ఢిల్లీ వేదికగా తెలుగు రాష్ట్రాల కళా వైభవం.
• 45వ అంతర్జాతీయ వాణిజ్య మేళాలో ప్రత్యేక ఆకర్షణగా ఏపీ, తెలంగాణ ఉత్పత్తులు.
* చేనేత, హస్తకళలకు దక్కుతున్న అంతర్జాతీయ గుర్తింపు.
న్యూఢిల్లీ, మహా.
దేశ రాజధానిలోని ప్రతిష్ఠాత్మక ‘భారత మండపం’ వేదికగా 45వ ఇండియా ఇంటర్నేషనల్ ట్రేడ్ ఫెయిర్ (ఐఐటీఎఫ్–2026) అట్టహాసంగా ప్రారంభమైంది. నవంబర్ 14 నుంచి 27వ తేదీ వరకు సాగనున్న ఈ అంతర్జాతీయ వాణిజ్య ప్రదర్శనలో తెలుగు రాష్ట్రాలైన ఆంధ్రప్రదేశ్, తెలంగాణ తమ సంస్కృతి, సంప్రదాయాలతో పాటు పారిశ్రామిక, చేనేత రంగాల ప్రగతిని ఘనంగా చాటుకుంటున్నాయి. సంప్రదాయ కళలు, చేనేత వస్త్రాలు, వ్యవసాయ ఉత్పత్తులను దేశవిదేశీ సందర్శకులకు పరిచయం చేసేందుకు ఈ మేళా అద్భుత వేదికగా నిలుస్తోంది.
42 స్టాళ్లతో ఆంధ్రప్రదేశ్ ప్రత్యేక పెవిలియన్
ఈ ప్రదర్శనలో ఆంధ్రప్రదేశ్ ప్రభుత్వం 42 స్టాళ్లతో ప్రత్యేక పెవిలియన్ను ఏర్పాటు చేసి సందర్శకులను ఆకట్టుకుంటోంది. రాష్ట్రంలోని విఖ్యాత చేనేత వస్త్రాలు, హస్తకళలు, వ్యవసాయ ఆధారిత ఉత్పత్తులతో పాటు పారిశ్రామిక పురోగతి, పర్యాటక విశేషాలను ఇక్కడ కళ్లకు కట్టినట్లు ప్రదర్శిస్తున్నారు. సుమారు 200 మంది కళాకారులు, హస్తకళాకారులు తమ అద్భుత ప్రతిభను అంతర్జాతీయ వేదికపై ప్రదర్శిస్తున్నారు. నవంబర్ 18న ‘ఆంధ్రప్రదేశ్ దినోత్సవం’ నిర్వహించేందుకు అధికారులు ప్రత్యేక ఏర్పాట్లు చేశారు. ఈ వేడుకల్లో రాష్ట్ర సంప్రదాయ నృత్యాలు, జానపద కళారూపాలు ప్రధాన ఆకర్షణగా నిలవనున్నాయి.
తెలంగాణ చేనేతకు జాతీయ స్థాయి గుర్తింపు
తెలంగాణ రాష్ట్రం నుంచి విచ్చేసిన చేనేత ఉత్పత్తులు ఈ మేళాలో ప్రత్యేక గుర్తింపును సొంతం చేసుకుంటున్నాయి. కేంద్ర చేనేత అభివృద్ధి కమిషనర్ కార్యాలయం విడుదల చేసిన 2026 ప్రదర్శకుల ఎంపిక జాబితాలో తెలంగాణ స్టేట్ హ్యాండ్లూమ్ వీవర్స్ కోఆపరేటివ్ సొసైటీ (టీజీఎస్సీఓ)కి స్థానం దక్కింది. ప్రపంచ ప్రఖ్యాతి గాంచిన పోచంపల్లి ఇకత్ చీరలు, గద్వాల్ చీరలు, నారాయణపేట చీరలు, వరంగల్ దర్రీస్, సూట్లు, డ్రెస్ మెటీరియల్స్ను ఇక్కడ ప్రదర్శనకు ఉంచారు. వీటితో పాటు వరంగల్కు చెందిన శ్రీ సాయి హ్యాండ్లూమ్ వీవర్స్ కోఆపరేటివ్ ప్రొడ్యూసర్స్ సొసైటీ ఆధ్వర్యంలో తయారైన కాటన్, జనపనార, కలంకారీ దర్రీస్ ప్రత్యేక ఆకర్షణగా నిలుస్తున్నాయి. తెలంగాణ చేనేత వైవిధ్యానికి ఈ ఎంపిక నిదర్శనంగా నిలిచింది.
59 వేల మందికి పైగా నేతన్నలకు జీవనోపాధి
తెలంగాణ ఆర్థిక వ్యవస్థలో చేనేత రంగానికి ఉన్న ప్రాధాన్యతను రాష్ట్ర ప్రభుత్వ గణాంకాలు స్పష్టం చేస్తున్నాయి. రాష్ట్ర చేనేత, జౌళి శాఖ వివరాల ప్రకారం.. రాష్ట్రవ్యాప్తంగా సుమారు 59,325 మంది చేనేత, అనుబంధ కార్మికులు ఈ రంగంపై ఆధారపడి జీవనోపాధి పొందుతున్నారు. రాష్ట్రంలో 43,469 పవర్లూమ్లు పనిచేస్తుండగా, మొత్తం 407 చేనేత సహకార సంఘాలు కార్యకలాపాలు సాగిస్తున్నాయి. వీటిలో పత్తి విభాగంలో 259, పట్టు విభాగంలో 40, ఉన్ని విభాగంలో 35 సంఘాలు ఉన్నాయి. ఈ ఉత్పత్తుల మార్కెటింగ్కు టీజీఎస్సీఓ అపెక్స్ సంస్థగా వ్యవహరిస్తూ నేతన్నలకు అండగా నిలుస్తోంది.
అభివృద్ధి, వారసత్వాల సమ్మేళనం
‘వికాస్ ఔర్ విరాసత్’ (అభివృద్ధి – వారసత్వం) అనే ఇతివృత్తంతో నిర్వహిస్తున్న ఈ ఏడాది వాణిజ్య మేళాలో 32 రాష్ట్రాలు, కేంద్రపాలిత ప్రాంతాలతో పాటు 11 దేశాలకు చెందిన 3,500 మందికి పైగా ఎగ్జిబిటర్లు పాల్గొంటున్నారు. 17 ప్రదర్శన హాళ్లలో లక్ష చదరపు మీటర్లకు పైగా విస్తీర్ణంలో ఈ ప్రదర్శన కొలువుదీరింది. సుమారు 600 అంకుర సంస్థలు తమ నూతన ఆవిష్కరణలను ఇక్కడ పరిచయం చేస్తున్నాయి. ఈ నెల 14 నుంచి 18 వరకు వ్యాపార సందర్శకులకు, 19 నుంచి 27 వరకు సాధారణ ప్రజలకు ప్రవేశం కల్పించారు. దేశవిదేశీ కొనుగోలుదారులతో నేరుగా వాణిజ్య సంబంధాలు ఏర్పరచుకునేందుకు, స్థానిక కళాకారుల ఆదాయాన్ని పెంచి తెలుగు రాష్ట్రాల ఖ్యాతిని విశ్వవ్యాప్తం చేసేందుకు ఈ అంతర్జాతీయ మేళా ఎంతగానో దోహదపడనుంది.







