అమెరికాలో విషాదం.

•  గుండెపోటుతో తెలుగు యువతి మృతి.

ఖమ్మం,మహా.

ఉజ్వల భవిష్యత్తును వెతుక్కుంటూ అమెరికా వెళ్లి, ఉన్నత చదువులు పూర్తి చేసుకుని ఉద్యోగ ప్రయత్నాల్లో ఉన్న ఓ తెలుగు యువతిని విధి చిన్నచూపు చూసింది. గుండెపోటు రూపంలో మృత్యువు కబళించడంతో ఆమె అకస్మాత్తుగా తుదిశ్వాస విడిచింది. తెలంగాణలోని ఖమ్మం జిల్లాకు చెందిన అక్షిత (26) అమెరికాలోని న్యూజెర్సీలో మృతి చెందడంతో ఆమె కుటుంబంలో తీవ్ర విషాదం అలుముకుంది. ఈ హృదయ విదారక ఘటన స్థానికంగానూ తీవ్ర దిగ్భ్రాంతిని కలిగించింది.

ఖమ్మం ట్రేడర్స్ అసోసియేషన్ ఇంపోర్ట్స్ వింగ్ అధ్యక్షుడు నల్లమల్ల ఆనంద్ కుమార్తె అయిన అక్షిత, సరిగ్గా నాలుగేళ్ల క్రితం ఉన్నత విద్యను అభ్యసించేందుకు అమెరికా వెళ్లారు. అక్కడ మాస్టర్స్ డిగ్రీని విజయవంతంగా పూర్తి చేసిన ఆమె, ప్రస్తుతం ఉద్యోగ వేటలో ఉన్నారు. న్యూజెర్సీలోని అల్బనీ ప్రాంతంలో తన సోదరుడు అక్షయ్‌తో కలిసి ఆమె నివాసం ఉంటున్నారు.

కుటుంబ సభ్యులు తెలిపిన వివరాల ప్రకారం.. గురువారం స్థానిక కాలమానం ప్రకారం సాయంత్రం ఏడు గంటల సమయంలో అక్షిత తన తండ్రితో ఫోన్‌లో మాట్లాడారు. ఇంటి సమీపంలో నడుస్తూ తండ్రితో సంభాషిస్తున్న కొద్దిసేపటికే ఆమె అకస్మాత్తుగా అపస్మారక స్థితిలోకి వెళ్లి కిందపడిపోయారు. సోదరి పరిస్థితిని గమనించిన సోదరుడు అక్షయ్ వెంటనే అప్రమత్తమై ఆమెను సమీపంలోని ఆసుపత్రికి తరలించారు. అయితే, అప్పటికే ఆమె తీవ్రమైన గుండెపోటుతో మరణించినట్లు వైద్యులు ధ్రువీకరించడంతో కుటుంబ సభ్యులు శోకసంద్రంలో మునిగిపోయారు.

కళ్ల ముందే ఎదిగిన కుమార్తె విగతజీవిగా మారడంతో తల్లిదండ్రులు, కుటుంబ సభ్యులు రోదిస్తున్న తీరు అందరినీ కలిచివేస్తోంది. ఈ దారుణ వార్త తెలియగానే బంధువులు, స్నేహితులు, స్థానిక వ్యాపార సంఘం నాయకులు ఆనంద్ నివాసానికి భారీగా చేరుకుని, కుటుంబ సభ్యులను పరామర్శించి ప్రగాఢ సానుభూతి తెలిపారు. ప్రస్తుతం అమెరికాలో ఉన్న అక్షిత భౌతికకాయాన్ని స్వదేశానికి తీసుకువచ్చి, ఇక్కడ అంత్యక్రియలు నిర్వహించేందుకు కుటుంబ సభ్యులు మరియు బంధువులు తగిన ఏర్పాట్లు చేస్తున్నారు.