చెన్నై, మహా.
భారతదేశం పారిశ్రామిక, సాంకేతిక రంగాలలో అద్భుతమైన ప్రగతి సాధిస్తోందని, ప్రపంచంలోనే రెండో అతిపెద్ద మొబైల్‌ తయారీ దేశంగా భారత్‌ అవతరించిందని ప్రధానమంత్రి నరేంద్ర మోదీ ప్రకటించారు. 2014 నుంచి ఇప్పటివరకు దేశ ఎలక్ట్రానిక్స్‌ ఎగుమతులు ఏకంగా 11 రెట్లు పెరిగాయని ఆయన వెల్లడించారు. కేవలం మొబైల్సే కాకుండా రక్షణ పరికరాల తయారీలోనూ దేశం స్వయం సమృద్ధి దిశగా వేగంగా అడుగులు వేస్తోందని, తయారీ రంగం విస్తరణతో దేశంలోని యువతకు భారీగా ఉపాధి అవకాశాలు లభిస్తున్నాయని ప్రధాని వివరించారు.
తమిళనాడుకు రూ.13,000 కోట్ల భారీ ప్రాజెక్టులు
తమిళనాడు రాష్ట్రంలో ఒకరోజు పర్యటనలో భాగంగా చెన్నైకి విచ్చేసిన ప్రధాని మోదీ.. రూ.13 వేల కోట్లకు పైగా విలువైన పలు కీలక అభివృద్ధి ప్రాజెక్టులకు ప్రారంభోత్సవాలు, శంకుస్థాపనలు చేశారు. రాష్ట్ర సమగ్ర అభివృద్ధికి కేంద్ర ప్రభుత్వం ఎప్పుడూ అన్ని విధాలుగా సహకరిస్తుందని, రాష్ట్ర ప్రభుత్వంతో కలిసి అండగా నిలుస్తామని తెలిపారు. దేశంలోని రాష్ట్రాలు ఆర్థికంగా, పారిశ్రామికంగా అభివృద్ధి చెందితేనే దేశం మరింత బలోపేతమవుతుందని ఆయన నొక్కిచెప్పారు.
25 నగరాలకు విస్తరించిన మెట్రో సేవలు
దేశంలో వేగంగా జరుగుతున్న పట్టణీకరణను ఒక సవాలుగా కాకుండా, భవిష్యత్తును మార్చే అవకాశంగా చూడాలని ప్రధాని మోదీ అభిప్రాయపడ్డారు. ఆధునిక నగరాల అభివృద్ధికి సురక్షితమైన, వేగవంతమైన ప్రజా రవాణా వ్యవస్థ అత్యంత కీలకమని చెప్పారు. 2014లో కేవలం 5 నగరాలకే పరిమితమైన మెట్రో రైలు సేవలు, నేడు దేశవ్యాప్తంగా 25 నగరాలకు విస్తరించాయని హర్షం వ్యక్తం చేశారు. దీనితో పాటు దేశవ్యాప్తంగా రహదారుల విస్తరణ, మౌలిక సదుపాయాల కల్పనకు అత్యంత ప్రాధాన్యత ఇస్తున్నట్లు తెలిపారు.
చెన్నై మెట్రో రెండో దశ ప్రారంభం.. మెట్రోలో ప్రధాని ప్రయాణం
చెన్నై మెట్రో ప్రాజెక్టు రెండో దశలో భాగంగా సుమారు రూ.4,900 కోట్ల వ్యయంతో అత్యాధునికంగా నిర్మించిన పూనమల్లి–వడపళని మార్గాన్ని ప్రధాని మోదీ ప్రారంభించారు. అనంతరం ముఖ్యమంత్రితో కలిసి మెట్రో రైలులో ప్రయాణిస్తూ ప్రయాణికులతో ముచ్చటించారు. అంతకుముందు చెన్నై విమానాశ్రయంలో ప్రధానికి గవర్నర్‌, ముఖ్యమంత్రి సాదర స్వాగతం పలికారు. విమానాశ్రయం వెలుపల ఏర్పాటు చేసిన భారీ రోడ్‌షోలో ప్రధాని మోదీ పాల్గొని, దారి పొడవునా బారులు తీరిన ప్రజలు, కార్యకర్తలకు అభివాదం చేశారు.
రోడ్లు, రైల్వేలు, పరిశోధన రంగానికి పెద్దపీట
ఈ పర్యటనలో భాగంగా తమిళనాడులో జాతీయ రహదారుల అభివృద్ధి కోసం రూ.3,700 కోట్లతో చేపట్టే నూతన ప్రాజెక్టులకు ప్రధాని శ్రీకారం చుట్టారు. అలాగే పలు రైల్వే మార్గాలు, ఓడరేవుల సామర్థ్య విస్తరణ కార్యక్రమాలతో పాటు, ఆధునికీకరించిన ఐదు అమృత్‌ భారత్‌ రైల్వే స్టేషన్లను జాతికి అంకితం చేశారు. మరోవైపు, ఐఐటీ మద్రాస్‌లో ఏర్పాటు చేసిన సుధా గోపాలకృష్ణన్‌ మెదడు పరిశోధన కేంద్రాన్ని ప్రారంభించారు. ఈ సందర్భంగా మానవ మెదడుకు సంబంధించిన త్రిమితీయ చిత్రపటంతో పాటు, పక్షవాతానికి సంబంధించిన కీలక చిత్రపటాన్ని ఆయన ఆవిష్కరించారు.
రాజకీయాలకు అతీతంగా రాష్ట్ర అభివృద్ధి
తమిళనాడులో ప్రభుత్వాలు మారుతున్నప్పటికీ, రాష్ట్ర అభివృద్ధి, ప్రజల సంక్షేమం పట్ల తన నిబద్ధత ఎప్పటికీ మారదని ప్రధాని స్పష్టం చేశారు. గూగుల్‌, డిజిటల్ ఇండియా నుంచి అంతరిక్ష రంగం వరకు అన్నింటా తమిళనాడు పాత్ర కీలకమని కొనియాడారు. గతంలో కరుణానిధి, జయలలితతో సహా పలువురు ముఖ్యమంత్రులతో కలిసి రాష్ట్ర అభివృద్ధి కోసం పని చేసిన విషయాన్ని గుర్తుచేసుకున్నారు. ప్రస్తుతం రాష్ట్ర ప్రభుత్వంతో కలిసి తమిళనాడులో తయారీ రంగం, పరిశ్రమలు, రవాణా వ్యవస్థలను మరింత ఉన్నత స్థాయికి తీసుకువెళ్లేందుకు కృషి చేస్తున్నట్లు ప్రధాని మోదీ ఆశాభావం వ్యక్తం చేశారు.
