రూ.4.50 లక్షల కోట్లకు పైగా పథకాలకు కేంద్ర కేబినెట్ ఆమోదం.
* పీఎం కిసాన్‌కు అత్యధిక కేటాయింపు.
* సూర్య సరోవర్ యోజన, ఖేలో ఇండియా, సముద్ర మంథన్‌కు గ్రీన్ సిగ్నల్.
ఢిల్లీ, మహా.
కేంద్ర ప్రభుత్వం వివిధ సంక్షేమ, మౌలిక సదుపాయాలు, క్రీడలు, వ్యవసాయం, సముద్రాభివృద్ధి రంగాలకు సంబంధించిన కీలక పథకాల అమలుకు భారీగా నిధులు కేటాయిస్తూ కీలక నిర్ణయాలు తీసుకుంది. ప్రధానమంత్రి అధ్యక్షతన జరిగిన కేంద్ర మంత్రివర్గ సమావేశంలో మొత్తం రూ.4,50,988 కోట్ల వ్యయంతో పలు పథకాలకు ఆమోదం తెలిపింది.
రైతుల సంక్షేమానికి ప్రాధాన్యం ఇస్తూ ప్రధానమంత్రి కిసాన్ సమ్మాన్ నిధి పథకానికి రూ.3,15,614 కోట్ల కేటాయింపునకు కేంద్ర కేబినెట్ ఆమోదం తెలిపింది. ఈ నిధులతో దేశవ్యాప్తంగా కోట్లాది మంది రైతులకు ఆర్థిక సహాయం కొనసాగనుంది.
పునరుత్పాదక ఇంధన రంగాన్ని ప్రోత్సహించే లక్ష్యంతో ప్రధానమంత్రి సూర్య సరోవర్ యోజనకు రూ.5,070 కోట్ల కేటాయింపునకు కేబినెట్ గ్రీన్ సిగ్నల్ ఇచ్చింది. ఈ పథకం ద్వారా సౌరశక్తి వినియోగాన్ని విస్తరించడంతో పాటు జల వనరుల అభివృద్ధికి ఊతం లభించనుంది.
క్రీడారంగ అభివృద్ధికి ప్రాధాన్యం ఇస్తూ ఖేలో ఇండియా పథకంతో పాటు నేషనల్ స్పోర్ట్స్ ఫెడరేషన్ స్కీమ్ అమలుకు రూ.36,441 కోట్ల కేటాయింపును కేంద్రం ఆమోదించింది. ఈ నిధులతో క్రీడా మౌలిక వసతుల అభివృద్ధి, క్రీడాకారులకు ప్రోత్సాహం, అంతర్జాతీయ స్థాయి పోటీలకు సన్నద్ధతకు బలం చేకూరనుంది.
సముద్ర ఆర్థిక వ్యవస్థను బలోపేతం చేసే లక్ష్యంతో సముద్ర మంథన్ పథకం కోసం రూ.84,084 కోట్ల వ్యయానికి కూడా కేబినెట్ ఆమోదం తెలిపింది. సముద్ర వనరుల వినియోగం, మత్స్యరంగం, తీర ప్రాంతాల అభివృద్ధికి ఈ పథకం దోహదపడనుంది.
దేశంలో రవాణా మౌలిక సదుపాయాల విస్తరణలో భాగంగా యూని డైరెక్షనల్ ట్విన్ ట్యూబ్ టన్నెల్స్ నిర్మాణానికి రూ.9,779 కోట్ల కేటాయింపునకు కేంద్ర కేబినెట్ ఆమోదం తెలిపింది. ఈ ప్రాజెక్టు పూర్తయితే రహదారి అనుసంధానం మెరుగుపడటంతో పాటు ప్రయాణ సమయం తగ్గి, రవాణా వ్యవస్థ మరింత సమర్థవంతంగా మారుతుందని కేంద్ర ప్రభుత్వం భావిస్తోంది.
