- రాజమండ్రి, కర్నూలు, తిరుపతి, గుంటూరు నగరాలకు హోదా.
- ఐజీ, డీఐజీ స్థాయి అధికారులకు కమిషనర్లుగా బాధ్యతలు.
- అధికారిక ఉత్తర్వులు జారీ చేసిన రాష్ట్ర ప్రభుత్వం.
అమరావతి, మహా.
శాంతిభద్రతల పరిరక్షణ, పెరుగుతున్న నగరీకరణకు అనుగుణంగా పటిష్టమైన పోలీసు వ్యవస్థను ఏర్పాటు చేసే దిశగా రాష్ట్ర ప్రభుత్వం కీలక నిర్ణయం తీసుకుంది. రాష్ట్రంలోని మరో నాలుగు ప్రధాన నగరాలైన రాజమండ్రి, కర్నూలు, తిరుపతి, గుంటూరులను పోలీస్ కమిషనరేట్లుగా అప్‌గ్రేడ్ చేస్తూ అధికారిక ఉత్తర్వులు జారీ చేసింది. ఈ నగరాల్లో పోలీస్ కమిషనరేట్లను ఏర్పాటు చేసేందుకు రాష్ట్ర కేబినెట్ ఇప్పటికే ఆమోదం తెలపగా, తాజాగా ప్రభుత్వం మార్గదర్శకాలతో కూడిన జీవోలను విడుదల చేసింది. వేగంగా విస్తరిస్తున్న పట్టణ ప్రాంతాల్లో ట్రాఫిక్ సమస్యలను పరిష్కరించడంతో పాటు, నేరాలను సమర్థవంతంగా అణచివేయడమే లక్ష్యంగా ఈ కొత్త వ్యవస్థ పనిచేయనుంది.
ఈ నూతన కమిషనరేట్లకు ఐజీపీ (ఇన్‌స్పెక్టర్ జనరల్ ఆఫ్ పోలీస్), డీఐజీ (డిప్యూటీ ఇన్‌స్పెక్టర్ జనరల్) స్థాయి సీనియర్ ఐపీఎస్ అధికారులు కమిషనర్లుగా వ్యవహరించనున్నారు. క్షేత్రస్థాయిలో వేగవంతమైన నిర్ణయాలు తీసుకునేందుకు, శాంతిభద్రతలను పకడ్బందీగా నియంత్రించేందుకు వీలుగా ఈ కమిషనర్లకు ఎగ్జిక్యూటివ్ మేజిస్ట్రేట్ అధికారాలను ప్రభుత్వం కట్టబెట్టింది. అయితే, ఈ కమిషనరేట్ల ఏర్పాటు వల్ల ఖజానాపై అదనపు భారం పడకుండా ప్రభుత్వం జాగ్రత్తలు తీసుకుంది. ఈ వ్యవస్థల కోసం ప్రత్యేకంగా కొత్త పోస్టులు ఏవీ సృష్టించడం లేదని, ప్రస్తుతం అందుబాటులో ఉన్న పోలీసు సిబ్బంది, బలగాలను సర్దుబాటు చేయడం ద్వారానే వీటిని నిర్వహిస్తామని ప్రభుత్వం స్పష్టం చేసింది.
రాజమండ్రి కేంద్రాన్ని మూడు జోన్లుగా విభజించి పోలీస్ కమిషనరేట్‌ను ఏర్పాటు చేస్తున్నారు. పరిపాలనా సౌలభ్యం కోసం పలు పోస్టులను ప్రభుత్వం పునర్‌వ్యవస్థీకరించింది. రాజమండ్రి ఎస్పీ పోస్టును డీసీపీ లా అండ్ ఆర్డర్-1గా మార్చారు. విశాఖపట్నం ట్రాఫిక్ డీసీపీ పోస్టును రాజమండ్రి డీసీపీ లా అండ్ ఆర్డర్-2గా బదిలీ చేశారు. అదేవిధంగా ఎస్పీ (ఎస్ఐబీ) పోస్ట్‌‌ను డీసీపీ కో-ఆర్డినేషన్‌గా మార్పు చేశారు. వీటితో పాటు గ్రేహౌండ్స్ ఎస్పీ పోస్టును డీసీపీగా రీడిజిగ్నేట్ చేయడంతో పాటుగా, మరో నాలుగు అదనపు ఎస్పీ పోస్టులను సైతం డీసీపీలుగా మారుస్తూ ప్రభుత్వం ఉత్తర్వులు వెలువరించింది. ఈ మార్పులతో ఆయా నగరాల్లో పోలీసుల పనితీరు మరింత పారదర్శకంగా, జవాబుదారీతనంతో ఉంటుందని అధికార వర్గాలు భావిస్తున్నాయి.
