కూటమి ప్రభంజనం….

కూటమి ప్రభంజనం..
* మున్సిపాలిటీలు, కార్పొరేషన్లలో ఏకపక్ష ఆధిపత్యం
* పులివెందులలో చరిత్ర సృష్టించిన టీడీపీ.. కుప్పం, మాచర్లలో క్లీన్ స్వీప్.
* విశాఖ నుంచి చిత్తూరు వరకు ప్రతి పట్టణంలోనూ కూటమి విజయం.
* నందికొట్కూరు, బేతంచెర్లలో వైసీపీ సత్తా.
* 17 మున్సిపల్ చైర్మన్ స్థానాలు ఏకగ్రీవం..
* 92 పట్టణ స్థానిక సంస్థల్లో 62.16 శాతం పోలింగ్.
* తుఫాను ప్రభావంతో పలుచోట్ల లెక్కింపు ఆలస్యం
అమరావతి, మహా.

ఆంధ్రప్రదేశ్ వ్యాప్తంగా 13 నగరపాలక సంస్థలు, 79 మున్సిపాలిటీలు, నగర పంచాయతీలతో 92 పట్టణ స్థానిక సంస్థల ఎన్నికల్లో తెలుగుదేశం, జనసేన, భారతీయ జనతా పార్టీ కూటమి చరిత్రాత్మక విజయం నమోదు చేసింది. మేయర్, చైర్‌పర్సన్ స్థానాలకు ప్రజలు నేరుగా ఓటు వేసే నూతన విధానం ఈ ఎన్నికల్లో అమలు కావడంతో ఫలితాలపై సర్వత్రా ఆసక్తి నెలకొంది. మున్సిపాలిటీ, కార్పొరేషన్‌లో ఓటర్లు ఇచ్చిన తీర్పు రాష్ట్ర రాజకీయాల్లో నూతన సమీకరణాలకు తెరతీసింది. మొత్తం 96,89,061 మంది ఓటర్లకు గాను 60,22,411 మంది ఓటు హక్కు వినియోగించుకోవడంతో రాష్ట్రవ్యాప్తంగా 62.16 శాతం పోలింగ్ నమోదైంది. ప్రకాశం జిల్లా చీమకుర్తిలో అత్యధికంగా 84.36 శాతం నమోదు కాగా, కనిగిరి, గూడూరు, పెనుకొండ, నందికొట్కూరులలో 80 శాతానికి పైగా ఓటింగ్ నమోదైంది. కార్పొరేషన్ల విషయానికి వస్తే నెల్లూరు, విశాఖపట్నం, గుంటూరు, విజయవాడ నగరాల్లో 55 శాతానికి పైగా పోలింగ్ జరగ్గా, తిరుపతిలో అత్యల్పంగా 46.85 శాతం ఓటింగ్ నమోదైంది.
ఈ ఎన్నికల ఫలితాల్లో కడప జిల్లా పులివెందుల మున్సిపాలిటీ అత్యంత ఆకర్షణగా నిలిచింది. 43 ఏళ్ల చరిత్రను తిరగరాస్తూ టీడీపీ అభ్యర్థి తూగుట్ల గీతాకుమారి, వైసీపీ అభ్యర్థి వైఎస్ ప్రమీలపై 13,875 ఓట్ల భారీ మెజారిటీతో విజయం సాధించారు. ముఖ్యమంత్రి చంద్రబాబు నాయుడు ప్రాతినిధ్యం వహిస్తున్న చిత్తూరు జిల్లా కుప్పంలో మొత్తం 32 వార్డులను టీడీపీ కైవసం చేసుకుని క్లీన్ స్వీప్ చేసింది. పల్నాడు జిల్లా మాచర్లలోనూ మొత్తం 36 వార్డులను కూటమి నెగ్గి వైసీపీకి ఒక్క వార్డు కూడా దక్కకుండా చేసింది. కర్నూలు జిల్లా యెమ్మిగనూరులో 44 వార్డులకు గాను కూటమి 38 స్థానాలు సాధించింది. రాయలసీమలోని అన్నమయ్య జిల్లా మదనపల్లెలో టీడీపీ అభ్యర్థి శ్రీరామ్ చినబాబు గెలుపొందగా, ఉమ్మడి కడప జిల్లాలోని రాజంపేట, రాయచోటి, మైదుకూరు, ప్రొద్దుటూరు, కమలాపురం, బద్వేల్, జమ్మలమడుగు ప్రాంతాల్లో టీడీపీ అభ్యర్థులు ఘనవిజయం సాధించారు. ఎర్రగుంట్లలో బీజేపీ అభ్యర్థి గోర్ల మధులత ఏకగ్రీవమయ్యారు. అనంతపురం, శ్రీ సత్యసాయి జిల్లాల పరిధిలోని పుట్టపర్తిలో జనసేన అభ్యర్థి ఈశ్వర్ గెలుపొందగా, పెనుకొండ, కళ్యాణదుర్గం, గుత్తి, రాయదుర్గం, తాడిపత్రి, గుంతకల్లు మున్సిపాలిటీలను కూటమి దక్కించుకుంది. మడకశిరలో జనసేన, హిందూపురం, కదిరి, ధర్మవరం ప్రాంతాల్లో కూటమి అభ్యర్థులు స్పష్టమైన ఆధిక్యం కనబరిచారు.
రాష్ట్రంలోని నగరపాలక సంస్థలన్నింటిలోనూ కూటమి అభ్యర్థులదే పైచేయిగా నిలిచింది. విశాఖపట్నం, మచిలీపట్నం, చిత్తూరు, విజయవాడ, గుంటూరు, నెల్లూరు కార్పొరేషన్లను కూటమి కైవసం చేసుకోగా, తిరుపతి నగరపాలక సంస్థలో టీడీపీ అభ్యర్థి జేబీ శ్రీనివాస్ 24,625 ఓట్ల మెజారిటీతో మేయర్ పీఠాన్ని దక్కించుకున్నారు. అనంతపురం కార్పొరేషన్‌లో బీజేపీ, వైసీపీ మధ్య తీవ్ర పోటీ నెలకొనగా, అనకాపల్లి కార్పొరేషన్ 10వ వార్డులో టీడీపీ, బీజేపీ అభ్యర్థులకు సమానంగా ఓట్లు రావడంతో ఉత్కంఠ రేగింది. ఒంగోలు కార్పొరేషన్‌లో వర్షాల కారణంగా లెక్కింపు ఆలస్యమైంది. ఇక కోస్తా, గోదావరి జిల్లాల మున్సిపాలిటీల విషయానికొస్తే గుంటూరు జిల్లా తెనాలిలో 52 వార్డులకు గాను కూటమి 46 నెగ్గి, జనసేన అభ్యర్థి తోటకూర వెంకట రమణారావు చైర్‌పర్సన్‌గా ఎన్నికయ్యారు. పల్నాడు జిల్లాలో మాచర్లతో పాటు సత్తెనపల్లి, చిలకలూరిపేట, వినుకొండ మున్సిపాలిటీలను కూటమి గెలుచుకోగా, పిడుగురాళ్ల, దాచేపల్లి, గురజాల మున్సిపాలిటీలు స్థానికంగా ఏకగ్రీవం అయ్యాయి. ప్రకాశం, బాపట్ల జిల్లాల్లోని చీమకుర్తి, అద్దంకి, రేపల్లెల్లో తుఫాను వల్ల లెక్కింపు ఆలస్యం కాగా, చీరాల మున్సిపాలిటీ ఓట్ల లెక్కింపును నవంబర్ 6కి వాయిదా వేశారు. కృష్ణా, ఎన్టీఆర్ జిల్లాల పరిధిలోని పెడన, ఉయ్యూరు, జగ్గయ్యపేట, నందిగామ, కొండపల్లి మున్సిపాలిటీలను టీడీపీ గెలుచుకోగా, తిరువూరులో జనసేన ఆధిక్యం కనబరిచింది.
ఉత్తరాంధ్ర, గోదావరి జిల్లాల్లోనూ కూటమి ప్రభంజనం స్పష్టంగా కనిపించింది. శ్రీకాకుళం జిల్లా ఇచ్చాపురంలో టీడీపీకి చెందిన ఆసి లీలారాణి, పలాస-కాశీబుగ్గలో టీడీపీ అభ్యర్థి గంగా భవాని గెలుపొందారు. విజయనగరం జిల్లా బొబ్బిలిని టీడీపీ నెగ్గగా, పార్వతీపురం మన్యం జిల్లాలోని పార్వతీపురాన్ని టీడీపీ కైవసం చేసుకుంది. పాలకొండ నగర పంచాయతీలో జనసేన అభ్యర్థి పల్లా విజయనిర్మల గెలుపొందగా, నెల్లిమర్ల, సాలూరులలో స్వతంత్రులు ముందంజలో నిలిచారు. అనకాపల్లి జిల్లా నర్సీపట్నంలో టీడీపీకి చెందిన చింతకాయల పద్మావతి నెగ్గగా, యలమంచిలిలో బీజేపీ ఆధిక్యం ప్రదర్శించింది. ఉమ్మడి ఉభయ గోదావరి జిల్లాల్లోని కొవ్వూరు, మండపేట, ఆకివీడు, జంగారెడ్డిగూడెం, నూజివీడు, పెద్దాపురం, రామచంద్రపురం, ఏలేశ్వరం మున్సిపాలిటీలను టీడీపీ కైవసం చేసుకోగా.. నిడదవోలు, నరసాపురం, అమలాపురం, ముమ్మిడివరం, గొల్లప్రోలు, పిఠాపురం, సామర్లకోట ప్రాంతాల్లో జనసేన అభ్యర్థులు అద్భుత విజయాలు సాధించి చైర్‌పర్సన్ స్థానాలను దక్కించుకున్నారు. ఉమ్మడి నెల్లూరు, చిత్తూరు జిల్లాల పరిధిలోని ఆత్మకూరు, బుచ్చిరెడ్డిపాలెం, పుత్తూరు, సూళ్లూరుపేట, వెంకటగిరి మున్సిపాలిటీలను సైతం కూటమి విజయవంతంగా తన ఖాతాలో వేసుకుంది.
రాష్ట్రవ్యాప్తంగా కూటమి గాలి వీచినప్పటికీ కర్నూలు, నంద్యాల, తిరుపతి జిల్లాల్లోని కొన్ని పట్టణాల్లో వైసీపీ తన ఉనికిని చాటుకుంది. నందికొట్కూరు మున్సిపాలిటీలోని 32 వార్డుల్లో 22 స్థానాలను కైవసం చేసుకున్న వైసీపీ తరఫున ఎస్. ఫాతిమా బీ చైర్‌పర్సన్‌గా గెలుపొందారు. బేతంచెర్ల నగర పంచాయతీలో 28కి గాను 18 స్థానాలను వైసీపీ దక్కించుకోగా, నాయుడుపేట మున్సిపాలిటీలో వైసీపీ అభ్యర్థి తంబిరెడ్డి రాజేశ్వరమ్మ ఆధిక్యం ప్రదర్శించారు. రాష్ట్రవ్యాప్తంగా మొత్తం 17 చైర్‌పర్సన్ స్థానాలు ఏకగ్రీవం కాగా (వీటిలో ఆళ్లగడ్డ, దర్శి తదితర పట్టణాలు ఉన్నాయి), అందులో టీడీపీ 15, జనసేన 1, బీజేపీ 1 స్థానాలను దక్కించుకున్నాయి.