అశ్వాపురం, మహా.
నెల్లిపాక బంజర జిల్లా పరిషత్ ఉన్నత పాఠశాల అటెండర్ జ్యోతి కిరణ్ మానవత్వంతో ముందుకు వచ్చి దూరప్రాంతాల నుండి వచ్చే విద్యార్థుల రవాణా ఖర్చుల కోసం ప్రతినెల తన జీతం నుండి ₹6,000 అందించనున్నట్లు ప్రకటించారు. 79వ స్వాతంత్ర్య దినోత్సవ వేడుకల్లో ఈ నిర్ణయం వెల్లడించారు.
గత రెండు సంవత్సరాలుగా గ్రామస్థులు, పెద్దలు కలసి ఈ ఖర్చులు భరించగా, ఈసారి దాతలు ముందుకు రాకపోవడంతో విద్యార్థులు చదువు మానే పరిస్థితి ఏర్పడింది. దీనిని గమనించిన జ్యోతి కిరణ్ విద్యార్థుల భవిష్యత్ కోసం ఈ సహాయం చేయాలని నిర్ణయించారు.
ఆయన స్ఫూర్తితో హిందీ ఉపాధ్యాయుడు రాంబాబు, పంచాయతీ మాజీ ఉప సర్పంచ్ అక్కిన అచ్యుతరామారావు తలో నెలకు ₹10,000 చొప్పున రవాణా ఖర్చుల కోసం అందించనున్నట్లు ప్రకటించారు. విద్యార్థుల భవిష్యత్ కోసం మరికొందరు దాతలు ముందుకు రావాలని గ్రామస్థులు కోరుతున్నారు.
ఈ సందర్భంగా ప్రధానోపాధ్యాయులు అప్కా శంకర్ ఆధ్వర్యంలో జ్యోతి కిరణ్కు శాలువాతో సత్కారం చేశారు. కార్యక్రమంలో ఉపాధ్యాయులు, గ్రామస్థులు పాల్గొన్నారు.
