30 నుంచి 40 మంది వరకు ప్రాణాలను రక్షించగలుగుతున్నట్లు అధికారులు తెలిపారు.
జీవితంలో ఎదురయ్యే సమస్యలకు బలవన్మరణం పరిష్కారం కాదని మానసిక ఆరోగ్య నిపుణులు సూచిస్తున్నారు. ఇలాంటి ఆలోచనలు లేదా తీవ్రమైన ఒత్తిడి ఎదురైనప్పుడు కుటుంబ సభ్యులు, స్నేహితులు లేదా నిపుణులతో మాట్లాడటం ద్వారా సమస్యలకు పరిష్కారం దొరికే అవకాశాలు ఎక్కువగా ఉంటాయని వారు సూచిస్తున్నారు.